سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ تۇركىستان وبلىسىنا جۇمىس ساپارىمەن بارىپ, جەرگىلىكتى ديقانداردى سۋارمالى سۋمەن قامتاماسىز ەتۋ جۇمىستارىنىڭ بارىسىمەن تانىستى. مينيستر قازاقستان مەن وزبەكستان اراسىنداعى ترانسشەكارالىق سۋدى بولەتىن «دوستىق» مەملەكەتارالىق كانالىنا باردى, سۋ – ەلىمىزگە بۇرىن قول جەتكىزىلگەن حالىقارالىق كەلىسىمدەرگە سايكەس جەتكىزىلىپ, جەتىساي, ماقتاارال اۋداندارىنداعى ەگىس الاڭدارىن سۋارۋعا پايدالانىلادى, دەپ حابارلايدى Egemen.kz.
بۇگىندە «قازسۋشاردىڭ» تۇركىستانداعى فيليالى ماقتاارال اۋدانىنىڭ شارۋالارىمەن سۋارمالى سۋ بەرۋگە 3 223 كەلىسىمشارت جاساسقان, ال جەتىساي اۋدانى بويىنشا 1 492 كەلىسىمشارت جاسالعان. قازىرگى ۋاقىتتا جەتىسايدا سۋارمالى جەر كولەمى – 47 332 گا, ماقتاارالدا – 27 255 گا.
ودان كەيىن مينيستر «ماشينالىق ادىسپەن سۋ كوتەرۋ كانالىنىڭ» جۇمىسىمەن تانىستى. «قازسۋشاردىڭ» تۇركىستانداعى فيليالى نىساندى مەحانيكالىق جولمەن تازالاۋدى اياقتاپ قالدى.
«كەلىسىمشارت جاساعان سۋ پايدالانۋشىلارمەن مىندەتتەمەلەردى ورىنداۋ ءۇشىن كانالدار بويىنشا كەزەكپەن سۋ بەرۋ جۇرگىزىلەدى, ال مينيسترلىكتىڭ جۇمىس توبى مەن ارال-سىرداريا باسسەيندىك ينسپەكتسياسى سۋ پايدالانۋدىڭ زاڭدىلىعىن قاتاڭ باقىلاۋدا ۇستايدى. سونداي-اق سۋدى كەلىسىمشارتسىز تۇتىنعاندارعا جانە سۋ جەتكىزۋشىنىڭ كەلىسىمىنسىز وسىرىلەتىن داقىلداردىڭ ءتۇرىن وزگەرتكەندەرگە ايىپپۇل قاراستىرىلعان. بىراق ديقاندار دا سۋ ۇنەمدەۋ تەحنولوگيالارىنا كوشىپ, ىلعالدى كوپ قاجەت ەتەتىن داقىلداردى ەگۋدى ازايتۋ ارقىلى سۋ رەسۋرستارىن ۇنەمدەۋگە ءوز ۇلەستەرىن قوسۋى كەرەك. مەملەكەت بۇل ءۇشىن سۋبسيديالار تۇرىندە بارلىق قاجەتتى جاعدايدى جاسادى», دەدى مينيستر ن.نۇرجىگىتوۆ.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە بيىل تۇركىستان وبلىسىندا كۇرىش ەگۋ جوسپارى 3,3 ەسەدەن اسىپ كەتكەن. سۋارمالى سۋ تاپشىلىعى قاۋپىنە جانە 4000 گا شەكتى كولەمگە قاراماستان, «قازسۋشاردىڭ» جەرگىلىكتى فيليالى ديقاندارمەن 13 258 گا كۇرىش القاپتارىن سۋارۋعا 1 047 كەلىسىمشارت جاساسقان. وسىعان بايلانىستى فيليالدىڭ بىرقاتار باسشىسىنا قاتاڭ سوگىس بەرىلدى.
بۇعان دەيىن سالا مينيسترلىگى ەلىمىزدىڭ وڭتۇستىگىندە سۋارۋ كەزەڭىنىڭ تۇراقتى ءوتۋىن قامتاماسىز ەتۋ ءۇشىن ارنايى جۇمىس توپتارىن قۇرعان بولاتىن. بۇل توپتار جەرگىلىكتى اتقارۋشى ورگاندارمەن بىرلەسىپ تاۋلىك بويى كەزەكشىلىك جۇرگىزەدى. اتالعان وبلىستاعى ۆەگەتاتسيالىق كەزەڭ مينيسترلىكتىڭ باقىلاۋىندا تۇر.