بيىلعى جىلى مۇگەدەكتىك توبىن بەلگىلەۋگە مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى قارقىندى جۇرگىزىلدى. ناتيجەسىندە, قاناتقاقتى جوبا اياسىندا بارلىق وڭىردەن 61,9 مىڭ ءوتىنىم قارالدى. بۇگىندە سىرتتاي فورماتتا كۋالاندىرۋ 30 نوزولوگيالىق نىسان بويىنشا ىسكە اسادى.
بىلتىر 96,9 مىڭنان استام ءوتىنىم سىرتتاي فورماتتا قارالىپ, كۋالاندىرۋدان وتكەن مۇگەدەكتىگى بار ادامداردىڭ جالپى سانىنىڭ 37,4%-ىن قامتىدى. مەملەكەت باسشىسى ەرەكشە قاجەتتىلىكتەرى بار ادامدارعا بارىنشا قولايلى جاعداي جاساۋدى تاپسىرعان-دى. ولار ينستانتسيالاردان وتۋدە قاعازباستىلىقتان ارىلۋعا ءتيىس ەكەنىن قاتاڭ ەسكەرتتى. وسى تاپسىرمانى ورىنداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن بىرلەسىپ ەلىمىزدىڭ بارلىق 20 وڭىرىندە قاناتقاقتى رەجىمدە مەديتسينالىق-الەۋمەتتىك ساراپتاما ء(ماس) جۇرگىزۋدىڭ سىرتتاي فورماتى جوباسىن ىسكە اسىرىپ جاتىر.
مۇگەدەكتىك توبىن بەلگىلەۋ جونىندەگى قىزمەتتى الۋعا ءوتىنىش بەرۋشىگە تۇرعىلىقتى جەرىندەگى ەمحاناعا جۇگىنۋ, قاجەتتى تەكسەرۋدەن ءوتۋ كەرەك, قالعان ۇدەرىستەر جۇيەلەردى ينتەگراتسيالاۋ ەسەبىنەن ونىڭ قاتىسۋىنسىز ورىندالادى.
سىرتتاي كۋالاندىرۋعا كوشۋ بىرىنشىدەن, اكىمشىلىك ءھام بيۋروكراتيالىق كەدەرگىلەردى جويادى. ەكىنشىدەن, ءماس ساراپتامالىق شەشىمدەرىنىڭ اشىقتىعىن قامتاماسىز ەتەدى. سونىمەن قاتار مۇگەدەكتىكتى بەلگىلەۋ, مۇگەدەكتىگى بار ادامداردى الەۋمەتتىك قورعاۋ شارالارىن انىقتاۋ قىزمەتتەرىن ۇيدەن شىقپاي-اق الۋعا مۇمكىندىك بەرەدى. ەڭ باستىسى, كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسى بولمايدى, سول ارقىلى سىبايلاس جەمقورلىق تاۋەكەلدەرى ازايادى.