اقتوبە وبلىسىنىڭ شاعىن عانا العا قالاسىندا تۋىپ-وسكەن اسەل جولمانوۆا بۇگىندە حالىقارالىق مۇناي-گاز جانە ينجەنەرلىك جوبالاردىڭ ماڭىزدى سالاسىندا قۇجات اينالىمىن باقىلاپ, ساپا مەنەدجمەنتىن جۇيەلەيتىن بىلىكتى مامان. ونىڭ كاسىبي جولى تاباندىلىق پەن ۇزدىكسىز دامۋدىڭ ناقتى دالەلى دەۋگە بولادى. اعىلشىن ءتىلى ءپانىنىڭ قاراپايىم مۇعالىمىنەن تەحنيكالىق جوبالاردىڭ دىڭگەگىنە اينالعان اسەل بۇگىندە بەس تىلدە ەركىن سويلەپ, الەمنىڭ ءار تۇكپىرىندەگى ارىپتەستەرىمەن ەركىن بايلانىس ورناتقان كاسىبي تۇلعا.
تامىرى — العادا, ارمانى — الەمدە
اسەلدىڭ ەڭبەك جولى اقتوبەدەگى جۇبانوۆ اتىنداعى ۋنيۆەرسيتەتتە اعىلشىن ءتىلى ءپانىنىڭ مۇعالىمى ماماندىعىن مەڭگەرۋدەن باستالادى. بۇل تاڭداۋدىڭ ارتىندا اناسىنىڭ اقىلى تۇرعان. «سەنىڭ ءتىلدى مەڭگەرۋ قابىلەتىڭ جوعارى, جاقسى مۇعالىم بولاسىڭ» دەگەن شەشىمىمەن قىزىن ۇستازدىق جولعا باعىتتاعان.
دەگەنمەن, اسەلدىڭ جۇرەگى ءاردايىم ۇلكەن جوبالار مەن شەتەلدىك ورتاعا ۇمتىلدى.
— مەكتەپ پەن ءتىل ورتالىقتارىندا جۇمىس ىستەپ جۇرگەندە-اق مەن ءوزىمدى الدەبىر تار كەڭىستىكتە قالىپ قالعانداي سەزىندىم. ءبىر ورىندا تۇرىپ قالعىم كەلمەدى. سوندىقتان تاۋەكەلگە بارىپ, شەتەلدىك كومپانياعا جۇمىسقا ورنالاسۋعا بەل بۋدىم. باستاپقىدا قيىن بولدى, بىراق مەن ءوزىمدى دالەلدەۋگە تىرىستىم, — دەيدى ول.
تەڭىزدەگى العاشقى قادامدار
اسەلدىڭ العاشقى وندىرىستىك تاجىريبەسى تەڭىز كەن ورنىندا بۇرعىلاۋشىلارعا اعىلشىن ءتىلىن ۇيرەتۋدەن باستالدى. بۇل شەتەلدىك جۇمىس ورتاسىنا العاشقى قادامى ەدى, كاسىبي جولىنىڭ جاڭا پاراعى اشىلعان بولاتىن. سول جەردە ول شەتەلدىك ماماندارمەن جۇمىس ىستەۋدى, وندىرىستىك قاۋىپسىزدىك, ساپا ستاندارتتارى, قۇجات جۇرگىزۋ مادەنيەتى سىندى باعىتتاردى العاش رەت تەرەڭ مەڭگەردى.
— تەڭىزدەگى تاجىريبە مەنىڭ بولاشاعىمدى تۇبەگەيلى وزگەرتتى. جاڭا سالالارعا قىزىعۋشىلىعىم وياندى. ءوز ءبىلىمىمدى تەرەڭدەتۋ ءۇشىن اكىمشىلىك, كەيىن تەحنيكالىق پوزيتسيالارعا اۋىستىم. اعىلشىن ءتىلىمدى وندىرىستىك كونتەكستە جەتىلدىرىپ, قۇجاتتامامەن جۇمىس ىستەي باستادىم, — دەپ ەسكە الادى مامان.
قوس ديپلوم — كاسىبي سەنىمنىڭ كەپىلى
وندىرىستەگى سۇرانىستى سەزىنگەن اسەل مۇنىمەن شەكتەلىپ قالمادى. ول الماتىعا بارىپ, ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىندە قۇرىلىس ينجەنەرى ماماندىعى بويىنشا تاعى ءبىر جوعارى ءبىلىم الدى. بۇل قادام ونىڭ تەك لينگۆيستيكالىق نەمەسە اكىمشىلىك ەمەس, تەحنيكالىق سالالاردا دا قۇزىرەتتى ەكەنىن دالەلدەدى.
— ماعان جاي عانا اۋدارماشى, كەڭسە مەنەدجەرى رەتىندە ەمەس, وندىرىستىك پروتسەستى بىلەتىن, قۇجاتتامانى تۇسىنەتىن, ساپا ستاندارتتارىن مەڭگەرگەن مامان رەتىندە قاراعانى ماڭىزدى بولدى. سول ءۇشىن مەن وقۋعا قايتا بارىپ, ءوزىمدى تولىققاندى تەحنيكالىق كادر رەتىندە قالىپتاستىردىم, — دەيدى ول.
حالىقارالىق جوبالارداعى بەدەل
اسەل جولمانوۆانىڭ ەڭبەك جولىندا «تەڭىزشەۆرويل», CPC, Denholm Valvecare, Graham Manufacturing, Worley Parsons سەكىلدى حالىقارالىق جوبالار مەن كومپانيالار بار. ول جوبالاردىڭ ارقايسىسىندا قۇجات اينالىمى, ساپا باقىلاۋ, اۋدارما, اكىمشىلىك قولداۋ سياقتى ءتۇرلى باعىتتا ەڭبەك ەتتى.
تىنىمسىز ەڭبەكپەن كەلگەن جەتىستىكتەرى دە از ەمەس. ولاردى بىلاي تىزىمدەپ شىقساق بولادى:
5000-نان استام ينجەنەرلىك قۇجات پەن سىزبالاردى باسقارۋ; 1000 بەتتەن استام تەحنيكالىق اۋدارما (اعىلشىن, ورىس, قازاق تىلدەرىندە); 20 پايىز جىلدامدىقپەن قۇجات بەكىتۋ پروتسەسىن اۆتوماتتاندىرۋ; 15 پايىز دەڭگەيدە ەسەپتىك سايكەسسىزدىكتەردى ازايتۋ; 4 ءساتتى اۋديت ەشقانداي ەسكەرتۋسىز وتكىزىلگەن.اسەل ءار كەزەڭدە وزىنە جاڭا ماقساتتار قويىپ, شەكارادان اتتاۋدان قورىقپاعان. ول ءوز مانسابىندا تەك تاپسىرىلعان مىندەتتى ورىنداۋمەن شەكتەلمەي, وندىرىستىك جۇيەلەردىڭ جاقسارۋىنا, پروتسەستەردىڭ جەڭىلدەۋىنە ۇلەس قوسىپ وتىردى.
ەگيپەتكە اپارعان ەڭبەك
بۇگىندە اسەل جولمانوۆا حالىقارالىق كەڭەسشى رەتىندە كاير قالاسىندا تۇرىپ جاتىر. ول ءارتۇرلى ەلدەردىڭ كومپانيالارىمەن جۇمىس ىستەيدى, سونىڭ ىشىندە اقش, تۇركيا, اۋستراليا, ۇلىبريتانيا جانە تاعى باسقا مەملەكەتتەر بار. سوڭعى سەگىز جىلدا ەگيپەت پەن تۇركيادا تۇرىپ, جاڭا مادەني ورتاعا تەز بەيىمدەلىپ, كاسىبي يكەمدىلىگىن تانىتقان.
— مەن ءۇشىن ەڭ ۇلكەن جەتىستىك — العاداي شاعىن قالادان شىعىپ, ءوز ورنىمدى حالىقارالىق ورتادا تاپقانىم. بۇل وڭاي بولعان جوق. بىراق ءتىل ءبىلۋ, ەڭبەكقورلىق, بىلىمگە قۇشتارلىق مەنى وسى كۇنگە جەتكىزدى. قازىر مەنىڭ دوستارىم الەمنىڭ تۇكپىر-تۇكپىرىندە تۇرادى. Facebook پاراقشاما قاراساڭىز, ءتۇرلى ەلدەردەگى ارىپتەستەرمەن بايلانىسىم ۇزىلگەن ەمەس, — دەيدى ول.
ايەل جانە ءوندىرىس: ۇيلەسىم بار ما؟
اسەلدىڭ تاجىريبەسى — وندىرىستىك ورتاداعى ايەلدىڭ ءرولىن دە ناقتى سيپاتتايدى. ول ستەرەوتيپتەرگە قارسى تۇرىپ, كوبىنە ەرلەر باسىم سالالاردا ءوزىن مويىنداتقان.
— باستاپقىدا مەنى «ايەل ادام بۇل سالادا كوپ جۇرمەيدى» دەپ قابىلداماعاندار بولدى. بىراق كاسىبيلىك, ءتارتىپ, ءوز ءىسىڭدى جەتىك ءبىلۋ جىنىسقا ەمەس, ەڭبەككە بايلانىستى ەكەنىن دالەلدەدىم, — دەيدى اسەل.
جوبالىق ۇلەس جانە حالىقارالىق سەرىكتەستىك
اسەل جولمانوۆانىڭ كاسىبي جۇمىسى تەك وندىرىستىك مىندەتتەرمەن شەكتەلمەيدى. ول بەلگىلى ءبىر حالىقارالىق جوبالاردىڭ, سونىڭ ىشىندە PR جانە ءبىلىم بەرۋ جوبالارىنىڭ دامۋىنا ۇلەس قوسقان. بۇل ونىڭ جۇمىسىنا اقش ەلشىلىگى تاراپىنان دا نازار اۋدارىلۋىنا نەگىز بولدى.
— P.L.A.P. سەكىلدى جوبالارعا قاتىسىپ, جاستاردىڭ ءتىل مەڭگەرۋىنە, كاسىبي باعدار الۋىنا كومەكتەستىم. بۇل تەك جۇمىس ەمەس, الەۋمەتتىك جاۋاپكەرشىلىك دەپ بىلەمىن. شەتەلدىك سەرىكتەستەرمەن بىرلەسىپ, ءوز تاجىريبەممەن ءبولىسۋ – مەن ءۇشىن مارتەبە, — دەيدى ول.
قازاق قىزىنىڭ تاريحى جاس ماماندارعا ۇلگى بولارلىق شىنايى تابىس حيكاياسى ەكەنى انىق. تەك ارمانداي ءبىلۋ ەمەس, سول ارمانعا ناقتى ارەكەت ارقىلى جەتۋدىڭ مۇمكىن ەكەنىن دالەلدەگەن ول قازىرگى قازاقستاننىڭ زاماناۋي, ءبىلىمدى, حالىقارالىق دەڭگەيدە ويلايتىن ارۋىنىڭ بەينەسى.