بالالارعا مەديتسينالىق كومەك كورسەتۋ جۇيەسى جاڭاردى

ەگەر بالانىڭ دامۋىنا قاتىستى ەرەكشەلىكتەر انىقتالسا, ول ەرتە ارالاسۋ ورتالىعىنا جولدانادى. بۇل ورتالىقتا پاتروناجدىق باقىلاۋ جۇرگىزىلەدى, بالا مەن ونىڭ وتباسىنا تاماقتانۋ, دامۋ بويىنشا مامانداردىڭ كەڭەستەرى, تەلەمەديتسينا جانە ۆەدومستۆوارالىق قولداۋ كورسەتىلەدى. جۇيەگە مەكتەپ مەديتسيناسى, كاسىبي تەكسەرۋ جانە ۆاكتسيناتسيالاۋ كابينەتتەرى دە ەندىرىلگەن. باسىمدىق – بالانى ۇزدىكسىز قاداعالاۋ ءارى بۇكىل وتباسىعا كەشەندى كومەك كورسەتۋ.

جاڭا مودەل تەك قۇرىلىممەن شەكتەلمەي, قابىلداۋ مەن قىزمەت كورسەتۋدى ۇيىمداستىرۋدىڭ لوگيكاسىنا دا وزگەرىس اكەلدى.

ءبىرىنشى – مەيىرگەرلىك قابىلداۋ. ەندى كەيبىر مەديتسينالىق قىزمەتتەردى دارىگەر ەمەس, ارنايى وقىتىلعان مەيىرگەرلەر جۇرگىزەدى. بۇل دارىگەرلەردىڭ جۇكتەمەسىن جەڭىلدەتىپ, كۇردەلى كلينيكالىق جاعدايلارعا نازار اۋدارۋىنا مۇمكىندىك بەرىپ وتىر. سونىڭ ناتيجەسىندە, ديناميكالىق باقىلاۋعا الىنعان ناۋقاستاردىڭ ۇلەسى 30%-دان 38%-عا دەيىن ءوستى. بۇل – سوزىلمالى سىرقاتتاردى باقىلاۋدا جۇيەلىلىكتىڭ ارتقانىن بىلدىرەدى.

ەكىنشى – جوسپارلى قابىلداۋ فورماتى. حالىققا الدىن الا بەلگىلەنگەن ۋاقىتتا قابىلداۋعا جازىلۋ مۇمكىندىگى ۇسىنىلدى. اسىرەسە, سوزىلمالى دەرتى بار ناۋقاستار ءۇشىن بۇل ءتاسىل ءتيىمدى. جاڭا فورمات شۇعىل جۇگىنۋلەر سانىن ازايتىپ, ەمدەۋگە جاتقىزۋ كورسەتكىشىن تومەندەتۋگە سەپ بولدى. سونىمەن قاتار, باستاپقى بۋىن دارىگەرلەرىنە دەگەن سەنىم ارتا ءتۇستى.

ءۇشىنشى – ءوزىن-ءوزى جازۋ فۋنكتسياسى. ەندى ديناميكالىق باقىلاۋدا تۇرعان پاتسيەنتتەر بەيىندى مامانعا وزدىگىنەن جازىلا الادى. بۇل تىركەۋشى مەن ۋچاسكەلىك دارىگەرگە تاۋەلدىلىكتى جويىپ, قىزمەت الۋدى وڭتايلاندىردى.

دياگنوستيكالىق قىزمەتتەردىڭ جارامدىلىق مەرزىمى بۇرىنعى 10 كۇننەن 1–3 ايعا دەيىن ۇزارتىلدى. بۇل قاجەتتىلىكتى نەگىزدەمەستەن قايتا-قايتا تەكسەرىلۋ جاعدايلارىن ازايتۋعا مۇمكىندىك بەردى. بۇدان بولەك, دياگنوستيكالىق قىزمەت تۇرلەرىنىڭ سانى 507-دەن 344-كە دەيىن قىسقارتىلدى. ەندى ولار ناقتى كلينيكالىق كورسەتكىشتەر مەن نەگىزدەر بويىنشا عانا تاعايىندالادى. بۇل باستاما زەرتحانالار مەن دياگنوستيكالىق بولىمشەلەردىڭ ارتىق جۇكتەمەسىن ازايتىپ, تاعايىنداۋ دالدىگىن ارتتىرۋعا سەپ.

مەديتسينالىق وڭالتۋدىڭ ءۇشىنشى كەزەڭىنە جاتاتىن قىزمەتتەر تىزبەسى دە قايتا قارالدى – بۇرىن 97 قىزمەت ءتۇرى بولسا, قازىرگى تاڭدا بۇل سان 26-عا دەيىن قىسقارتىلعان.