ۇكىمەتتە پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ينۆەستيتسيالار تارتۋ جونىندەگى كەڭەستىڭ وتىرىسى ءوتتى. ونىڭ بارىسىندا سونداي-اق اگروونەركاسىپتىك كەشەندەگى ينۆەستيتسيالىق جوبالاردى جۇزەگە اسىرۋ ماسەلەلەرى دە قارالدى.
ماسەلەن, اگروونەركاسىپتىك سەكتورداعى ەكى جوبا بويىنشا ينۆەستيتسيالار تۋرالى كەلىسىمدەردىڭ نەگىزگى شارتتارى ماقۇلداندى. ءبىرىنشى جوبادا «Tiryaki Agro» تۇرىك كومپانياسىنىڭ قاتىسۋىمەن استىقتى تەرەڭ وڭدەۋ كەشەنىنىڭ قۇرىلىسى قاراستىرىلعان. ونىڭ جوسپارلانعان وندىرىستىك قۋاتى جىلىنا 250 مىڭ توننا وڭدەلگەن بيداي مەن 80 مىڭ توننا بۇرشاقتى قۇرايدى. ينۆەستيتسيالاردىڭ جالپى كولەمى – شامامەن 160 ملرد تەڭگە.
جيىندا ەكىنشى جوبانىڭ دا شارتتارى بەكىتىلدى, ول – كەلەسى ءبىر تۇرىك كومپانياسى «YDA Group»-تىڭ قاتىسۋىمەن تىڭايتقىشتار مەن پەستيتسيدتەر وندىرەتىن اگروحيميالىق كەشەن سالۋ. ءوندىرىس قۋاتى – جىلىنا 150 مىڭ توننا, ينۆەستيتسيا كولەمى – 168 ملرد تەڭگە.
ەكى جوبا دا اۋىل شارۋاشىلىعى شيكىزاتىن تەرەڭ وڭدەۋدى دامىتۋعا, ازىق-ت ۇلىك قاۋىپسىزدىگى دەڭگەيىن ارتتىرۋعا, يمپورتتى الماستىرۋعا جانە قوسىلعان قۇنى جوعارى ءونىم اسسورتيمەنتىن كەڭەيتۋگە باعىتتالعان.
قازاقستاندا استىق دايىنداۋدىڭ جىل سايىنعى كولەمى 16-17 ملن توننا دەڭگەيىندە ەكەنىن جانە ۇشتەن ءبىر بولىگى ەكسپورتقا كەتەتىنىن ەسكەرە وتىرىپ قولعا الىنعان ءونىمنىڭ 260 ءتۇرىن قامتيتىن ىشكى وڭدەۋدى دامىتۋ باستاماسى ەكونوميكانى ءارتاراپتاندىرۋ جانە اگروونەركاسىپتىك كەشەننىڭ ورنىقتى دامۋى ءۇشىن قوسىمشا مۇمكىندىكتەر اشادى.
سونىمەن قاتار ينۆەستيتسيالىق شتاب قولايلى ينۆەستيتسيالىق احۋالدى قالىپتاستىرۋ بويىنشا جۇيەلى جۇمىستاردى دا جالعاستىرۋدا. باستى نازار نورماتيۆتىك بازانى جەتىلدىرۋگە, اكىمشىلىك كەدەرگىلەردى ازايتۋعا جانە ەكونوميكانىڭ باسىم سالالارىندا ينۆەستيتسيالىق باستامالاردى ىسكە اسىرۋ ءۇشىن تۇراقتى جاعدايلار قالىپتاستىرۋعا سالىنعان.