بيىل ادامزاتتىڭ اقىل الداسپانىنا اينالعان قازاقتىڭ ۇلى اقىنى اباي قۇنانباي ۇلىنىڭ تۋعانىنا – 180 جىل. تارباعاتايدان باستاۋ العان تورقالى توي ءدۇبىرى بۇگىندە قازاق دالاسىن شارپىپ جاتىر. وي كەمەڭگەرىنىڭ ونكۇندىگى اياسىندا استاناداعى قالامگەرلەر اللەياسىندا دا اقىننىڭ شىعارماشىلىعى شارىقتادى. سۇبەلى ءسوزدى سەرىك ەتكەن جاننىڭ جان قالتاسىنان تابىلاتىن اقىن مۇراسى بۇگىن اشىق اسپان استىندا كوپشىلىكتىڭ نازارىنا ۇسىنىلدى, دەپ جازادى Egemen.kz.
ەلوردا اكىمدىگىنىڭ «ورتالىقتاندىرىلعان كىتاپحانالار جۇيەسى» كمم ۇيىتقى بولعان شارانىڭ وتۋىنە امانات پارتياسىنىڭ «الماتى» اۋداندىق فيليالى قولداۋ كورسەتكەن. جاس پەن جاسامىس باس قوسقان جىر كەشىنە قازاقستان جازۋشىلار وداعى استانا قالالىق فيليالىنىڭ توراعاسى, اقىن باۋىرجان باباجان ۇلى, قازاق ادەبيەتىنىڭ كورنەكتى وكىلى الىبەك اسقاروۆ, اقىن ماقپال مىسا قاتىستى. قالام ۇستاعان قاۋىم اقىننىڭ ۇلت رۋحانياتىنا قوسقان ولشەۋسىز ونەگەسىنىڭ ولمەيتىنىن, كەرىسىنشە ۋاقىت وزعان سايىن قۇنى قىمباتتاي تۇسكەنى تۋرالى تۇششىمدى وي تەربەدى.
« ۇلى اباي ءار قازاقتىڭ جۇرەگىندە, رۋحىندا ۇيىندە ايتىلاتىن, اقىل بەرەتىن تۇمارىنداي بولۋ كەرەك. ال كىتاپحانالار جۇيەسى الەم تانىعان, الەمگە قازاقتى تانىتقان ابايدىڭ ناسيحاتتاۋ جولىندا تاربيە, تانىمدىق, تاريحي ساعاتپەن قاتار كىتاپ كورمەلەرىن ۇيىمداستىرىپ جاتىر. ونداعى باستى ماقسات ابايدىڭ جانىن, جۇرەگىن, ءسوزىن, ونەرىن, ولەڭىن جاس ۇرپاققا ءتۇسىندىرۋ. اقىننىڭ ونەگەسىن جادىنا توقىپ وسكەن جاس ەشقاشان جامان بولمايدى», دەدى مادەنيەت سالاسىنىڭ ۇزدىگى, كىتاپحانا ارداگەرى ساعىنىش دۇيسەنقىزى.
شىعارماشىلىق كەشتە كەمەل ادام بولۋعا ۇمتىلعان وقۋشىلار ۇلى تۇلعانىڭ كەسەك ويلارىن, كوسەمسوزدەرىن جاتقا وقىدى. ۇرپاق ۇعۋى ءتيىس ادامدىق الىپپەسىنىڭ ءار تارماعى جاستىڭ كومەيىنەن اقتارىلعانى كەشتىڭ دىتتەگەن ماقساتىنا جەتكەنىن اڭعارتسا كەرەك.
«اباي قۇنانباي ۇلىنىڭ ولەڭدەرىن مەكتەپ تاپسىرماسىنان بولەك تە وقۋدى ادەتكە اينالدىرىپ كەلەمىن. ونىڭ قاراسوزدەرىندەگى ويلار بالالاردى ەڭبەكقور بولۋعا شاقىرادى. ءجيى وقي تۇسسەك, ءبىز دە اقىلدى بالا بولىپ ەر جەتىپ, ءبىلىم الۋدىڭ ماڭىزىن تۇسىنەمىز», دەيدى 58 مەكتەپ-گيمنازيانىڭ 5-سىنىپ وقۋشىسى ايشا بايبولاتوۆا.
شارا سوڭىندا بالالار اباي سۇيگەن توعىزقۇمالاق ويىنىنان باسەكەگە ءتۇسىپ, اقىن ءانى اۋەلەپ, كۇيى كۇمبىرلەدى.