پرەزيدەنتكە ينۆەستورلار قاۋىمداستىعى قىزمەتىنىڭ باسىم باعىتتارى مەن نەگىزگى باستامالارى تانىستىرىلدى. بۇل ۇيىم مەملەكەت باسشىسىنىڭ اقپان ايىنداعى ءىرى بيزنەس وكىلدەرىمەن كەزدەسۋدە بەرگەن تاپسىرماسىنا ساي قۇرىلعان بولاتىن, دەپ حاباراليدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاۋىمداستىقتىڭ مەملەكەت پەن ينۆەستورلار اراسىنداعى دانەكەرلىك ءرولىن كورسەتەتىن اۋقىمدى كۇن ءتارتىبى تالقىلاندى. ەڭ الدىمەن شەشىلۋگە ءتيىس مىندەتتەر رەتىندە ەكونوميكانى ىرىقتاندىرۋعا, مەملەكەتتىڭ بيزنەسكە ارالاسۋىن ازايتۋعا, مەملەكەتتىك باسقارۋ جۇيەسىنە تسيفرلىق شەشىمدەر مەن جاساندى ينتەللەكت تەحنولوگيالارىن ەنگىزۋگە باسا ءمان بەرىلدى.
بۇدان بولەك, سالىق جۇيەسىن جاڭعىرتۋ, مونوپولياعا قارسى ساياساتتى جەتىلدىرۋ, جەكەشەلەندىرۋدىڭ تيىمدىلىگىن ارتتىرۋ جانە مەملەكەتتىك ساتىپ الۋدى رەفورمالاۋ ماسەلەلەرى قوزعالدى.
قاۋىمداستىقتىڭ توراعاسى بولات اقشولاقوۆ وتاندىق بيزنەستىڭ ۇلتتىق رەيتينگىن ىسكە قوسۋ جونىندەگى ۇسىنىسىن جەتكىزدى.
مەملەكەت باسشىسى بۇل باستامالاردى قولداپ, ينۆەستيتسيالىق كليماتتى جاقسارتۋ جانە ورنىقتى ەكونوميكالىق ءوسىمدى قامتاماسىز ەتۋ تۇرعىسىنان ولاردى جۇزەگە اسىرۋ ماڭىزدى ەكەنىن اتاپ ءوتتى.