وڭتۇستىك كورەيا قورعانىس مينيسترلىگىنىڭ ەسەبىنە سايكەس, ەلدىڭ قارۋلى كۇشتەرىندە بۇگىندە شامامەن 450 مىڭ اسكەري قىزمەتشى بار. بۇل – التى جىل بۇرىنعى كورسەتكىشتەن 20%-عا از. قۇجاتتى جەكسەنبى كۇنى بيلەۋشى پارتيا دەپۋتاتى جاريالاعان. بيلىك وكىلدەرى مۇنداي قۇلدىراۋدىڭ باستى سەبەبىن ەلدەگى تۋ دەڭگەيىنىڭ كۇرت تومەندەۋىمەن بايلانىستىرادى. قازىر وڭتۇستىك كورەيادا بالا تۋ كورسەتكىشى – ءبىر ايەلگە 0,75 ءسابي. بۇل – الەمدەگى ەڭ تومەن دەڭگەي, دەپ جازادى Egemen.kz.
سەۋل اسكەري مىندەتتى ساقتاپ وتىر, ويتكەنى ەل ءالى كۇنگە دەيىن يادرولىق قارۋى بار كورشىسى – سولتۇستىك كورەيامەن تەحنيكالىق تۇرعىدا سوعىس جاعدايىندا سانالادى.
بيىل شىلدەدە وڭتۇستىككورەيالىق زەرتتەۋشىلەر جاريالاعان عىلىمي زەرتتەۋدە, سولتۇستىك كورەيادان تونەتىن قاۋىپكە توتەپ بەرۋ ءۇشىن وڭتۇستىك كورەيا كەمىندە 500 مىڭ سارباز ۇستاۋى قاجەت ەكەنى ايتىلعان. پحەنياننىڭ قازىرگى تاڭدا 1,3 ميلليونعا جۋىق بەلسەندى اسكەري كۇشى بار دەپ باعالانادى.
ايتا كەتەيىك, ەلدە بارلىق ەر ازاماتتار 18 اي اسكەري بورىشىن وتەۋگە مىندەتتى. ەرەكشە جاعدايلاردا عانا بوساتۋ نەمەسە كەيىنگە شەگەرۋ مۇمكىندىگى بەرىلەدى.
الايدا بۇل مىندەت ەلدەگى كوپتەگەن جاس جىگىتتەردىڭ كوڭىلىنەن شىقپاي وتىر. سىنشىلاردىڭ پىكىرىنشە, جۇيە ولاردىڭ مانساپ جولىن ءۇزىپ, ومىرلىك جوسپارلارىنا كەدەرگى كەلتىرەدى. سوڭعى جىلدارى بۇل ماسەلە گەندەرلىك تەڭدىك تاقىرىبىنداعى پىكىرتالاستارمەن تىعىز بايلانىستىرىلا باستادى.