«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ «تانىم» كورپوراتيۆتىك وقۋ ورتالىعى 2025 جىلدىڭ ءبىرىنشى جارتىجىلدىعىن قورىتىندىلادى. قاڭتار ايىنان ماۋسىمعا دەيىن ورتالىقتا 30 مەملەكەتتىك ورگان مەن كۆازيمەملەكەتتىك سەكتور ۇيىمدارىناڭ 4000-نان استام قىزمەتكەر وقىتىلدى. ساباقتار Qosyl meet پلاتفورماسىندا ونلاين فورماتتا ءوتتى, دەپ جازادى Egemen.kz.
وقىتۋ باعدارلاماسى ازاماتتاردىڭ وتىنىشتەرىمەن جۇمىس ىستەۋ بارىسىنداعى قىزمەتكەرلەردىڭ جاۋاپكەرشىلىگى تۋرالى ناقتى تۇسىنىك قالىپتاستىرۋعا باعىتتالدى. قازاقستاندىقتاردىڭ ءاربىر سۇرانىسى جان-جاقتى قارالىپ, ءوتىنىش بەرۋشىلەر ساپالى, تولىق جاۋاپ الۋى ءۇشىن پروتسەستەردىڭ اشىقتىعى مەن تيىمدىلىگىن قامتاماسىز ەتۋگە ەرەكشە نازار اۋدارىلدى.
وسى ماقساتتا «تانىم» ورتالىعى باس پروكۋراتۋرانىڭ, ءتسدياوم مەملەكەتتىك قىزمەتتەر كوميتەتىنىڭ, ادىلەت مينيسترلىگىنىڭ, مادەنيەت جانە اقپارات مينيسترلىگىنىڭ, سونداي-اق مەملەكەتتىك كورپوراتسيانىڭ ساراپشىلارىن شاقىردى.
ساباق بارىسىندا سپيكەرلەر اكىمشىلىك راسىمدەردىڭ قاعيداتتارىن قوسا العاندا, وتىنىشتەردى تىركەۋ جانە ەسەپكە الۋ جونىندەگى زاڭنامانىڭ تالاپتارىن, سونداي-اق وتىنىشتەرمەن جۇمىس ىستەۋدىڭ قۇقىقتىق نەگىزدەرىن ءتۇسىندىردى. بۇل ءبىلىم ماماندارعا ازاماتتارمەن قارىم-قاتىناستى ساۋاتتى قۇرۋعا جانە بيۋروكراتيالىق كەدەرگىلەردى ازايتۋعا كومەكتەسەدى.
ازاماتتار مەن بيزنەس وكىلدەرىن جەكە قابىلداۋ بويىنشا ارنايى وقۋ بلوگى دا قاراستىرىلدى. تىڭداۋشىلار مۇنداي كەزدەسۋلەردى وتكىزۋدىڭ ۇزدىك تاجىريبەلەرىمەن, ءتيىمدى ديالوگ قۇرۋ جانە قيىن جاعدايلاردى رەتتەۋ تاسىلدەرىمەن تانىستى. بۇل وتە ماڭىزدى تاقىرىپتار, سەبەبى قاتىسۋشىلار ءۇشىن «e-ءوتىنىش» جۇيەسىندە جۇمىس ىستەۋدەن باسقا, ەرەكشە داعدىلاردى تالاپ ەتەتىن حالىقپەن تىكەلەي قارىم-قاتىناس فورماتى دا سۇرانىسقا يە بولىپ قالا بەرەدى.
سونىمەن قاتار, قاتىسۋشىلار جاسىرىن مەملەكەتتىك قىزمەتتەردى انىقتاۋ ادىستەمەلەرىن جانە ولاردىڭ قولجەتىمدىلىگىن ارتتىرۋ ءۇشىن تسيفرلىق قۇرالداردى پايدالانۋدى زەرتتەدى. مەملەكەتتىك كورپوراتسيا ارقىلى ءارتۇرلى مەملەكەتتىك ورگانداردىڭ 50-دەن استام اقپاراتتىق جۇيەلەردىڭ قاتىسۋىمەن مەملەكەتتىك قىزمەتتەردىڭ كەڭ سپەكترى ۇسىنىلاتىندىقتان بۇل تاقىرىپ تا ماڭىزدى. مەملەكەتتىك قىزمەتتەر ازاماتتارعا جىلدام ءارى ساپالى كورسەتىلۋ ءۇشىن ۆەدومستۆولار اراسىنداعى ۇيلەسىمدى ءوزارا ءىس-قيمىلدى تالاپ ەتەدى.
تاجىريبەلىك ساباقتار مەن جاسالاتىن قاتەلىكتەردى تالداۋ تىڭداۋشىلارعا بىرلەسىپ جۇمىس جاساۋدىڭ, بيۋروكراتيالىق كەدەرگىلەردى ازايتۋدىڭ جانە بارلىق كەزەڭدەردە جۇيەلى قىزمەت كورسەتۋ ءۇشىن جاعداي جاساۋدىڭ ماڭىزىن تۇسىنۋگە كومەكتەستى.
«تانىم» كورپوراتيۆتىك وقۋ ورتالىعى كادرلىق الەۋەتتى دامىتۋعا جانە وقىتۋعا, زاماناۋي تاسىلدەردى ەنگىزۋگە باسا نازار اۋدارا وتىرىپ, وسى باعىتتاعى جۇمىستى جالعاستىرادى.