وبلىس اكىمدىگىندە مەتاللۋرگتەر كۇنىنە وراي مەرەكەلىك جيىن ءوتتى. سالتاناتتى شارا بارىسىندا وڭىردەگى مەتاللۋرگيا سالاسىنىڭ قارىشتاپ دامۋىنا سۇبەلى ۇلەس قوسقان سالا ارداگەرلەرى مەن ۇزدىك ماماندار ماراپاتتالدى.
وبلىس اكىمى نۇرىمبەت ساقتاعانوۆ مەتاللۋرگتەردى كاسىبي مەرەكەسىمەن قۇتتىقتاپ, مەتاللۋرگيا سالاسى ءوڭىر ەكونوميكاسىنىڭ جەتەكشى باعىتى ەكەنىن اتاپ ءوتتى. ول وسى سالادا ەڭبەك ەتىپ جۇرگەن ءاربىر ماماننىڭ قاجىرلى ەڭبەگى مەن تاباندىلىعىنىڭ ارقاسىندا ءوندىرىس كولەمى جىل سايىن ۇلعايىپ كەلە جاتقانىن ايتتى. بۇل ءوز كەزەگىندە وتاندىق ءوندىرىس سالاسىنىڭ دامۋىنا ۇلكەن سەرپىن بەرىپ وتىر. ايماق باسشىسى بۇگىندە مىڭداعان شىعىسقازاقستاندىقتىڭ مەتاللۋرگيا سالاسىندا ەڭبەك ەتىپ جاتقانىن العا تارتتى. الەۋەتى زور وندىرىستىك وڭىردە ءتۇستى مەتاللۋرگيانىڭ 60%-ى, مىرىشتىڭ 100%-ى, تازارتىلعان كۇمىستىڭ 70%-ى وندىرىلەدى. وسكەمەن قالاسىندا ورنالاسقان ءىرى كاسىپورىندار – «كازتسينك» جشس, ء«ۇمز» اق, «وسكەمەن تمك» اق جانە «ۆوستوكتسۆەتمەت» جشس ستراتەگيالىق ماڭىزى بار, سيرەك كەزدەسەتىن مەتالداردى وڭدەۋمەن اينالىسادى.
قازىر وبلىستاعى 70-تەن استام ونەركاسىپ پەن زاۋىتتىڭ 80%-ى – وڭدەۋشى كاسىپورىندار. ماسەلەن, الەمدە بار بولعانى ءۇش بەريلي شىعاراتىن زاۋىت بولسا, ال تمد ەلدەرى بويىنشا تانتال وندىرەتىن بەس زاۋىتتىڭ ءبىرى – وسكەمەندەگى ءۇلبى مەتاللۋرگيالىق زاۋىتى. اتالعان كاسىپورىن ۋران, تانتال جانە بەريلي ونىمدەرىن ءىرى كولەمدە وندىرەدى جانە قازاقستاندا اتوم ەلەكتر ستانسالارى ءۇشىن جىلىنا 200 توننا تومەن بايىتىلعان ۋران وتىنىن شىعاراتىن جالعىز زاۋىت سانالادى.
«مەتاللۋرگيا سالاسىن «يندۋستريانىڭ جۇرەگى» دەۋگە بولادى. بۇل رەتتە, ەل مۇددەسىنە ادال قىزمەت ەتىپ, قاجىرلى ەڭبەكتىڭ كوش باسىندا تۇرعان, وڭىردەگى مەتاللۋرگيا سالاسىنىڭ ءداستۇرىن قالىپتاستىرىپ, بەرىك نەگىزىن قالاپ بەرگەن ارداگەرلەرگە العىس بىلدىرەمىن. سىزدەردىڭ تاباندى ەڭبەكتەرىڭىزدىڭ ارقاسىندا ءبىزدىڭ وبلىس ونەركاسىپتىك دامۋدىڭ جاڭا ساتىسىنا كوتەرىلدى. ەلىمىزدىڭ ءوندىرىس سالاسى دا وسى ەڭبەكتىڭ ناتيجەسىندە قارقىن الىپ كەلەدى. ەندى بۇل ءداستۇردىڭ جالعاسىن تاۋىپ كەلە جاتقانى قۋانتادى. بۇل – سىزدەردىڭ كاسىبيلىكتەرىڭىزدىڭ, ەڭبەكقورلىق پەن توزىمدىلىكتەرىڭىزدىڭ ايقىن كورىنىسى. ءار ازاماتتىڭ ءال-اۋقاتىن جاقسارتىپ, ەلىمىزدىڭ دامۋىنا سۇبەلى ۇلەس قوسىپ كەلەسىزدەر. مەرەكەلەرىڭىزبەن قۇتتىقتايمىن!» دەدى وبلىس اكىمى.
مەرەكەلىك جيىندا سالا ارداگەرلەرى مەن ۇزدىك ماماندارعا مەملەكەتتىك ماراپاتتار مەن وبلىس اكىمىنىڭ اتىنان العىس حاتتار تابىستالدى. شقو تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ «شىعىس سۋقويمالارى» كمك ينجەنەر-گيدروتەحنيگى ميرزان يمانجانوۆ «قۇرمەت» وردەنىمەن, «ۆوستوكتسۆەتمەت» جشس ارتەمەۆ شاحتاسىنىڭ جەراستى ۋچاسكەسىنىڭ تاۋ-كەن شەبەرى سەرىكقان تولەۋباەۆ جانە «كازتسينك» جشس مىس زاۋىتىنىڭ بالقىتۋشىسى كازەز بەكشەنتاەۆ III دارەجەلى «ەڭبەك داڭقى» وردەنىمەن, «كازتسينك» جشس, مالەەۆ كەنىشىنىڭ جۇك تيەۋ-جەتكىزۋ ماشيناسىنىڭ ءماشينيسى رۋسلان كارىكباەۆ «ەرەن ەڭبەگى ءۇشىن» مەدالىمەن ماراپاتتالدى. سونىمەن قاتار ۋران ءوندىرىسىنىڭ 6-رازريادتى اپپاراتشىسى ء(«ۇمز» اق) ميحايل ماتريونينگە, تانتال ءوندىرىسى №58 تسەحتىڭ 6-رازريادتى اپپاراتشىسى ء(«ۇمز» اق) ورازالى جەتەنوۆكە, №3 تسەحتاعى تيتان مەن سيرەك مەتالداردى قالپىنا كەلتىرۋ جانە ايداۋ پەششىسى («وسكەمەن تمك» اق) يۋري كۋليكوۆقا, №12 تسەحتىڭ بالقىتۋشىسى («وسكەمەن تمك» اق) ازامات قوجاحمەتوۆكە, ەرتىس شاحتاسىنىڭ ءوندىرۋ ۋچاسكەسىنىڭ سكرەپەرلىك لەبەدكا ءماشينيسى («ۆوستوكتسۆەتمەت» جشس) نۇرلان ەسىمبەكوۆكە, ارتەمەۆ شاحتاسىنىڭ تيەپ-جەتكىزۋ كولىگىنىڭ ءماشينيسى («ۆوستوكتسۆەتمەت» جشس) ارحات كوپجاساروۆقا وبلىس اكىمىنىڭ العىس حاتى تابىستالدى.
جيىن سوڭىندا ايماق باسشىسى ماراپات يەلەرىن قۇتتىقتاپ, سالتاناتتى ءىس-شارانىڭ قاتىسۋشىلارىمەن ەستەلىك سۋرەتكە ءتۇستى.