اباي قۇنانباي ۇلىنىڭ 180 جىلدىق مەرەيتويىنا ارنالعان ونكۇندىك اياسىندا تانىمال سۋرەتشى اڭساعان مۇستافانىڭ «كوڭىلگە ءتۇرلى وي سالار» اتتى اۆتورلىق كورمەسى ۇيىمداستىرىلدى.
كورمەنىڭ ماقساتى – ۇلى ويشىلدىڭ تەرەڭ تولعامدارىن بۇگىنگى ۇرپاققا كوركەم تىلمەن جەتكىزۋ. اتاۋلى ەكسپوزيتسياعا اۆتور ءبىر جارىم جىل تىڭعىلىقتى دايىندالعان ەكەن.
– ەكسپوزيتسياعا ءبىر جارىم جىل دايىندالدىم. 58 جۇمىسىمدا اقىن كوتەرگەن وزەكتى تاقىرىپتاردى بەينەلەدىم. ءار تۋىندى الدىندا ابايدىڭ قارا سوزدەرى مەن ولەڭدەرىن قايتا وقىپ, ماعىناسىنا تەرەڭ ءۇڭىلدىم, – دەدى اڭساعان مۇستافا.
كورمەدە اقىل, جۇرەك پەن قايرات تەڭدىگى, ار-وجدان, ەڭبەك, تالاپ, ماقتانشاقتىق پەن رۋحاني كەمەلدىك سەكىلدى تاقىرىپتار كوركەم وبراز ارقىلى ورىلگەن. ءاربىر تۋىندىنىڭ جانىندا اباي شىعارمالارىنان الىنعان ناقىل سوزدەر مەن ۇزىندىلەر ۇسىنىلعان.
اڭساعان مۇستافانىڭ ارت-پلاستيكا جانرىنداعى تۋىندىلارى وسى ۋاقىتقا دەيىن الەمنىڭ 30-دان استام ەلىندە وتكەن 155 كورمەگە قاتىسقان. ولاردىڭ قاتارىندا كورەيا, تۇركيا, ارگەنتينا, مەكسيكا, يتاليا, فرانتسيا, اقش, جاپونيا, يران, پولشا, ءۇندىستان, باسقا دا مەملەكەتتەر بار.
اباي وبلىسى