نەيروحيرۋرگيانىڭ وركەندى ءورىسى

مەرەيتويلىق فورۋمعا اقش, ەۋروپا, ازيا, تمد ەلدەرى, تاياۋ شىعىستاعى جە­تەكشى نەيروحيرۋرگتەردى قوسا العاندا, 20 ەلدەن 400-دەن استام دەلەگات قاتىستى. ەكى كۇنگە ۇلاسقان كونگرەسس نەيروحيرۋرگيا سالاسىنداعى تانىمال كوشباسشى, ۋولتەر دەندي قاۋىمداستىعىنىڭ نەگى­زىن قالاۋشى, حالىقارالىق كلينيكالىق ستاندارتتارعا اينالعان كوپتەگەن عىلى­مي جۇمىستاردىڭ اۆتورى, قاۋىمداس­تىق­تىڭ جاھاندىق پرەزيدەنتى, پروفەسسور ساليم ابدۋلراۋفتىڭ جەتەكشىلىگى­مەن ءوتتى. كەلەلى كەڭەس بارىسىندا ميدىڭ قيلى قاتپارىنداعى كەسەلدەردى زاما­ناۋي تەحنولوگيانىڭ يگىلىگىمەن سىلىپ تاس­تاپ جۇرگەن ايتۋلى ماماندار تاجىري­بەلەرىمەن ءبولىستى.

Walter E. Dandy قاۋىمداستىعى 2011 جىلى اقش-تا زاماناۋي نەيرو­حيرۋرگيانىڭ نەگىزىن قالاۋشىلاردىڭ ءبىرى – دوكتور ۋولتەر ەدۆارد دەنديدىڭ قۇرمەتىنە قۇرىلدى. ۇيىم قۇرىلعان ساتتەن باستاپ بۇكىل الەمدە وزىق تاجى­ريبەنى ناسيحاتتاۋعا, عىلىمي بىلىممەن الماسۋعا, نەيروحيرۋرگيالىق كومەك دەڭ­گەيىن ارتتىرۋعا باعىت ۇستادى.

ءىس-شارانىڭ ەكى كۇندىك باعدارلاما­سىندا 40-تان استام عىلىمي باياندامالار, دوڭگەلەك ۇستەلدەر, پىكىرتالاستار مەن شەبەرلىك ساعاتى ۇيىمداستىرىل­دى. ەڭ وزەكتى ماسەلەلەر تالقىلا­نىپ, يننوۆاتسيالىق نەيروحيرۋرگيالىق تاسىلدەر, نەيروحيرۋرگيادا جوعارى تەحنولوگيالاردى قولدانۋ, كۇردەلى ونكو­لوگيالىق پاتولوگيالاردى ەمدەۋ, سونداي-اق فۋنكتسيونالدىق, بالالار نەيروحيرۋرگياسىنداعى جاڭا باعىتتار توڭىرەگىندە تىڭ يدەيالار ايتىلدى.

«استانادا كونگرەسس وتكىزۋ – الەمدىك ارەنادا ەلىمىزدىڭ نەيروحيرۋرگيا سالا­سىنىڭ مويىندالۋى. جىل سايىن ءبىزدىڭ ورتالىقتا 5 مىڭنان استام وپەراتسيا جاسالادى. ورتالىق سونىمەن قاتار عىلىمي قىزمەتپەن بەلسەندى اينالىسادى. قازىرگى ۋاقىتتا ۇلتتىق نەيروحيرۋرگيا ورتالىعى ازىرلەگەن ءادىستى: ومىرتقا دەنەلەرىن اۋىستىرۋعا ارنالعان دەربەستەندىرىلگەن 3D تەحنولوگيالىق يمپلانتتارىن كوممەرتسيالاندىرۋ جونىندەگى جۇمىستار قولعا الىندى. بۇل ءادىستىڭ پراكتيكالىق قىزمەتكە ينتەگراتسياسى ءادىستىڭ ەنگىزۋ اۋقىمىنىڭ ۇلعايۋى مەن ماسشتابتاۋ كەلەشەگىنە جول اشادى. سونداي-اق ورتالىق ازيا­داعى جالعىز راديوحيرۋرگيالىق كە­شەن – «گامما-پىشاق» اپپاراتى جۇمىس ىستەيدى. بۇگىندە ونىڭ كومەگىمەن 2 000-نان استام پاتسيەنت ەمدەلدى. ورتالىق ازيا ەلدەرىندە «گامما-پىشاق» اپپاراتىن پايدالانۋ اۋقىمىن كەڭەيتۋ ماقساتىندا ۇكىمەتارالىق كەلىسىم جۇرگىزىلىپ جاتىر», دەپ اتاپ ءوتتى «ۇلتتىق نەيروحيرۋر­گيا ورتالىعى» اق باسقارما توراعاسى, ۋولتەر دەندي اتىنداعى نەيروحيرۋرگيالىق قاۋىمداستىعىنىڭ X دۇنيەجۇزىلىك كونگرەسىنىڭ پرەزيدەنتى, پروفەسسور سەرىك اقشولاقوۆ.

كونگرەستە ءسوز العان Walter E.Dandy نەيروحيرۋرگيالىق قاۋىمداستىعى دۇنيەجۇزىلىك كونگرەسىنىڭ جاھاندىق پرەزيدەنتى ساليم ابدۋلراۋف (اقش), پرەمەر-ءمينيسترىنىڭ ورىنباسارى ەرمەك كوشەرباەۆ, دەنساۋلىق ساقتاۋ ءمينيسترى اقمارال ءالنازاروۆا, پرەزي­دەنت جانىنداعى ۇلتتىق عىلىم اكا­دەمياسىنىڭ پرەزيدەنتى اقىلبەك كۇرىشباەۆ, پارلامەنت ءماجىلىسى الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ وتان­دىق نەيروحيرۋرگيا سالاسىنداعى جەتىس­تىكتەرگە توقتالدى.

كونگرەستە الەمنىڭ جەتەكشى ساراپ­شىلارىنىڭ 40-تان استام بايانداماسى تىڭدالىپ, پلەنارلىق سەسسيا­لار مەن شەبەر-كلاستارىندا جاڭا ازىرلەمە­لەر تالقىلاندى. كونگرەسس وتاندىق نەيرو­حيرۋرگيانىڭ الەۋەتىن تانىتىپ, عىلىمي, كلينيكالىق ىنتىماق­تاستىقتى نىعايتۋعا سەرپىن بەرەدى. تاعى ءبىر ماقسات – مەديتسينادا يننوۆاتسيالىق تاسىلدەردىڭ ەنگىزىلۋىن جەدەلدەتىپ, وتاندىق مامانداردىڭ بىلىكتىلىگىن ارتتىرۋ, ەلىمىزدى ورتالىق ازيانىڭ مەديتسينالىق حابى رەتىندە ىلگەرىلەتۋ.

«ۇلتتىق نەيروحيرۋرگيا ورتالى­عى» اق – نەيروحيرۋرگيالىق پاتولوگيا كەزىندە دياگنوستيكادان باستاپ, پاتسيەنتتەردى ەرتە وڭالتۋعا دەيىنگى مەديتسينالىق قىزمەتتەردىڭ تولىق سپەكترىن كورسەتەتىن ەلىمىزدەگى جوعارى ما­مانداندىرىلعان كلينيكا. ورتالىق گامما-پىشاق, نەيروناۆيگاتسيا­لىق, روبوتتىق جۇيەلەر, رەزيدەنتتەردى دايار­لاۋعا ارنالعان جوعارى دالدىكتەگى سيمۋلياتسيالىق ترەناجەرلەردى قوسا العاندا, وزىق تەحنولوگيالارمەن جاب­دىقتالعان. قۇرىلعان ساتىنەن باستاپ جوعارى تەحنولوگيالىق نەيروحيرۋرگيانى ەنگىزۋدىڭ درايۆەرى سانالادى, حالىقارالىق جوبالارعا بەلسەندى قاتى­سادى ءارى جەتەكشى شەتەلدىك كلينيكالارمەن ىنتىماقتاستىق ورناتقان. 17 جىل ىشىندە ورتالىقتا 70 مىڭنان استام پاتسيەنت ەمدەلدى. جىل سايىن جۇيكە جۇيەسىنىڭ ەڭ كۇردەلى پاتولوگياسى بار پاتسيەنتتەرگە 5 000-عا جۋىق وپەراتسيا جاسالادى. ەلىمىزدە العاش رەت نەيروحيرۋرگيا­نىڭ تۇبەگەيلى جاڭا بولىمدەرى – ميكرونەيروحيرۋرگيا, ەندوۆاسكۋليارلىق, ەندوسكوپيالىق, فۋنكتسيونالدىق نەيروحيرۋرگيا ەنگىزىلدى. 80 جاڭا مەديتسينا­لىق تەحنولوگيانىڭ ارقاسىندا ەلىمىزدە جوعارى تەحنولوگيالىق ەمدەۋ قولجە­تىم­دى. ورتالىق اشىلعانعا دەيىن جوعارى تەحنولوگيالىق مەديتسينالىق كومەككە مۇقتاج پاتسيەنتتەردىڭ 80%-دا ەل ىشىندە مۇنداي ەم الۋ مۇمكىندىگى بولماعان.