ەلوردادا «تۇنگى قالاداعى بالالار» اتتى جەدەل-پروفيلاكتيكالىق ءىس-شارا ءوتىپ جاتىر. شىلدەنىڭ 27-ىنەن بەرى بايقوڭىر اۋدانى پب جپقب يۋۆەنالدىق پوليتسيا قىزمەتكەرلەرى تۇنگى ۋاقىتتا كوشەدە جۇرگەن 40-قا جۋىق ءجاسوسپىرىمدى انىقتادى, دەپ جازادى Egemen.kz.
جالپى زاڭ بويىنشا كامەلەتكە تولماعان بالالارعا تۇنگى ساعات 22:00-دەن كەيىن كومپيۋتەرلىك كلۋبتاردا, ويىن-ساۋىق ورىندارىندا جانە 23:00-دەن كەيىن كوشەدە اتا-اناسىز جۇرۋگە تىيىم سالىنعان. وسىنى نەگىزگە الا ءتارتىپ ساقشىلارى رەسپۋبليكا كولەمىندە «تۇنگى قالاداعى بالالار» اتتى ءىس-شارانى ءجيى ۇيىمداستىرادى. مۇنداعى ماقسات – جاسوسپىرىمدەر اراسىنداعى قۇقىقبۇزۋشىلىق پەن ولارعا قاتىستى قىلمىستىڭ الدىن الۋ.
كەشەندى ءىس-شارا اياسىندا ەلوردالىق پوليتسەيلەر 27-29 شىلدە ارالىعىندا ويىن-ساۋىق ورىندارى, ساۋدا ورتالىقتارى مەن كوشەلەردى ارالاپ, پروبلەمالىق مەكەنجايلاردى تەكسەردى. ناتيجەسىندە تۇنگى ۋاقىتتا زاڭدى وكىلدەرىنىڭ قاداعالاۋىنسىز ۇيلەرىنەن تىس جەردە جۇرگەن جاسوسپىرىمدەردىڭ اتا-انالارىنا اكىمشىلىك شارا قولدانىلدى. سونداي-اق تۇرمىسى ناشار ەكى وتباسى انىقتالىپ, پروفيلاكتيكالىق ەسەپكە الىنىپتى.
ونىڭ ءبىرى – بايقوڭىر اۋدانى اۋماعىندا ورنالاسقان جاتاقحانانىڭ بىرىندە بولمە جالداپ تۇراتىن ازامات ن.ا.. ول وسى ۋاقىتقا دەيىن ىشىمدىككە سالىنىپ, ءوزىنىڭ كامەلەتكە تولماعان بەس بالاسىنىڭ تاربيەسىمەن تولىققاندى اينالىسپاعان. پوليتسەيلەر جاسوسپىرىمدەردى استانا قالالىق «ارناۋلى الەۋمەتتىك قىزمەتتەرگە مۇقتاج بالالاردى قولداۋ ورتالىعى» كوممۋنالدىق مەملەكەتتىك مەكەمەسىنە ورنالاستىرعان. ءارى قاراي وتباسى تۋرالى ماتەريالدى بايقوڭىر اۋدانى اكىمدىگى جانىنداعى كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ كەلەسى وتىرىسىنا قاراۋعا ازىرلەۋدە.
سونىمەن قاتار يۋۆەنالدىق پوليتسيا ءبولىمى ەكى ءجاسوسپىرىمدى جەكە پروفيلاكتيكالىق جۇمىس جۇرگىزۋ ماقساتىندا ءوز باقىلاۋىنا العان.