روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ BIRLIK ءانسامبلى جاپونيانىڭ وساكا قالاسىنداعى EXPO 2025 حالىقارالىق كورمەسىندە ونەر كورسەتتى, دەپ جازادى Egemen.kz.
انسامبل قازاقستان رەسپۋبليكاسى ۇلتتىق كۇنىنە ارنالعان سالتاناتتى اشىلۋ ءراسىمى مەن گالا-كونتسەرتىنە قاتىستى. ءىس-شاراعا 158 ەل, 9 حالىقارالىق ۇيىم قاتىستى. ونەر ۇجىمى وساكا قالاسىنداعى Ray Garden ساحناسىندا جانە Swissotel Nankai Osaka قوناق ءۇيىنىڭ سالتاناتتى زالىندا ونەر كورسەتىپ, كوپشىلىك كوڭىلىنەن شىقتى. كونتسەرتتىك باعدارلامادا كورەرمەن نازارىنا «كۇي شاشۋ», «اققۋ», «سالكۇرەڭ» جانە ت.ب. باسقا دا ءداستۇرلى بيلەر ۇسىنىلدى.
BIRLIK ءانسامبلى - جاھاندانۋ زامانىندا ۇلتتىق قۇندىلىقتاردى ۇلىقتاپ, ەلىمىزدىڭ مادەنيەتىن الەمگە تانىتىپ جۇرگەن بىرەگەي ونەر ۇجىمى.
ايتا كەتەيىك, اتالعان انسامبل مادەنيەت جانە اقپارات مينيسترلىگىنىڭ قولداۋىمەن 2024 جىلعى 1 ناۋرىز العىس ايتۋ كۇنىنە وراي قۇرىلدى. ۇجىمنىڭ رەپەرتۋارى قازاق حالقىنىڭ تاريحىمەن جانە تاۋەلسىز قازاقستاننىڭ قالىپتاسۋىمەن تىعىز بايلانىستى 130 ەتنوستىڭ مۋزىكالىق مۇراسى مەن ونەرىن قامتيدى.