وسكەمەن قالاسىندا عازيز بايتاسوۆ اتىنداعى XX مەرەيتويلىق رەسپۋبليكالىق جاس جول ينسپەكتورلارى (ججي) ءسليوتىنىڭ سالتاناتتى اشىلۋى ءوتتى, دەپ جازادى Egemen.kz.
ىشكى ىستەر مينيسترلىگىنىڭ باستاماسىمەن وتەتىن سليوت ءوسىپ كەلە جاتقان ۇرپاقتىڭ جولدا قاۋىپسىز ءجۇرۋ مادەنيەتىن قالىپتاستىرۋ, قۇقىقتىق ساۋاتتىلىعىن ارتتىرۋ, جاۋاپكەرشىلىك پەن ازاماتتىق بورىش سەزىمىن دامىتۋدى كوزدەيدى.
بيىلعى سليوتكە ەلىمىزدىڭ 20 وڭىرىنەن كەلگەن ججي كوماندالارىمەن قاتار, قىرعىز رەسپۋبليكاسىنىڭ وكىلدەرى دە قاتىسىپ جاتىر. بىرنەشە كۇن بويى قاتىسۋشىلار جول قوزعالىسى ەرەجەلەرى بويىنشا بىلىمدەرىن, العاشقى مەديتسينالىق كومەك كورسەتۋ داعدىلارىن كورسەتىپ, بالالار مەن جاسوسپىرىمدەردىڭ قاتىسۋىمەن بولاتىن جول-كولىك وقيعالارىنىڭ الدىن الۋ بويىنشا شىعارماشىلىق جۇمىستارىن ۇسىنادى.
سالتاناتتى اشىلۋ راسىمىندە قاتىسۋشىلاردى ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى قايسار سۇلتانباەۆ قۇتتىقتادى. ول ججي قوزعالىسىنىڭ جاستاردىڭ قۇقىقتىق ساناسىن قالىپتاستىرۋداعى ماڭىزدىلىعىنا توقتالدى.
«جاس جول ينسپەكتورلارى – بۇل جاي عانا مەكتەپتىك ۇيىمدار ەمەس. بۇل قوزعالىس جاس بۋىنعا قاۋىپسىز ءجۇرىس-تۇرىس مادەنيەتىن سىڭىرەدى, زاڭ مەن تارتىپكە قۇرمەتپەن قاراۋدى قالىپتاستىرادى, جاۋاپكەرشىلىكتى ارتتىرادى. سليوتكە قاتىسۋ سىزدەرگە جاڭا ءبىلىم, جارقىن اسەر جانە سەنىمدى دوستار سىيلايتىنىنا سەنىمدىمىن», دەدى ول.
شارا بارىسىندا شىعىس قازاقستان وبلىسى اكىمىنىڭ ورىنباسارى جاقسىلىق ومار دا ءسوز سويلەپ, سليوت قاتىسۋشىلارىنا جىلى لەبىزىن ءبىلدىردى. ول ججي قوزعالىسىنا قاتىسۋشى بالالار سانىنىڭ جىل ساناپ ارتىپ كەلە جاتقانىن اتاپ ءوتتى.
«بۇل قوزعالىسقا قىزىعۋشىلىقتىڭ ارتۋى قۋانتادى. ججي — بۇل ەڭ بەلسەندى ءارى سانالى وقۋشىلاردى بىرىكتىرەتىن ۇيىم. ولار - ءبىزدىڭ بولاشاعىمىز. ءتارتىپتى, جاۋاپتى ءارى ەل تاعدىرىنا بەي-جاي قارامايتىن ۇرپاق», ج.ومار.
سالتاناتتى اشىلۋدا شىعىس قازاقستان وبلىسى پوليتسيا دەپارتامەنتىنىڭ حورى ءان شىرقاپ, ودان كەيىن ءتۇرلى بي توپتارىنىڭ ونەرى كورەرمەنگە ۇسىنىلدى. ءىس-شارا جاس جول ينسپەكتورلارىنىڭ گيمنىن ورىنداۋمەن جانە جارىستارعا رەسمي تۇردە باستاۋ بەرۋمەن اياقتالدى.
سليوت قاتىسۋشىلارى الدا ءتۇرلى بايقاۋلار, ءبىلىم مەن شەبەرلىكتەرىن سىنعا سالادى.