اتىراۋدا 80 جاستاعى زەينەتكەر سەگىز بالاسى مەن ءبىر نەمەرەسىنەن اليمەنت تولەۋدى تالاپ ەتىپ, سوتقا شاعىم ءتۇسىردى, دەپ حابارلايدى Egemen.kz.
زەينەتكەر ءوز شاعىمىندا 10 جىلدان استام ۋاقىت جالعىز تۇراتىنىن كورسەتكەن. وعان ءبىر ۇلى عانا حابارلاسىپ تۇرعان. ال وزگە بالالارى مەن نەمەرەسى ەشقانداي ماتەريالدىق, مورالدىق قولداۋ كورسەتپەگەن. زەينەتكەردىڭ دەنساۋلىعى مەن ماتەريالدىق جاعدايى ناشارلاعان.
سوتتىڭ دەرەگىنە سۇيەنسەك, «نەكە (ەرلى-زايىپتىلىق) جانە وتباسى تۋرالى» كودەكستىڭ 145-بابىنىڭ 1-تارماعىنا سايكەس كامەلەتكە تولعان, ەڭبەككە قابىلەتتى بالالار كومەككە مۇقتاج ءارى ەڭبەككە جارامسىز اتا-اناسىن اسىراۋعا, ولارعا قامقورلىق جاساۋعا مىندەتتى ەكەنى كورسەتىلگەن. كودەكستىڭ 153-بابىنا سايكەس, كومەككە مۇقتاج, ەڭبەككە جارامسىز اتالار مەن اجەلەر وزدەرىنىڭ كامەلەتكە تولعان ەڭبەككە قابىلەتتى بالالارىنان نەمەسە جۇبايىنان (بۇرىنعى جۇبايىنان) اليمەنت الۋ مۇمكىن بولماعان جاعدايدا, ەڭبەككە قابىلەتتى كامەلەتكە تولعان نەمەرەلەرىنەن اليمەنت الۋدى سوت تارتىبىمەن تالاپ ەتۋگە قۇقىلى.
اتىراۋ قالالىق سوتى تاراپتاردىڭ ارقايسىسىنىڭ ماتەريالدىق جانە وتباسىلىق جاعدايىنا تالداۋ جاسادى. زەينەتكەردىڭ تالاپتارى ءىشىنارا قاناعاتتاندىرۋعا جاتادى دەگەن قورىتىندىعا كەلدى.
سوت زەينەتكەردىڭ تاماعى مەن ءدارى-دارمەگى ءۇشىن 8 بالاسىنىڭ ارقايسىسىنان جانە نەمەرەسىنەن 3 ايلىق ەسەپتىك كورسەتكىش مولشەرىندە اليمەنت ءوندىردى.سوت شەشىمى زاڭدى كۇشىنە ەنگەن جوق.