جاڭاوزەندە ء«بىلىمىمىز – ەلىمىزگە» ۆولونتەرلىك جوباسى اياسىندا «بولاشاق» حالىقارالىق ستيپەندياسى تۇلەكتەرى حالىققا تەگىن مەديتسينالىق, كاسىپكەرلىك كەڭەس بەردى. ورتالىقتان شالعاي ورنالاسقان ءوڭىر حالقىنىڭ بىلىكتى مامانداردىڭ قىزمەتىنە ءاردايىم قول جەتكىزە بەرمەيتىنىن ەسكەرسەك, ارنايى جوبانىڭ جاڭاوزەن جۇرتىنا پايداسى مول بولعانى انىق.
جوبا «بولاشاق» تۇلەكتەرى قاۋىمداستىعىنىڭ الماتى بولىمشەسىنىڭ ۇيىمداستىرۋىمەن وتكەن. الەمنىڭ ۇزدىك ۋنيۆەرسيتەتتەرىندە ءبىلىم العان كاسىبي مامانداردىڭ كومەككە كەلۋى – جەرگىلىكتى تۇرعىندار ءۇشىن بىرەگەي مۇمكىندىك. «بولاشاق» تۇلەكتەرى قاراپايىم حالىقتىڭ دەنساۋلىعىن جاقسارتىپ, ساپالى مەديتسينالىق كومەك بەرۋدى ماقسات تۇتادى. ءىس-شارانىڭ باسى-قاسىندا جۇرگەن, نەگىزگى ۇيىمداستىرۋشى – ماڭعىستاۋ وڭىرىندەگى «بولاشاق» قاۋىمداستىعىنىڭ رەسمي وكىلى مۇرات اكينوۆ.
تۇرعىندارعا مەديتسينالىق كومەك بەرۋگە اريتمولوگ, ونكولوگ-گينەكولوگ, ينفەكتسيونيست, ەپيدەميولوگ, ەندوكرينولوگ, كارديوحيرۋرگ, كارديولوگ, وتورينولارينگولوگ, مامولوگ, پسيحولوگ, نەفرولوگ, اللەرگولوگ ماماندار, ياعني الەمنىڭ ۇزدىك ۋنيۆەرسيتەتتەرىندە ءبىلىم العان 12 جوعارى ساناتتى مەديتسينا مامانى قاتىسقان. ماماندار نەبارى ەكى كۇندە 170-تەن اسا ناۋقاستىڭ دياگنوزىن ءدال انىقتاپ, ەمدەۋ جوسپارىن ۇسىندى. ونىڭ ىشىندە كارديولوگ 35 پاتسيەنتتى قابىلداپ, 3 ناۋقاسقا الماتى قالاسىندا وتا جاساۋ كەرەگىن ۇسىندى. لور دارىگەر 45 پاتسيەنتكە, كوبىنە بالالارعا ءتيىستى ەم تاعايىندادى. 20 پاتسيەنتكە وتا جاساۋدى ۇسىندى. ماممولوگ مامان 25 ايەلگە كومەك بەرىپ, 1 پاتسيەنتتە قاتەرلى ىسىك بارىن انىقتاپ, 3 ناۋقاستى وتاعا جىبەردى. بۇدان وزگە باعىتتاعى ماماندار دا تۇرعىندارعا دەر كەزىندە ەم تاعايىنداپ, كومەك قولىن سوزدى.
مەديتسينالىق كومەكپەن قاتار كاسىپكەرلىك باعىتتاعى كەڭەس جاس ماماندار مەن كاسىپكەرلەردىڭ دامۋىنا, تابىسىن ارتتىرۋعا زور تاجىريبە سىيلادى. 30 ءجاسوسپىرىم مەن جاس كاسىپكەرلىك جانە مانساپتىق باعىتتا كەڭەس الدى.
جوبا مۇنىمەن شەكتەلمەيدى, سونىمەن قاتار ءوڭىردىڭ دامۋىنا, ءبىلىم سالاسى مەن الەۋمەتتىك جاۋاپكەرشىلىكتى ارتتىرۋعا باعىتتالعان. مامانداردىڭ يگى ءىسى جاستاردى ساپالى ءبىلىم الۋعا جانە ەلگە قىزمەت ەتۋگە شاقىرادى. حالىق دەنساۋلىعىن جاقسارتۋعا, ءبىلىم بەرۋگە جانە كاسىپكەرلىكتى دامىتۋعا مۇمكىندىك سىيلايتىن, ۇلتتى ءسۇيۋدى ناسيحاتتايتىن باعدارلاما ەل كولەمىندە جالعاسا بەرمەك دەگەن نيەتتەمىز.