كومپانيانىڭ API جۇيەسىندە جاريالانعان مالىمەتتەرگە سايكەس جاڭا مودەلدىڭ ءۇش نۇسقاسى ىسكە قوسىلادى: ستاندارتتى, mini جانە nano, دەپ جازادى Egemen.kz.
GPT‑5 Nano نۇسقاسى تەك API ارقىلى قولجەتىمدى بولادى. ول قاراپايىم جانە جىلدام جاۋاپتار قاجەت ەتەتىن قولدانۋشىلارعا ارنالعان ارزان ءارى جەڭىل شەشىم بولماق. ال ستاندارتتى GPT‑5 كوپفۋنكتسيالى جۇيە. ول ەكسپرەسس-رەجىمنەن باستاپ, تەرەڭ تالداۋ جاساۋعا دەيىنگى ءتۇرلى دەڭگەيدەگى سۇرانىستارعا بەيىمدەلە الادى. ەڭ جوعارى ونىمدىلىك رەجيمدەرى تەك Plus جانە Pro جازىلىمدارىنا قولجەتىمدى بولادى.
جاڭا GPT‑5 مودەلى قولدانۋشىنىڭ سۇرانىسىن ءوزى ساراپتاپ, جىلدام جاۋاپ بەرۋ مەن كەڭەيتىلگەن تالداۋ اراسىندا اۆتوماتتى تۇردە تاڭداۋ جاساي الادى. سونداي-اق «ۇزاعىراق ويلانىپ كورۋ» (Think Longer) فۋنكتسياسى ساقتالادى. بۇل كۇردەلى تاپسىرمالاردا ەگجەي-تەگجەيلى جاۋاپ الۋعا مۇمكىندىك بەرەدى.
OpenAI GPT‑5 مودەلىن دايىنداۋ كەزىندە Universal Verifier ءمودۋلىن قولدانعان. بۇل مودۋل جاۋاپتاردىڭ دۇرىستىعىن تەكسەرىپ, قاجەت بولعان جاعدايدا ولاردى جەتىلدىرۋگە باعىتتايدى. جۇيە تەك تەحنيكالىق سالالارمەن شەكتەلمەي, شىعارماشىلىق ماتىندەر مەن بيزنەس-تالداۋلاردا دا ساپانى ارتتىرۋعا باعىتتالعان.
GPT‑5 مۋلتيمودالدى مۇمكىندىكتەرىن كەڭەيتىپ, جاۋاپتاردىڭ دالدىگىن ارتتىرۋى جانە «گالليۋتسيناتسيا» دەڭگەيىن تومەندەتۋىمەن ەرەكشەلەنبەك.