پاۆلودار وبلىسىنىڭ جەرتۇمسىق اۋىلىندا 6 جاسار بالانىڭ ۇستىنە قولدان جاسالعان فۋتبول قاقپاسى قۇلاپ, جاراقات الدى, دەپ جازادى Egemen.kz.
پوليتسيا مالىمەتىنشە, اۋىل تۇرعىندارى ءوز كۇشىمەن ورناتقان تەمىر قۇبىردان جاسالعان قاقپا ءتيىستى تۇردە بەكىتىلمەگەن. قاۋىپسىزدىك تالاپتارىنا ساي كەلمەيتىن بۇل الاڭ مەن قۇرىلعىلار ەشبىر مەملەكەتتىك بالانسقا تىركەلمەگەن.
- قاۋىپسىزدىك تالاپتارىنىڭ ساقتالماۋىنا بايلانىستى اۋدان اكىمىنىڭ اتىنا ءتيىستى نۇسقاما جولداندى. وندا قاۋىپسىز ءارى تالاپقا ساي فۋتبول الاڭىن ۇيىمداستىرۋ قاجەتتىگى كورسەتىلدى, – دەلىنگەن وبلىستىق پوليتسيا دەپارتامەنتىنىڭ حابارلاماسىندا.
زارداپ شەككەن بالا جابىق باس سۇيەك-مي جاراقاتىن الىپ, ميى شايقالعان جانە جاق سۇيەگىنەن جاراقات العان. قازىر ول پاۆلودار وبلىستىق بالالار اۋرۋحاناسىنىڭ تراۆماتولوگيا بولىمىندە ەم قابىلداپ جاتىر.
پوليتسيا بالا جاراقات العان ۋاقىتتا اتا-اناسىنىڭ تاراپىنان ءتيىستى باقىلاۋ بولماعانىن ايتىپ, ولاردى اكىمشىلىك جاۋاپكەرشىلىككە تارتقان.
- كامەلەتكە تولماعان بالانىڭ قاۋىپسىزدىگىن قامتاماسىز ەتۋ جونىندەگى مىندەتتەرىن ورىنداماعانى ءۇشىن ونىڭ زاڭدى وكىلدەرىنە ايىپپۇل سالىندى, – دەلىنگەن ۆەدومستۆو حابارلاماسىندا.