حالىقارالىق ۆاليۋتا قورى قازاقستان ەكونوميكاسىنا قاتىستى بولجامىن جاقسارتىپ وتىر. جاڭا دەرەكتەرگە سايكەس, 2025 جىلى ەلدىڭ جالپى ىشكى ءونىمى 5%-عا وسەدى. بۇعان دەيىنگى شىلدە الدىنداعى بولجام 4,9% ەدى – ەندى ءسال دە بولسا جوعارى كورسەتكىش تىركەلدى, دەپ حابارلايدى Egemen.kz.
2026 جىلعا كەلسەك, ازىرگە ەش وزگەرىس جوق – ءوسىم 4,3% دەڭگەيىندە ساقتالادى.
حۆق تەك قازاقستان عانا ەمەس, الەمنىڭ الپاۋىت ەكونوميكالارى اقش, قىتاي, ەۋروپالىق وداق ەلدەرى بويىنشا دا كورسەتكىشتەردى قايتا قاراپ, ءبىرشاما جاقسارعان بولجامدار جاريالادى.
مۇناي باعاسىنا كەلەر بولساق, قور 2025 جىلى باررەل قۇنى ورتا ەسەپپەن 68,18 دوللار بولادى دەپ وتىر. ال 2026 جىلى 64,33 دوللارعا دەيىن تومەندەۋى مۇمكىن. بۇل ءساۋىر ايىنداعى 66,94 جانە 62,38 دوللارلىق بولجامدارمەن سالىستىرعاندا ءسال جوعارى. ايتپاقشى, بيىلعى ورتاشا باعا 79,17 دوللار شاماسىندا.
باعانىڭ كوتەرىلۋىنە نە سەبەپ؟ حۆق بۇل جاعدايدى يران مەن يزرايل اراسىنداعى شيەلەنىسپەن بايلانىستىرادى. بىراق سوعان قاراماستان, مۇناي جەتكىزۋ كولەمى ازايماعان.
«وپەك+ جانە باسقا وندىرۋشىلەردەن كەلىپ جاتقان مۇناي ۇسىنىسى سۇرانىستان اسىپ ءتۇسىپ وتىر», دەيدى حۆق ساراپشىلارى.
ەل ىشىندەگى جاعدايعا كەلسەك, قازاقستان ەكونوميكاسى بيىلعى ءبىرىنشى جارتىجىلدىقتا 6,2% ءوسىم كورسەتكەن. ۇلتتىق بانك بۇعان ىشكى سۇرانىستىڭ ارتۋى مەن ينۆەستيتسيالىق بەلسەندىلىكتىڭ جاندانۋىن سەبەپ قىلىپ وتىر. سوندىقتان دا بيىلعى جالپى ءوسىم 5–6% ارالىعىندا بولادى دەگەن بولجام جاسالعان.
«ەكونوميكانىڭ ناقتى سەكتورىندا ايتارلىقتاي سەرپىن بايقالادى. بۇل حالىقتىڭ سەنىمى مەن بيزنەس بەلسەندىلىگىنىڭ ارتقانىن بىلدىرەدى», دەپ اتاپ ءوتتى ۇلتتىق بانك.