كەرەكۋدە «اباي مۇراسى – ماڭگىلىك باعدار» اتتى ەرەكشە اۋديوجيناق جارىق كوردى. بۇل – اقىننىڭ قارا سوزدەرىن زاماناۋي فورماتتا كەڭ اۋديتورياعا قولجەتىمدى ەتۋگە باعىتتالعان مادەني باستاما.
اتالعان جوبانىڭ اۆتورى – جۋرناليستەر وداعىنىڭ مۇشەسى, «Halyq radiosy»-نىڭ ءتىلشىسى ەلدوس تولەۋباەۆ بالالىق ارمانىن ورىنداعانىنا قۋانىشتى.
– مەكتەپتە وقىپ جۇرگەندە «اباي وقۋلارىنا» قاتىسىپ, نۇرلان ونەرباەۆتىڭ ورىنداۋىنداعى قارا سوزدەرىن العاش رەت تاسپادان تىڭداپ, بولاشاقتا ءدال وسىلاي وقىپ شىعۋدى ارمان ەتتىم. اراعا 24-25 جىل سالىپ, كوپتەن كۇتكەن جوسپارىم ىسكە استى. استانا قالاسىنان جاننا قابدەشقىزى ەسىمدى كاسىپكەر دەمەۋشىلىك تانىتىپ, جوبانىڭ جارىققا شىعۋىنا زور ۇلەسىن قوستى. بۇدان بىلاي بۇل اۋديوجازبا اشىق تۇردە تاراتىلادى. ونى «Aiqara», «Halyg radiosy» سايتتارىنان تىڭداۋعا بولادى. الداعى ۋاقىتتا وبلىستىق, قالالىق دەپۋتاتتاردىڭ قولداۋىمەن قوعامدىق كولىكتەردە ابايدىڭ «قارا سوزدەرى» قويىلسا دەگەن ويىم بار, – دەيدى ەلدوس تولەۋباەۆ.
ءوڭىر تاريحىندا ءىز قالدىراتىن جوبانى قولعا العان وسكەلەڭ ۇرپاقتىڭ جاناشىرلارى باستاعان ءىستى ءارى قاراي دامىتۋدى كوزدەيدى. ءىس-شاراعا جينالعاندار بۇگىنگى جاستاردىڭ كىتاپ وقۋعا قىزىعۋشىلىعى ويانىپ, اۋديوجازباداعى تەرەڭ ويلى ناقىل سوزدەرى سانالارىنا جەتەتىنىنە سەنىپ, جىلى لەبىزدەرىن ءبىلدىردى. ءىس-شارا بارىسىندا ءوڭىرىمىزدىڭ جوعارى وقۋ ورىندارى, مادەنيەت مەكەمەلەرى مەن اقپاراتتىق ۇيىمدارىنا ۇلى ابايدىڭ قارا ءسوزى جازىلعان اۋديوجازبا تاسپاسى تابىس ەتىلدى.
پاۆلودار وبلىسى