اسپان استى ەلىنىڭ استاناسى بەيجىڭدە CRRC كومپانياسى MODERN RAILWAYS 2025 كورمەسىندە 600 كم/ساع دەيىنگى جىلدامدىقپەن جۇرەتىن ماگلەۆ پويىزىن كوپشىلىكتىڭ نازارىنا ۇسىندى. ءسويتىپ, بولاشاقتاعى جوعارى جىلدامدىقتى تاسىمالدارعا يننوۆاتسيالىق شەشىمدەردى كورسەتىپ, تانىستىردى, دەپ جازادى Egemen.kz.
ايتۋلى ءىس-شارادا تۇڭعىش رەت ەلەكتروديناميكالىق اسپاداعى پويىزدىڭ الدىڭعى ۆاگونى جۇرت نازارىنا ۇسىنىلدى. بۇل ۆاگون وتكىزگىشتىگى جوعارى ماگنيتتەر نەگىزىندە جاسالعان. ونىڭ قۇرىلىمى ۇيكەلىستى ازايتىپ, جوعارى جىلدامدىقتا تۇراقتىلىقتى ارتتىرۋعا باعىتتالعان.
ءوندىرۋشىنىڭ مالىمەتى بويىنشا ۆاگوننىڭ ۇزىندىعى – 29,355 مەتر, ەنى – 3 مەتر, بيىكتىگى – 3,5 مەتر. شاناعى اليۋميني قورىتپاسى مەن كومىرتەكتى تالشىقتان جاسالعان.
جوعارى جىلدامدىقتى پويىزدىڭ اسپا جۇيەسى تومەن جىلدامدىقتا رەزەڭكە دوڭعالاقتارمەن قوزعالۋعا مۇمكىندىك بەرەدى. الايدا 150 كم/ساع جىلدامدىققا جەتكەندە ول ماگنيتتىك لەۆيتاتسيا رەجيمىنە اۋىسادى, بۇل قوزعالىستى الدەقايدا تەگىس ەتەدى.
بۇل ماگلەۆ پويىزدارىن CRRC كومپانياسى بەيجىڭ, شانحاي, گۋانچجوۋ جانە ۋحان سياقتى مەگاپوليستەر اراسىندا قولدانۋدى جوسپارلاعان كورىنەدى. بۇيىرتسا ينفراقۇرىلىم قۇرىلىسى كەلەسى بەس جىلدا باستالۋى ىقتيمال. ويتكەنى قازىرگى ۋاقىتتا جوبا مەن جول جۇيەسى ازىرلەنىپ جاتىر.
وتكەن ايدا قىتاي يننوۆاتسيا ورتالىعىنىڭ ماماندارى سالماعى 1 100 كگ بولاتىن ءپروتوتيپتى سىناقتان وتكىزگەن ەدى. 600 مەترلىك ارنايى تەلىمدە پويىز نەبارى 7 سەكۋندتا 650 كم/ساع جىلدامدىققا جەتىپ, تەحنولوگيانىڭ الەۋەتىن انىق كورسەتىپ, دالەلدەپ بەردى.
ءتيىستى اقپاراتتارعا قاراعاندا, MODERN RAILWAYS 2025 كورمەسىنە 14 ەلدەن 521 كومپانيا قاتىسىپ, 72 000-نان استام ادام كەلگەن. كورمەدە 30 000-نان استام ەكسپونات, ونىڭ ىشىندە 30 پويىز ۇلگىسى كورسەتىلسە, ولاردىڭ 22-ءسىن CRRC كومپانياسى تانىستىرعان.
وسىناۋ عالامات جوبا قىتايدىڭ ۇشاقتارعا بالاما جوعارى جىلدامدىقتى كولىك ۇسىنۋعا دەگەن ۇمتىلىسىن كورسەتەدى. ماگلەۆ پويىزدارى جول ۋاقىتىن قىسقارتىپ, ەكولوگياعا تۇسەتىن سالماقتى ازايتۋعا مۇمكىندىك بەرەدى, ءارى ورتا قاشىقتىقتاعى باعىتتاردا جولاۋشىلارعا قولايلى بولماق. مۇنداي پويىز ءبىزدىڭ ەلگە جىبەرىلسە استانا مەن الماتى اراسى ەكى-اق قادام بولادى.