ۇكىمەتتە پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ينۆەستيتسيالار تارتۋ جونىندەگى كەڭەستىڭ وتىرىسى ءوتتى, ونىڭ بارىسىندا, سونداي-اق, اگروونەركاسىپتىك كەشەندەگى ينۆەستيتسيالىق جوبالاردى جۇزەگە اسىرۋ ماسەلەلەرى دە قارالدى, دەلىنگەن حابارلامادا.
كەڭەس بارىسىندا اۋىل شارۋاشىلىعى سالاسىنداعى ەكى ءىرى جوباعا قاتىستى ينۆەستيتسيالىق كەلىسىمدەردىڭ باستى شارتتارى بەكىتىلدى.
ءبىرىنشى جوبا اياسىندا تۇركيالىق Tiryaki Agro كومپانياسى استىقتى تەرەڭ وڭدەيتىن كەشەن سالماق. جوبانىڭ وندىرىستىك قۋاتى جىلىنا 250 مىڭ توننا بيداي جانە 80 مىڭ توننا بۇرشاق ءونىمىن وڭدەۋ. جالپى ينۆەستيتسيا كولەمى 160 ميلليارد تەڭگەنى قۇرايدى.
ەكىنشى جوبا تۇرىكتىڭ YDA Group كومپانياسىنىڭ قاتىسۋىمەن تىڭايتقىشتار مەن پەستيتسيدتەر وندىرەتىن اگروحيميالىق زاۋىت سالۋ. بۇل ءوندىرىس ورنى جىلىنا 150 مىڭ توننا ءونىم شىعارۋعا قاۋقارلى. جوبانىڭ قۇنى 168 ميلليارد تەڭگە.
اتالعان ەكى باستاما اۋىل شارۋاشىلىعى ونىمدەرىن تەرەڭ وڭدەۋدى دامىتۋعا, يمپورتتى الماستىرۋعا, ازىق-ت ۇلىك قاۋىپسىزدىگىن كۇشەيتۋگە جانە جوعارى قوسىلعان قۇنى بار ونىمدەر ۇلەسىن ارتتىرۋعا باعىتتالعان.
«قازاقستاندا استىق دايىنداۋدىڭ جىل سايىنعى كولەمى 16-17 ملن توننا دەڭگەيىندە ەكەنىن جانە ۇشتەن ءبىر بولىگى ەكسپورتقا كەتەتىنىن ەسكەرە وتىرىپ قولعا الىنعان ءونىمنىڭ 260 ءتۇرىن قامتيتىن ىشكى وڭدەۋدى دامىتۋ باستاماسى ەكونوميكانى ءارتاراپتاندىرۋ جانە اگروونەركاسىپتىك كەشەننىڭ ورنىقتى دامۋى ءۇشىن قوسىمشا مۇمكىندىكتەر اشادى», دەپ حابارلادى ۇكىمەتتىڭ ءباسپاسوز قىزمەتى.
سونىمەن قاتار, ينۆەستيتسيالىق شتاب ەلدەگى ينۆەستيتسيالىق احۋالدى جاقسارتۋ باعىتىنداعى جۇيەلى جۇمىستى جالعاستىرىپ كەلەدى. باستى نازار زاڭنامانى جەتىلدىرۋ, اكىمشىلىك كەدەرگىلەردى ازايتۋ جانە باسىم سالالارداعى ينۆەستيتسيالىق جوبالار ءۇشىن تۇراقتى ءارى قولايلى جاعداي قالىپتاستىرۋ.