«بوگاتىر كومىر» كومپانياسىندا ەر ادام بيىكتەن قۇلاپ, اۋىر جاراقات الدى. وقيعا 2 تامىز كۇنى كومىر كەنىشى اۋماعىندا بولعان, دەپ حابارلايدى Egemen.kz.
ەكىباستۇزداعى «بوگاتىر كومىر» جشس-نىڭ اۋماعىندا 1993 جىلعى قىزمەتكەر جۇمىس ۋاقىتىندا جوعارى كەرنەۋلى ەلەكتر باعاندارىندا جوندەۋ جۇرگىزۋ كەزىندە بيىكتەن قۇلاعان. زارداپ شەگۋشى وقيعا سالدارىنان اۋىر جاراقات الىپ, جەدەل جاردەممەن اۋرۋحاناعا جەتكىزىلگەن.
- جازاتايىم وقيعا 2 تامىز كۇنى تىركەلدى. زارداپ شەككەن ادام «بوگاتىر كومىردە» جابدىقتارعا قىزمەت كورسەتۋ جانە جوندەۋ بويىنشا ەلەكترشى-سلەسار بولىپ ەڭبەك ەتكەن. ءبىزدىڭ باسقارما اتالعان جازاتايىم وقيعا بويىنشا قازىر تەرگەۋ ءىس-شارالارىن باستادى. العاشقى تۇسكەن اقپاراتتار بويىنشا, ول جۇمىسىن اياقتاپ بيىكتەن ءتۇسىپ كەلە جاتقاندا قۇلاعان. مەديتسينا قىزمەتكەرلەرىنىڭ مالىمەتىنشە, ول اۋىر جاراقاتتانعان, جاعدايى اۋىر. وقيعانىڭ تولىعىراق ءمان-جايى تەرگەۋ اياقتالعان سوڭ عانا بەلگىلى بولادى. ەر ازاماتتىڭ وتباسى بار,-دەپ حابارلادى مەملەكەتتىك ەڭبەك ينسپەكتسياسى كوميتەتىنىڭ پاۆلودار وبلىسى بويىنشا دەپارتامەنتى باسشىسىنىڭ ورىنباسارى ابىلاي سابىروۆ.
وڭىرلىك پوليتسيا دەپارتامەنتىنىڭ ءباسپاسوز قىزمەتى جازاتايىم وندىرىستىك وقيعانى تىركەدى. ەڭبەك ينسپەكتسياسى جۇرگىزىپ جاتقان تەرگەۋ ءىس-شارالارىنىڭ قورىتىندىسى پوليتسياعا بەرىلەدى. ەگەر وقيعا جۇمىس بەرۋشىنىڭ كىناسىنەن بولعانى انىقتالسا, قىلمىستىق ءىس قوزعالۋى ىقتيمال.
پاۆلودار وبلىسى
ەكىباستۇز قالاسى