مۇمكىندىگى شەكتەۋلى جاندارعا بۇگىندە باتىس قازاقستان وبلىسىندا 1182 نىسان تولىق بەيىمدەلگەن, ال جىل سوڭىنا دەيىن تاعى 59 نىساندى بەيىمدەۋ جوسپارلانىپ وتىر, دەپ حابارلايدى Egemen.kz.
ەڭبەك جانە الەۋمەتتىك قورعاۋ مينيسترلىگىنىڭ مالىمەتىنشە بقو-داعى بەيىمدەلگەن نىسانداردىڭ جالپى سانىنان مۇگەدەكتىگى بار ادامداردىڭ بارلىق ساناتتارى ءۇشىن قولجەتىمدىلەرى:
- دەنساۋلىق ساقتاۋ وبەكتىلەرى– 105;
- ءبىلىم بەرۋ نىساندارى – 443;
- مادەنيەت نىساندارى – 58;
- مەملەكەتتىك جانە كۆازيمەملەكەتتىك ۇيىمدار – 239;
- سپورت نىساندارى – 120;
- الەۋمەتتىك قورعاۋ وبەكتىلەرى – 17;
- ساۋدا نىساندارى مەنويىن-ساۋىق ورتالىقتارى – 44;
- باسقا دا نىساندار – 156.
«مەن «اقجايىق» وڭالتۋ ورتالىعىندامىن جانە مۇندا مۇمكىندىگى شەكتەۋلى جاندارعا قاجەتتى بارلىق جاعداي جاسالعانىن اتاپ وتكىم كەلەدى, مىسالى, بۇيىرلىك جولدار, پاندۋستار, سانيتارلىق توراپتار ءبىزدىڭ قاجەتتىلىكتەرىمىزگە لايىقتالعان. مۇنداي جاعىمدى جاعداي ورال قالاسىندا عانا ەمەس, وبلىستىڭ وڭىرلەرىندە دە بايقالادى», دەيدى ءبىرىنشى توپتاعى مۇگەدەك, اتالعان قالا تۇرعىنى باۋىرجان راحمەتوۆ.
وبلىستىڭ حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتى جىل باسىنان بەرى جوسپاردان تىس باقىلاۋ شەڭبەرىندە 7 تەكسەرۋ جۇرگىزگەن. تەكسەرۋ قورىتىندىسى بويىنشا 4 نىساندا بۇزۋشىلىقتار انىقتالىپ, 943,7 مىڭ تەڭگە كولەمىندە اكىمشىلىك جاۋاپكەرشىلىككە تارتىلدى.
وبەكتىلەردىڭ مەنشىك يەلەرىنە پروفيلاكتيكالىق باقىلاۋ جۇرگىزۋ كەزىندە بۇزۋشىلىقتار العاش رەت انىقتالعان كەزدە ولاردى اكىمشىلىك جاۋاپكەرشىلىككە تارتپاي, ولاردى جويۋ تۋرالى نۇسقامالار عانا ەنگىزىلەتىنىن اتاپ ءوتۋ قاجەت. نۇسقاما بەلگىلەنگەن مەرزىمدە ورىندالماعان جاعدايدا ايىپپۇل سالىناتىن بولادى.