ولجاس بەكتەنوۆ قىزىلوردا وبلىسىنا جۇمىس ساپارى بارىسىندا پرەزيدەنتتىڭ اگرارلىق سەكتورعا سۋ ۇنەمدەۋ تەحنولوگيالارىن ەنگىزۋ جونىندەگى تاپسىرمالارىنىڭ ورىندالۋىن تەكسەردى ءارى ءوڭىردىڭ سۋ شارۋاشىلىعى ينفراقۇرىلىمىنىڭ جاي-كۇيىمەن تانىستى.
پرەمەر-مينيستر زاماناۋي سۋ ۇنەمدەۋ تەحنولوگيالارىن ىسكە قوسقان شيەلى اۋدانىنداعى «اقمايا» شارۋا قوجالىعىنىڭ ەگىس القاپتارىندا بولدى. شارۋاشىلىقتا كۇرىش, كۇزدىك بيداي جانە جوڭىشقا وسىرىلەدى, ال سۋارۋ ءۇشىن سۋدى ۇتىمدى تۇتىنۋ جۇيەلەرى قولدانىلادى. قولدانىلعان شەشىمدەردىڭ تيىمدىلىگى وسى جىلدىڭ ۆەگەتاتسيالىق كەزەڭىنىڭ مىسالىندا كورسەتىلدى.
ولجاس بەكتەنوۆ ءوڭىردىڭ نەگىزگى گيدروتەحنيكالىق نىساندارىنىڭ جۇمىسىمەن تانىستى. اتاپ ايتقاندا, سىرداريا اۋدانىندا ورنالاسقان «ايتەك» سۋ تورابىنىڭ جۇمىسىن تەكسەردى. سۋ تورابى 2004 جىلى ساراتس جوباسى اياسىندا پايدالانۋعا بەرىلگەن. «ايتەك» ارقىلى 13 مىڭ گەكتار ەگىس القابى مەن 3 319 گەكتار كول جۇيەسى, سونداي-اق 120,8 مىڭ گەكتار شابىندىق جانە جايىلىمدىق جەرلەر سۋمەن قامتاماسىز ەتىلەدى.
پرەمەر-مينيستر قىزىلوردا قالاسى, قىزىلوزەك اۋىلدىق وكرۋگىنە قاراستى 120 مىڭ گەكتاردان استام اۋماقتاعى كول جۇيەسى مەن جايىلىمدىق جەرلەردى سۋمەن قامتاماسىز ەتەتىن قاراوزەك ارناسىنا اۋەدەن شولۋ جاسادى.
قىزىلوردا سۋ تورابىن ارالاۋ بارىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن وبلىس اكىمىنىڭ ورىنباسارى باقىت جاقانوۆ وڭىردەگى سۋ شارۋاشىلىعى جاعدايى مەن قازىرگى قابىلدانىپ جاتقان شارالار تۋرالى باياندادى. قىزىلوردا سۋ تورابى 1956 جىلى پايدالانۋعا بەرىلگەن جانە 120 مىڭ گەكتار اۋماقتى سۋارۋدى قامتاماسىز ەتەدى.
ساپار بارىسىندا پرەمەر-مينيستر مەملەكەت باسشىسىنىڭ سۋ ۇنەمدەۋ تەحنولوگيالارىن قارقىندى تۇردە ەنگىزۋ جونىندەگى العا قويعان مىندەتىنە نازار اۋدارتتى. بۇل قازىرگى گيدرولوگيالىق جاعدايدا وتە وزەكتى. وسىعان بايلانىستى ۇكىمەتتىڭ باسا كوڭىل ءبولىپ وتىرعانى – اۋىل شارۋاشىلىعى وندىرۋشىلەرىن تۇراقتى سۋمەن قامتۋ, سونىڭ ىشىندە ولاردى سۋدى ءتيىمدى پايدالانۋدىڭ زاماناۋي تەحنولوگيالارىنا كەزەڭ-كەزەڭىمەن كوشىرۋ. وسى تۇرعىدا 2024 جىلى سۋ جانە يرريگاتسيا مينيسترلىگى اۋىل شارۋاشىلىعى مينيسترلىگىمەن بىرلەسىپ ينۆەستيتسيالىق سۋبسيديالاۋ جانە سۋارمالى سۋ ەرەجەلەرىنە ءتيىستى وزگەرىستەر ەنگىزگەن ەدى. سوعان سايكەس تامشىلاتىپ جانە جاڭبىرلاتىپ سۋارۋدى ەنگىزگەن شارۋاشىلىقتارمەن سۋدى پايدالانۋعا ارنالعان كەلىسىمشارتتار باسىمدىق بەرۋ تارتىبىمەن جاسالادى. قالعاندارى قالدىق سۋ كولەمى جانە سۋدى ۇنەمدەيتىن شەشىمدەرگە كوشۋ مىندەتتەمەسى بولعان جاعدايدا عانا سۋ رەسۋرستارىن الا الادى.
ەگىستىك قۇرىلىمىن ءارتاراپتاندىرۋ جۇمىستارى جۇيەلى جۇرگىزىلۋدە. اوك-ءتى دامىتۋدىڭ 2030 جىلعا دەيىنگى تۇجىرىمداماسىنا سايكەس ىلعالسۇيگىش داقىلداردىڭ القاپتارىن قىسقارتۋ كوزدەلىپ وتىر. اتاپ ايتقاندا, كۇرىش پەن ماقتا القابى 41 مىڭ گەكتارعا, ونىڭ ىشىندە كۇرىش القابى 10 مىڭ گەكتارعا ازايتىلماق. سونىمەن قاتار جۇگەرى مەن جەمشوپ داقىلدارىنىڭ ءوندىرىسى كەڭەيىپ, اۋىل شارۋاشىلىعى ونىمدەرىن تەرەڭ وڭدەۋ سالاسى دامۋدا. بۇل شارالار سۋارمالى جەرلەردەگى سۋ تۇتىنۋدىڭ ۇلەسىن كەم دەگەندە 20%-عا تومەندەتۋگە باعىتتالعان. وڭىردە سۋ بالانسىنىڭ تۇراقتىلىعىن قامتاماسىز ەتۋ ءۇشىن مەليوراتسيا بويىنشا شارالار ەنگىزىلۋدە. ماسەلەن, تۇركىستان جانە قىزىلوردا وبلىستارىندا 118 تىك درەناج جۇيەسى جانە 243 سورعى اگرەگاتى ىسكە قوسىلدى. كوللەكتورلىق-درەناجدى سۋدى قايتا پايدالانۋ جۇزەگە اسىرىلادى جانە كەزەكتەستىرە ءارى تۇنگى سۋارۋ جۇيەسى تاجىريبەدەن ءوتىپ جاتىر.
ساپار قورىتىندىسى بويىنشا ولجاس بەكتەنوۆ سۋدى ءتيىمدى پايدالانۋ تاجىريبەسىن كەڭەيتۋ جانە شارۋالاردى سۋارۋدىڭ زاماناۋي ادىستەرىنە كوشۋگە ىنتالاندىرۋ قاجەتتىگىن اتاپ ءوتتى. جالپى العاندا, ۇكىمەت بۇل باعىتتاعى جۇمىستى وڭىرلەرمەن, جاۋاپتى مينيسترلىكتەرمەن جانە سۋ پايدالانۋشىلارمەن ۇيلەستىرە وتىرىپ جالعاستىرادى.