بۇگىن الماتى قالالىق ادىلەت دەپارتامەنتى 2025 جىلدىڭ العاشقى جارتىجىلدىعىندا جۇرگىزىلگەن باقىلاۋ, قاداعالاۋ جۇمىستارىنىڭ قورىتىندىسىن جاريالادى. تەكسەرۋ بارىسىندا نوتاريۋس, ادۆوكات, قۇقىقتىق كەڭەس بەرۋشىلەر مەن اسىرەسە, حالىققا قىزمەت كورسەتۋ ورتالىقتارى ۇسىناتىن مەملەكەتتىك قىزمەتتەردىڭ ساپاسى باستى نازاردا بولعان. ال ستاتيستيكا باقىلاۋدىڭ كۇشەيىپ, ازاماتتاردىڭ شاعىمدارى دا بەلسەندى تۇردە قارالىپ, زاڭدى بەلدەن باسۋدىڭ جولى كەسىلە باستاعانىن كورسەتەدى. وڭىرلىك كوممۋنيكاتسيالار قىزمەتىندە الماتى قالالىق ادىلەت دەپارتامەنتىنىڭ باسشىسى بالايىم كەسەباەۆا وسىلاي دەدى, دەپ حابارلايدى Egemen.kz.
الماتىدا قازىر 964 نوتاريۋس جۇمىس ىستەيدى. الايدا ولاردىڭ ءبارى بىردەي زاڭدى ساقتاي بەرمەيدى. ماسەلەن, بيىلعى جىلدىڭ التى ايىندا نوتاريۋستاردىڭ ارەكەتىنە قاتىستى 419 شاعىم تۇسكەن. ونىڭ 27-ءسى راستالعان. 4 نوتاريۋستىڭ ليتسەنزياسى توقتاتىلىپ, تاعى 8 ادام تارتىپتىك جاۋاپكەرشىلىككە تارتىلعان. ليتسەنزيادان ايىرۋ تۋرالى ءىس قوزعالىپ, نوتاريۋستاردىڭ ءوز ءوتىنىشى بويىنشا ليتسەنزياسىن توقتاتقان. ال ءبىر نوتاريۋس سوتتىڭ شەشىمىمەن ليتسەنزياسىنان ايىرىلعانىمەن, بۇل شەشىم ءالى كۇشىنە مىنگەن جوق.سونىمەن قاتار, نوتاريۋستاردىڭ 23-ىنە نوتاريالدىق قىزمەتتەردى ورىنداۋ بارىسىندا زاڭ بۇزعانى ءۇشىن اكىمشىلىك ءىس قوزعالدى. بىلتىر مۇنداي ءىستىڭ سانى 18 بولعان.الماتىدا ادۆوكاتتار سانى سول كۇيى 1100 ادام بولىپ قالدى. ولارعا بار بولعانى 11-اق شاعىم تۇسكەنىمەن, بىرەۋىنە تارتىپتىك جازا قولدانىلدى. جەكە سوت شەشىمى بويىنشا تاعى ءبىر ادۆوكات ايىپتالىپ, سوگىس الدى, ءبىر ءىس زاڭ بۇزباعانىنا بايلانىستى توقتاتىلدى. سوت شەشىمىمەن ءۇش ادۆوكات ليتسەنزياسىنان ايىرىلىپ, تاعى ەكى ادۆوكات باسقاداي سەبەپتەرمەن قىزمەتىن توقتاتتى.
قۇقىقتىق كەڭەستەرگە قاتىستى 75 شاعىم ءتۇسىپ, ونىڭ 3-ءى عانا راستالدى. ەسكەرتۋ, سوگىس بەرىلىپ, ءبىر كەڭەسشى پالاتادان شىعارىلدى. جەكە سوت شەشىمى بويىنشا تاعى ءۇش زاڭ كەڭەسشىسى جاۋاپكەرشىلىككە تارتىلىپ, بىرەۋى ۇيىمنىڭ مۇشەلىگىنەن شىعارىلدى.باقىلاۋ جۇمىستارى حالىققا قىزمەت كورسەتۋ ورتالىقتارىنىڭ قىزمەتىن دە قامتىپ وتىر. الماتىدا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فيليالدارىنا بىرنەشە جوسپارلى جانە جوسپاردان تىس تەكسەرۋ جۇرگىزدى. ونىڭ بىرەۋى جىلجىمايتىن م ۇلىك تىركەۋ سالاسىنا قاتىستى بولىپ, 106 زاڭ بۇزۋ انىقتالدى. ماتەريالدار تىركەۋ ورگانىنا جىبەرىلىپ, كەمشىلىكتەردى جويىپ, بولاشاقتا مۇنداي جاعدايدىڭ قايتالانباۋىن قامتاماسىز ەتۋ تالاپ ەتىلدى. ازاماتتىق جاعداي اكتىلەرىن تىركەۋ بويىنشا دا وسىنداي تەكسەرۋ جۇرگىزىلدى. بۇل سالادا بۇزۋشىلىق از, بار بولعانى بەسەۋ.
جالپى العاندا, باقىلاۋ ورگاندارى قۇقىقتىق قىزمەتتەردىڭ ساپاسى مەن تىركەۋ راسىمدەرىن باقىلاۋدى كۇشەيتىپ كەلەدى. ءاربىر زاڭ بۇزۋشىلىققا ەسكەرتۋ مەن سوگىستەن بەرۋدەن باستاپ ليتسەنزيادان ايىرۋعا دەيىنگى شارا قولدانىلادى. بۇل زاڭگەرلەرگە عانا ەمەس, قۇقىق سالاسىندا جۇمىس ىستەيتىن بارلىق ماماندارعا ەسكەرتۋ بولىپ وتىر.