2025 جىلعى 1 شىلدەدەگى دەرەكتەرگە سايكەس, ەلىمىزدە مۇگەدەكتىگى بار ازاماتتاردى جۇمىسپەن قامتۋ ماقساتىندا جۇرگىزىلىپ جاتقان ءتۇرلى قولداۋ شارالارىمەن 15 مىڭنان استام ادام قامتىلعان. بۇگىنگى تاڭدا 110,9 مىڭ ەرەكشە قاجەتتىلىكتەرى بار ازامات جۇمىس ىستەيدى, بۇل ولاردىڭ جالپى سانىنىڭ 30 پايىزىن قۇرايدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, ەلىمىزدى مۇگەدەكتىگى بار ادامداردىڭ جالپى سانى 743,9 مىڭ, بۇل رەسپۋبليكا حالقىنىڭ 3,7 پايىزىن قۇرايدى. ونىڭ ىشىندە 375,7 مىڭ ادام ەڭبەككە قابىلەتتى جاستا.
«قر الەۋمەتتىك كودەكسىنە سايكەس جەرگىلىكتى اتقارۋشى ورگاندار مۇگەدەكتىگى بار ادامدار ءۇشىن اۋىر جۇمىستارداعى, ەڭبەك جاعدايلارى زياندى, قاۋىپتى جۇمىستارداعى جۇمىس ورىندارىن ەسەپكە الماعاندا, جۇمىسشىلاردىڭ جالپى سانىنىڭ 2-دەن 4 %-نا دەيىن (جالدامالى جۇمىسكەرلەردىڭ جالپى سانى كەمىندە 50 ادام بولعان كەزدە) كولەمدە جۇمىس ورىندارىنا كۆوتا بەلگىلەيدى. اعىمداعى جىلدىڭ 1 توقسانىندا كۆوتا بويىنشا مۇگەدەكتىگى بار 4,8 مىڭ ادام جۇمىسقا ورنالاستىرىلدى», دەلىنگەن حابارلامادا.
بۇدان بولەك, ەرەكشە قاجەتتىلىكتەرى بار ازاماتتار جۇمىسپەن قامتۋعا جاردەمدەسۋدىڭ بەلسەندى تەتىكتەرىنە دە قاتىسىپ جاتىر. اتاپ ايتقاندا:
1 شىلدەدەگى جاعداي بويىنشا 1,8 مىڭ ادام تۇراقتى جۇمىسقا تۇردى; 141 ادام جاستار پراكتيكاسىنا باعىتتالدى; 271 ادام الەۋمەتتىك جۇمىس ورىندارىنا ورنالاستى; 3,8 مىڭ ادام قوعامدىق جۇمىستارعا تارتىلدى; 484 ادام «كۇمىس جاس» جوباسى اياسىندا جۇمىسپەن قامتىلدى; 28 ادام «العاشقى جۇمىس ورنى» جوباسىنا قاتىستى; 3 ادام «ۇرپاقتار كەلىسىمشارتى» جوباسى بويىنشا جۇمىسقا ورنالاستى.سونىمەن قاتار قىسقا مەرزىمدى كاسىپتىك وقىتۋعا 88 ادام, ال كاسىپكەرلىك نەگىزدەرىنە وقىتۋعا ارنالعان «باستاۋ بيزنەس» جوباسى بويىنشا 2,9 مىڭ ادام قاتىسقان.
«الەۋمەتتىك وسال توپتارعا, سونىڭ ىشىندە مۇگەدەكتىگى بار ازاماتتارعا 400 اەك-كە دەيىنگى (1,6 ملن تەڭگە) مولشەرىندە مەملەكەتتىك گرانتتار بەرىلىپ جاتىر. بۇگىندە 666 ادام وسىنداي گرانتقا يە بولعان», دەلىنگەن حابارلامادا.
ەستەرىڭىزگە سالا كەتەيىك, 2018 جىلدان باستاپ حالىقارالىق تاجىريبەنى ەسكەرە وتىرىپ, مۇگەدەكتىگى بار ادامدار ءۇشىن ارنايى جۇمىس ورىندارىن قۇرۋ شىعىندارىن جۇمىس بەرۋشىلەرگە وتەۋ (سۋبسيديالاۋ) ءتارتىبى ەنگىزىلگەن. 2025 جىلى وسى باعىتتا 49 ارنايى جۇمىس ورنى جاساقتالعان.