قۇرىلىسشىلارعا مەملەكەتتىك ناگرادالار تابىستالدى

پرەزيدەنت تاپسىرماسىنا سايكەس, جۇمىسشى ماماندىقتارى جىلى اياسىندا مەملەكەتتىك ناگرادالار جۇيەسىنە العاش رەت «قازاقستاننىڭ ەڭبەك سىڭىرگەن قۇرىلىسشىسى» قۇرمەتتى اتاعى ەنگىزىلدى.

«مەملەكەت باسشىسى ادامي كاپيتالدى دامىتۋعا ەرەكشە كوڭىل ءبولىپ وتىر. پرەزيدەنت جاريالاعان جۇمىسشى ماماندىقتارى جىلى ەڭبەك ادامىنىڭ بەدەلىن ارتتىرۋدى كوزدەيدى. مەملەكەت باسشىسى ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى, سىيلى بولۋى كەرەك ەكەنىن اتاپ كورسەتتى. بۇل – سىزدەردىڭ ەڭبەكتەرىڭىزدى مەملەكەتتىك دەڭگەيدە باعالاۋ مەن ناقتى  قولداۋدىڭ شىنايى كورىنىسى.

ۇكىمەت تاراپىنان الداعى ۋاقىتتا دا وتاندىق قۇرىلىس سالاسىنىڭ ينۆەستيتسيالىق تارتىمدىلىعىن ارتتىرۋعا, قاجەتتى ينفراقۇرىلىمدى دامىتۋعا جانە بيزنەس ءۇشىن قولايلى جاعدايلار جاساۋعا باسىمدىق بەرىلەدى. ءبىز جاڭا تەحنولوگيالاردى ەنگىزۋ جانە كاسىبي ستاندارتتاردى جەتىلدىرۋگە جاعداي جاساۋدى جالعاستىرامىز», دەپ اتاپ ءوتتى ولجاس بەكتەنوۆ.

ۇكىمەتتىڭ ءباسپاسوز قىزمەتى حابارلاعانداي, پرەمەر-مينيستر ەلدىڭ ەكونوميكالىق ءوسۋىن قامتاماسىز ەتۋدەگى قۇرىلىس سەكتورىنىڭ ماڭىزدىلىعىن اتاپ ءوتتى. بۇگىندە ءجىو-دەگى سالانىڭ ۇلەسى 6%-عا جەتەدى. وتكەن جىلدىڭ قورىتىندىسى بويىنشا 19 ملن م2 استام, ونىڭ ىشىندە 170 مىڭنان استام تۇرعىن ءۇي نىساندارى پايدالانۋعا بەرىلدى. وسى جىلدىڭ ءبىرىنشى جارتىجىلدىعىندا – 120-دان استام مەكتەپ پەن بالاباقشا, 30 دەنساۋلىق ساقتاۋ نىسانى سالىندى. جالپى قۇرىلىس جۇمىستارىنىڭ كولەمى 2025 جىلدىڭ باسىنان بەرى 18%-عا ءوستى.

پرەزيدەنت قويعان قۇرىلىس ۇدەرىستەرىن جاڭعىرتۋ جونىندەگى مىندەتتەردى ورىنداۋ شەڭبەرىندە تسيفرلىق شەشىمدەردى ەنگىزۋ, بيۋروكراتيالىق كەدەرگىلەردى جويۋ جانە سالانىڭ كادرلىق الەۋەتىن نىعايتۋ جونىندەگى وزەكتى تاسىلدەردى كورسەتەتىن جاڭا قۇرىلىس كودەكسى ازىرلەندى.

جيىندا ماراپاتتالعانداردىڭ اتىنان قۇرىلىس سالاسىنىڭ ارداگەر قايسار وماروۆ پەن «سAPITAL GROUP ST» جشس ينجەنەرى باۋىرجان ماحان ءسوز سويلەدى. قۇرىلىس سەكتورىنىڭ قىزمەتكەرلەرى مەملەكەت باسشىسىنا ولاردىڭ ەڭبەگىن جوعارى باعالاپ, جۇمىسشى ماماندىقتارىن دامىتۋعا كوڭىل بولگەنى ءۇشىن العىس ءبىلدىردى.

«كەلە جاتقان مەرەكە قارساڭىندا مەملەكەت باسشىسىنا «قازاقستاننىڭ ەڭبەك سىڭىرگەن قۇرىلىسشىسى» بەلگىسى قايتادان مەملەكەتتىك ناگراداعا اينالعانى ءۇشىن زور العىسىمدى بىلدىرگىم كەلەدى. بۇل بىزگە, قۇرىلىسشىلارعا دەگەن ەرەكشە قۇرمەت», دەپ اتاپ ءوتتى قۇرىلىس سالاسىنىڭ ارداگەرى قايسار وماروۆ.

«بۇگىندە قۇرىلىس سالاسىن دامىتۋ – مەملەكەت باسشىسى بەلگىلەگەن باسىمدىقتاردىڭ ءبىرى. پرەزيدەنتتىڭ قولداۋىنىڭ ارقاسىندا سوڭعى جىلدارى تۇرعىن ءۇي قۇرىلىسى, سونداي-اق وندىرىستىك جانە الەۋمەتتىك نىسانداردىڭ قۇرىلىسى قارقىندى دامىپ كەلەدى. كورسەتكىشتەردىڭ ارتىندا تەك ستاتيستيكا عانا ەمەس, ءاربىر كىرپىشكە سالىنعان وراسان زور ەڭبەك تۇر», دەپ تولىقتىردى «سAPITAL GROUP ST» جشس ينجەنەرى باۋىرجان ماحان.