ۋكراينا بەيبىت كەلىسىمگە كەلۋ ءۇشىن جاڭا كەلىسسوزدەر جۇرگىزۋدى ۇسىندى. بۇل تۋرالى ەل پرەزيدەنتى ۆلاديمير زەلەنسكي ءوزىنىڭ كەشكى ۇندەۋىندە مالىمدەدى, دەپ جازادى Egemen.kz.
ونىڭ سوزىنشە, ۋكراينا قاۋىپسىزدىك كەڭەسىنىڭ جوعارى لاۋازىمدى وكىلى رۇستەم ۋمەروۆ الداعى اپتادا رەسەي وكىلدەرىمەن كەزدەسۋگە دايىن. بۇل باستاما سوعىستى توقتاتۋعا باعىتتالعان جاڭا قادام رەتىندە قاراستىرىلىپ وتىر.
«سوعىستى توقتاتۋعا, اتىستى دوعارۋ ءۇشىن بارلىق مۇمكىندىكتى پايدالانۋىمىز كەرەك. قانشا قيىن بولسا دا, بەيبىت كەلىسىمگە قول جەتكىزۋگە تىرىسۋ – ءبىزدىڭ مىندەتىمىز», دەدى زەلەنسكي.
پرەزيدەنت سونىمەن قاتار رەسەي كوشباسشىسى ۆلاديمير پۋتينمەن بەتپە-بەت كەزدەسۋ وتكىزۋگە دە دايىن ەكەنىن مالىمدەدى.
بۇل ۇسىنىس رەسەي ۋكرايناعا كەزەكتى اۋە سوققىسىن جاساعان ءتۇنى جاريالاندى. زەلەنسكيدىڭ ايتۋىنشا, جۇما مەن سەنبىگە قاراعان ءتۇنى رەسەيدىڭ كەڭ كولەمدەگى شابۋىلى ەلدىڭ كەمىندە ون وڭىرىندە تىركەلگەن. شابۋىل كەزىندە كەمىندە ءۇش بەيبىت تۇرعىن قازا تاپقان.
ۋكراينا قارۋلى كۇشتەرىنىڭ مالىمەتىنشە, شابۋىل بارىسىندا رەسەي 340-تان استام جارىلعىش جانە جالعان درونداردى, سونداي-اق 35 قاناتتى جانە بالليستيكالىق زىمىرانداردى قولدانعان. ولاردىڭ كوپشىلىگى اۋەدە جويىلعانىمەن, شابۋىلدىڭ سالدارى اۋىر بولعان.
ال وسى اپتانىڭ باسىندا اقش-تىڭ بۇرىنعى پرەزيدەنتى دونالد ترامپ ۋكرايناعا ناتو ەلدەرى ارقىلى «ەڭ وزىق قارۋ-جاراق» جىبەرىلەتىنىن مالىمدەدى. سونىمەن قاتار, ول رەسەيمەن سوعىستى 50 كۇن ىشىندە توقتاتپاعان جاعدايدا, ماسكەۋدىڭ ساۋدا سەرىكتەستەرىنە 100 پايىزدىق قوسىمشا تاريف ەنگىزەتىنىن ەسكەرتتى.
ەسكە سالايىق, ماسكەۋ مەن كيەۆ اراسىنداعى بۇعان دەيىنگى كەلىسسوزدەردىڭ ەكى كەزەڭى تۇركيادا, ىستامبۇل قالاسىندا وتكەن بولاتىن. الايدا ولاردان ناقتى ناتيجەلەر شىقپادى. سوعان قاراماستان, تاراپتار تۇتقىندارمەن الماسۋ جانە قازا تاپقان جاۋىنگەرلەردىڭ مايىتتەرىن قايتارۋ تۋرالى كەلىسىمگە كەلگەن.
زەلەنسكي ماسكەۋدى «كەلىسسوزدەردى ادەيى ناتيجەسىز ەتۋگە تىرىسىپ جاتىر» دەپ ايىپتاپ وتىر.