وتانداستىرىمىز تاكسي مەن اۋە كومپانيالارىنىڭ قىزمەت ساپاسىنا ءجيى شاعىمدانا باستادى. بيىل العاشقى جارتىجىلدىقتا كولىك مينيسترلىگىنە جانە تۇتىنۋشىلار قۇقىعىن قورعاۋ ورگاندارىنا 37 مىڭنان استام ءوتىنىش تۇسكەن. شاعىم 2021 جىلعى بۇكىل كورسەتكىشتەن ەكى ەسە كوپ. حالىقتىڭ نارازىلىعى باعاعا عانا ەمەس, ساپاعا دا قاتىستى, دەپ جازادى Egemen.kz.
وسى ماسەلەلەردى شەشۋ ءۇشىن كولىك مينيسترلىگى مەن اكىمدىكتەر تاكسي اگرەگاتورلارى مەن اۋە تاسىمالداۋشىلارىنىڭ تاريفتىك ساياساتىن قايتا قاراۋعا كىرىستى. بۇل شەشىم تۇتىنۋشىلاردىڭ قۇقىقتارىن قورعاۋ جونىندەگى ۆەدومستۆوارالىق كەڭەستىڭ وتىرىسىندا قابىلداندى.
بۇدان بولەك, تاكسي قىزمەتى مەن تۋريزم سالاسىنا ارنالعان جاڭا ساپا ستاندارتتارى ازىرلەنەتىن بولدى. مينيسترلىك وكىلدەرىنىڭ ايتۋىنشا, بۇل جاڭاشىلدىقتار نارىقتاعى ادىلەتسىز باسەكەلەستىكتى جويىپ, تۇتىنۋشىعا كورسەتىلەتىن قىزمەت ساپاسىن جاقسارتۋعا باعىتتالعان.
ايتا كەتەيىك, ترانسپورت شاعىمداردىڭ جالعىز كوزى ەمەس. قازىرگى كەزدە حالىق ونلاين ساۋداداعى الاياقتىقتارعا, تۇرعىن ءۇي-كوممۋنالدىق ماسەلەلەرگە, سونداي-اق مەديتسينالىق جانە بانك قىزمەتتەرىنىڭ ساپاسىنا دا نارازى. تۇتىنۋشىلار قۇقىقتارى سالاسىندا قوردالانعان ماسەلەلەر كەشەندى شارالاردى تالاپ ەتىپ وتىر.
بيلىك ەندى نارىقتى رەتتەۋگە باسا كوڭىل ءبولىپ, ازاماتتاردىڭ سەنىمىن قالپىنا كەلتىرۋدى كوزدەپ وتىر.