مەملەكەت باسشىسى قاسىم-جومارت توقاەۆتىڭ تاپسىرماسى بويىنشا مەديتسينا قىزمەتكەرلەرىنىڭ قاۋىپسىزدىگىن كۇشەيتۋگە باعىتتالعان اۋقىمدى شارالار كەشەنى ازىرلەنىپ جاتىر. وسىعان وراي پرەمەر-مينيستر ولجاس بەكتەنوۆتىڭ توراعالىعىمەن كەڭەس ءوتىپ, سالا ماماندارىن قورعاۋ ماسەلەلەرى تالقىلاندى, دەپ حابارلايدى Egemen.kz.
جيىنعا ۇكىمەت باسشىسىنىڭ ورىنباسارى ەرمەك كوشەرباەۆ, دەنساۋلىق ساقتاۋ ءمينيسترى اقمارال ءالنازاروۆا, ىشكى ىستەر ءمينيسترى ەرجان سادەنوۆ جانە ادىلەت ۆيتسە-ءمينيسترى لاۋرا مەرساليموۆا قاتىستى.
رەسمي مالىمەتتەرگە سۇيەنسەك, سوڭعى جىلدارى دارىگەرلەر مەن مەدبيكەلەرگە قاتىستى 170-تەن استام شابۋىل فاكتىسى تىركەلگەن. وسىعان بايلانىستى دەنساۋلىق ساقتاۋ مينيسترلىگى بىرقاتار ناقتى شارالار ازىرلەۋدى باستادى. ولاردىڭ قاتارىندا:
مەديتسينا قىزمەتكەرلەرىنە جاسالعان شابۋىلدى قۇقىق قورعاۋ ورگاندارى وكىلدەرىنە قارسى ارەكەتپەن تەڭەستىرۋ; اق حالاتتىلارعا سمارت-بەينەجەتوندار بەرۋ; ەمحانالار مەن اۋرۋحانالاردا جۇيەلى كۇزەت جۇيەسىن ەنگىزۋ; قابىلداۋ بولىمشەلەرىنە تاۋلىك بويعى پوليتسيا بەكەتتەرىن ورنالاستىرۋ.پرەمەر-مينيستر ولجاس بەكتەنوۆ بۇل ماسەلەگە ەرەكشە نازار اۋدارىپ, مەديتسينا ماماندارىنا شابۋىلداردى قۇقىقتىق تۇرعىدا قاتاڭ توقتاتۋ قاجەتتىگىن اتاپ ءوتتى.
«مەملەكەت باسشىسىنىڭ تاپسىرماسىنىڭ ورىندالۋىن قامتاماسىز ەتۋ قاجەت. دارىگەرلەرگە شابۋىل جاسالعان مۇنداي وقيعالار قۇقىقتىق ادىستەرمەن قاتاڭ تۇردە توقتاتىلۋى كەرەك. وسىعان بايلانىستى دەنساۋلىق ساقتاۋ, ىشكى ىستەر, ادىلەت مينيسترلىكتەرىنە ون كۇن مەرزىم ىشىندە قىزمەتتىك مىندەتتەرىن اتقارۋ كەزىندە مەديتسينا قىزمەتكەرلەرىنە قاتىستى زورلىق-زومبىلىق جاسالعانى ءۇشىن قىلمىستىق جازا قاراستىرۋ بويىنشا زاڭنامالىق تۇزەتۋلەر ازىرلەپ, ەنگىزۋدى تاپسىرامىن», دەدى ولجاس بەكتەنوۆ.
ىشكى ىستەر ءمينيسترى ەرجان سادەنوۆتىڭ ايتۋىنشا, قازىرگى تاڭدا ەل بويىنشا 115 مەديتسينالىق مەكەمە پوليتسيانىڭ تۇراقتى كۇزەتىنە الىنعان, ال قابىلداۋ بولمەلەرىندە تاۋلىك بويى كەزەكشىلىك ۇيىمداستىرىلعان. سونداي-اق, شۇعىل جاعدايلارعا جەدەل ارەكەت ەتۋ ماقساتىندا ارنايى پاترۋلدىك توپتار مەديتسينالىق مەكەمەلەرگە جاقىن جەرلەردە ورنالاسقان.
بۇعان قوسا, ۇكىمەت حالىق اراسىندا ءتۇسىندىرۋ جۇمىستارىن كۇشەيتىپ, مەديتسينا قىزمەتكەرلەرىنە دەگەن قۇرمەت پەن قولداۋ مادەنيەتىن قالىپتاستىرۋدى دا نەگىزگى باعىت رەتىندە ايقىنداپ وتىر.