تۇركىستان شاھارى «ابايعا قۇرمەت» اكتسياسى اياسىندا سەمەيدە جاڭادان بوي كوتەرەتىن شاعىن اۋدانعا كورمە ورتالىعىن سالىپ بەرۋدى جوسپارلاپ وتىر. باتىس پەن شىعىس, كوشەلى جانە وتىرىقشى مادەنيەتتەر تۇيىسكەن كيەلى شاھار ءدۇبىرلى تويعا كەرۋەن اكەلىپ, كەرەمەت جارمەڭكە ۇيىمداستىردى.
ابايدىڭ 180 جىلدىق مەرەيتويىنا ارنالعان ونكۇندىك ءىس-شارالار اياسىندا سەمەي قالاسىنداعى «ارەنا» مادەني-سپورتتىق كەشەنىندە تۇركىستان وبلىسىنىڭ مادەني كۇندەرى ءوتتى. مادەني كۇندەر اياسىندا اۋىل شارۋاشىلىعى ونىمدەرىنىڭ جارمەڭكەسى اشىلدى. تۇركىستان ءوڭىرىنىڭ تابيعي ءارى ساپالى ونىمدەرى نارىقتاعىدان ەداۋىر تومەن باعامەن ساۋدالاندى. جارمەڭكەگە تۇركىستان وبلىسىنان 540 توننادان اساتىن, 40-قا جۋىق ءونىم ءتۇرى جەتكىزىلىپتى. ونىڭ ىشىندە 194 توننا كارتوپ, 81 توننا باۋ-باقشا ونىمدەرى, 71 توننا جەمىس-جيدەك, 167 توننا ءسۇت ونىمدەرى, بال, شىرىن, شۇجىق, جۇمىرتقا سىندى ونىمدەر بار. اسىرەسە ءدامى ءتىل ۇيىرەتىن ءمىرزاشولدىڭ قاۋىنى مەن شاردارانىڭ قاربىزىنا سۇرانىس كوپ بولدى.
قىزىق مۇنىمەن بىتكەن جوق, تۇركىستان وبلىسىنىڭ مادەني كۇندەرى اياسىندا قولونەر شەبەرلەرىنىڭ كورمەسى دە اشىلدى. وندا اعاشتان, كيىزدەن, قىشتان جاسالعان بۇيىمدار, توقىما كىلەمدەر, زەرگەرلىك اشەكەيلەر مەن ءتۇرلى كادەسىيلار تويشىل قاۋىمنىڭ كوز جاۋىن الدى. بۇعان قوسا, باياعى جارمەڭكەنىڭ سالتىمەن كيەلى تۇركىستاننان ارنايى كەلگەن «تۇمار» ەتنو-فولكلورلىق ءانسامبلى, «فاراب» بي ءانسامبلى, «سارىن» توبى مەن ش.قالداياقوۆ اتىنداعى فيلارمونيا انشىلەرى جارمەڭكەگە جينالعان جۇرتشىلىققا كونتسەرت قويىپ, كوتەرىڭكى كوڭىل كۇي سىيلادى.
تۇركىستان وبلىسىنىڭ مادەني كۇندەرى اياسىندا ۇيىمداستىرىلعان ءىس-شاراعا وبلىس اكىمى بەرىك ءۋالي قاتىسىپ, جارمەڭكە مەن كورمەنى ارالاپ, ونەرپازداردىڭ ونەرىن تاماشالادى. اباي وبلىسىنىڭ تۇرعىندارى اتىنان تۇركىستان وبلىسىنىڭ باسشىلىعىنا, ۇيىمداستىرۋشىلارعا, بارلىق قاتىسۋشىلارعا العىسىن جەتكىزدى.
«تۇركىستان تۇركى دۇنيەسىنىڭ رۋحاني استاناسى عوي. سەمەي – الاشتىڭ العاشقى استاناسى. ەكى رۋحاني ءوڭىردىڭ باۋىرلاستىعى, ىنتىماقتاستىعى قۋانتادى. ەڭ باستىسى, مۇندا باعا قولجەتىمدى. جارمەڭكە ۇلكەن مەرەيتوي كەزىندە ۇيىمداستىرىلعانىن حالىق جاقسى قابىلداپ جاتىر. بۇل شارا شىعىس پەن وڭتۇستىكتىڭ اراسىن جالعاعان التىن كوپىر بولدى. حالىققا قاجەت وسىنداي جارمەڭكەلەردى الداعى ۋاقىتتا دا ۇيىمداستىرۋ ءۇشىن ارىپتەسىم نۇرالحان كوشەروۆكە تۇرعىنداردىڭ ءوتىنىشىن ايتىپ, قولقا سالاتىن بولامىز», دەدى وبلىس باسشىسى.
ءىس-شارا ءوتىپ جاتقان اۋماقتا ءتورت پاۆيلوننان تۇراتىن فۋدكورت ايماعى دا جۇمىس ىستەپ تۇر.
ء«بارى حالىققا ىڭعايلى جاسالعان. قالادا تۇراتىن كوپ ادامنىڭ ساياجايى جوق, ءوز ءونىمىن وسىرمەيدى. مۇنداي جارمەڭكەلەر تۇرعىندارعا اسا قاجەت. باعالار دا بازارداعىدان الدەقايدا ارزان. تۇرعىندار كوپ كەلىپ جاتىر, ءبارى ريزا. وسىنداي ءىس-شارالار ءجيى ءوتىپ تۇرسا دەگەن تىلەگىمىز بار», دەدى قالا تۇرعىنى ساعدات سىزدىقباەۆا.