پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ساۋدا سالاسىن تسيفرلىق ترانسفورماتسيالاۋ بارىسى جانە دامۋ بولاشاعى قارالدى, دەپ حابارلايدى Egemen.kz ۇكىمەتتىڭ مالىمەتىنە سىلتەمە جاساپ.
«مەملەكەت باسشىسى ەكونوميكانىڭ بارلىق سالاسىن تسيفرلىق ترانسفورماتسيالاۋ مىندەتىن قويدى. كورىپ وتىرعانىمىزداي, ساۋدا سالاسىندا جۇيەلى جۇمىس ءجۇرىپ جاتىر. تاۋارلاردى تولىق قاداعالاۋ جانە سايكەستەندىرۋ اياسىندا ۇلتتىق كاتالوگ ەنگىزىلىپ جاتىر. بۇل تاۋارلاردى وندىرۋدەن نەمەسە اكەلۋدەن باستاپ, كوتەرمە جانە بولشەك ساۋدادا وتكىزۋگە دەيىنگى بارلىق كەزەڭدە ولاردى جىكتەۋگە نەگىز بولادى», دەپ اتاپ ءوتتى ولجاس بەكتەنوۆ.
بۇگىندە «استانا-1» جانە «ەلەكتروندىق شوت-فاكتۋرالار» اقپاراتتىق جۇيەلەرىنىڭ ينتەگراتسياسى قامتاماسىز ەتىلەدى. الايدا تاۋارلاردى تسيفرلىق قاداعالاۋدىڭ قولدانىستاعى جۇيەسى ونىمدەردىڭ شەكتەۋلى ساناتتارىن عانا قامتيدى جانە ءار جەردە بولەك-بولەك ورنالاسقان انىقتامالىقتار مەن دەرەكتەر فورماتىنا سۇيەنەدى.
«قارجى جانە ساۋدا مينيسترلىكتەرى باسقا دا مەملەكەتتىك ورگاندارمەن بىرلەسىپ, تاۋارلاردىڭ ۇلتتىق كاتالوگىن بارلىق سالادا ەنگىزۋ جۇمىستارىن كۇشەيتۋى قاجەت. بيزنەستى وسىعان بەلسەندى تۇردە اتسالىسۋعا شاقىرامىن», دەدى پرەمەر-مينيستر.