الماتى وبلىسى ىلە اۋدانىندا «AMANAT» پارتياسىنىڭ باستاماسىمەن العاش رەت «AMANAT JIU-JITSU KIDS CUP 2025» حالىقارالىق بالالار ءتۋرنيرى ءوتتى, دەپ جازادى Egemen.kz.
بايراقتى باسەكەگە قازاقستاننىڭ بارلىق وڭىرلەرىنەن, سونىمەن قاتار رەسەي, وزبەكستان, قىرعىزستان, تاجىكستان جانە ۋكراينادان كەلگەن جاس دجيۋ-دجيتسۋشىلەر قاتىستى. جالپى سانى 200-دەن استام بالۋاندار تاتاميدە باق سىنادى.
تۋرنير جاسوسپىرىمدەر اراسىندا سالاۋاتتى ءومىر سالتىن ناسيحاتتاۋ, سپورتتىق باسەكەلەستىكتى ارتتىرۋ جانە حالىقارالىق ىنتىماقتاستىقتى نىعايتۋ ماقساتىندا ۇيىمداستىرىلعان. جارىسقا حالىقارالىق ساناتتاعى كاسىبي تورەشىلەر شاقىرىلعان.
«AMANAT» پارتياسى, «جاستار رۋحى» جاستارعا تەك ءبىلىم مەن جۇمىس قانا ەمەس, سونداي-اق ەرىك-جىگەر مەن ءتارتىپتى دارىپتەۋگە باعىتتالعان جان-جاقتى جوبالاردى جۇزەگە اسىرادى. اتالعان جارىس – بالالاردى سپورت ارقىلى تاربيەلەۋدىڭ جارقىن ۇلگىسى. ءبىز جارىسقا قاتىسقان ءار بالانىڭ بولاشاقتا مىقتى ازامات, ەلدىڭ تىرەگى بولارىنا سەنەمىز. بۇل – پارتيانىڭ جاستاردى قولداۋ جولىنداعى ناقتى قادامى», – دەيدى «جاستار رۋحى» جاستار قاناتىنىڭ توراعاسى اقەركە يسكاندەروۆا.
ءتۋرنيردى وتكىزۋ تۋرالى باستامانى العاش رەت بيىل اقپان ايىندا دجيۋ-دجيتسۋدان قارا بەلبەۋ يەگەرى, ساعادات باتىر اتىنداعى سپورت كلۋبىنىڭ نەگىزىن قالاۋشى نۇرسۇلتان ورىنباساروۆ «AMANAT» پارتياسىنىڭ توراعاسى ەرلان قوشانوۆپەن وتكەن كەزدەسۋدە كوتەرگەن بولاتىن. سول ساتتە بالالار مەن جاسوسپىرىمدەر اراسىندا سالاۋاتتى ءومىر سالتىن ناسيحاتتاۋ جانە بۇقارالىق سپورتتى دامىتۋ ماقساتىندا ارنايى رەسپۋبليكالىق تۋرنير ۇيىمداستىرۋ قاجەتتىگى ايتىلعان.
«بۇل ۇسىنىستى ناقتى قاجەتتىلىككە سۇيەنە وتىرىپ ايتتىق. سەبەبى, ەلىمىزدە دجيۋ-دجيتسۋ سپورتىمەن اينالىساتىن مىڭداعان جاس سپورتشى بار, بىراق ولاردىڭ شەبەرلىگىن شىڭدايتىن, حالىقارالىق دەڭگەيگە شىعاراتىن الاڭدار جەتكىلىكسىز. بۇگىن سول باستاما ناقتى جوبانىڭ نەگىزىنە اينالدى. ءبىز بۇل تۋرنير ارقىلى تەك چەمپيونداردى ەمەس, جاۋاپتى ازاماتتاردى تاربيەلەيمىز. بۇل – «AMANAT» پارتياسىنىڭ ەل بولاشاعىنا باعىتتالعان ايقىن ۇستانىمىنىڭ كورىنىسى», – دەدى نۇرسۇلتان ورىنباساروۆ.
ءوز كەزەگىندە «AMANAT» پارتياسى الماتى وبلىستىق فيليالىنىڭ اتقارۋشى حاتشىسى ەرلان جاقىپوۆ جارىستىڭ ماڭىزدىلىعىنا توقتالدى. ونىڭ ايتۋىنشا, وڭىردە سپورتتىڭ كوپتەگەن ءتۇرى دامىپ كەلەدى, ولاردىڭ اراسىندا دجيۋ-دجيتسۋ ەرەكشە قارقىنعا يە.
«سوڭعى جىلدارى ساعادات نۇرماعانبەتوۆ اتىنداعى سپورت كلۋبى 5 مىڭعا جۋىق جاس سپورتشىنى تاربيەلەدى. ولاردىڭ قاتارىندا الەم چەمپيوندارى دا بار. بۇل – جۇيەلى قولداۋدىڭ جانە جاستاردى سپورتقا تارتۋدىڭ ناقتى ناتيجەسى. پارتيانىڭ ساياسي تۇعىرناماسىندا حالىق ساۋلىعىنا ەرەكشە كوڭىل بولىنگەن. سالاۋاتتى ءومىر سالتىنىڭ كەپىلى – سپورت. سوندىقتان بۇقارالىق سپورتتى جانە كاسىبي سپورتتى دامىتۋ – ءبىزدىڭ باسىمدىقتارىمىزدىڭ قاتارىندا. دجيۋ-دجيتسۋ – وڭىرىمىزدە قارقىندى دامىپ كەلە جاتقان سپورت ءتۇرى. بۇل ءتۋرنيردىڭ جاس ۇرپاق تاربيەسىندەگى ءرولى زور», – دەدى ول.
جارىس قورىتىندىسى بويىنشا ءار سالماق جانە جاس ساناتىندا ۇزدىك شىققان سپورتشىلار كۋبوكپەن, مەدالدارمەن جانە ديپلومدارمەن ماراپاتتالدى.
ايتا كەتۋ كەرەك, تۋرنير قازاقستان دجيۋ-دجيتسۋ قاۋىمداستىعى, الماتى وبلىستىق دجيۋ-دجيتسۋ فەدەراتسياسى, وبلىستىق دەنە شىنىقتىرۋ جانە سپورت باسقارماسى مەن ساعادات نۇرماعامبەتوۆ اتىنداعى سپورت كلۋبىنىڭ قولداۋىمەن ءوتتى.
ۇيىمداستىرۋشىلاردىڭ مالىمەتىنشە, «AMANAT JIU-JITSU KIDS CUP» جارىسى الداعى جىلدارى ءداستۇرلى فورماتتا جالعاسىن تابادى.
الماتى وبلىسى.