كولونياداعى كامەرالاردى ءبۇلدىرۋ – ەندى قىلمىس

بۇل جاڭا نورما قىلمىستىق-اتقارۋ جۇيەسى مەكەمەلەرىندەگى بەينەباقىلاۋ كامەرالارىن ادەيى بۇلدىرگەنى نەمەسە ىستەن شىعارعانى ءۇشىن قىلمىستىق جاۋاپكەرشىلىك قاراستىرادى.

اتالعان وزگەرىس ەلىمىزدەگى تۇزەۋ مەكەمەلەرىنە تاۋلىك بويى بەينەباقىلاۋ جۇيەسىنىڭ كەڭىنەن ەنگىزىلۋىمەن جانە وسى كامەرالاردى قاساقانا زاقىمداۋ جاعدايلارىنىڭ جيىلەپ كەتۋىمەن تىكەلەي بايلانىستى. بەينەباقىلاۋ جۇيەسى مەكەمەلەردەگى احۋالدى تولىقتاي قامتىپ, سوتتالعاندار مەن قىلمىستىق-اتقارۋ جۇيەسى قىزمەتكەرلەرىنىڭ ارەكەتتەرىنىڭ اشىقتىعىن قامتاماسىز ەتەدى.

جاڭا باپ كۇشىنە ەنگەن العاشقى جىلدىڭ وزىندە-اق 70-تەن استام قىلمىستىق ءىس تىركەلدى. سونىڭ ىشىندە 35 سوتتالعانعا قوسىمشا جازا مەرزىمى بەلگىلەنىپ, ولار كەلتىرىلگەن ماتەريالدىق شىعىندى ازاماتتىق تارتىپپەن وتەۋگە مىندەتتەلدى.

مىسالى, شىمكەنت قالاسىنداعى №55 مەكەمەسىندە 13 سوتتالعان ادام بەينەباقىلاۋ جۇيەسىن ادەيى ىستەن شىعارعانى ءۇشىن ارقايسىسى 6 جىلدان قوسىمشا مەرزىمگە سوتتالدى.

بۇگىندە قازاقستان بويىنشا 78 تۇزەۋ مەكەمەسىندە 43 مىڭنان استام بەينەباقىلاۋ كامەراسى جۇمىس ىستەيدى. بۇل جۇيەلەردىڭ كورسەتىلىمدەرى ناقتى ۋاقىت رەجيمىندە قىلمىستىق-اتقارۋ جۇيەسى كوميتەتىنە, ىشكى ىستەر مينيسترلىگىنە جانە پروكۋراتۋرا ورگاندارىنا جولدانادى. مۇنداي تاجىريبە:

- ادام قۇقىقتارىنىڭ ساقتالۋىن باقىلاۋعا,

- قۇقىق بۇزۋشىلىقتاردى جەدەل انىقتاۋعا,

- سوتتالعاندار مەن مەكەمە قىزمەتكەرلەرى اراسىندا ءتارتىپتى ارتتىرۋعا مۇمكىندىك بەرەدى.

قاج كوميتەتىنىڭ مالىمەتىنشە, 428-1-باپ بويىنشا قۇقىقبۇزۋشىلىقتار سانى ازايا باستاعان. بۇل وزگەرىس بەينەباقىلاۋ جۇيەسىنىڭ تيىمدىلىگىن عانا كورسەتىپ قويماي, قىمبات قۇرال-جابدىقتاردىڭ ساقتالۋىنا جانە مەملەكەتتىك بيۋدجەت قاراجاتىن ۇنەمدەۋگە دە وڭ اسەرىن تيگىزۋدە.