ۇكىمەت وتىرىسىندا قر پرەمەر-ءمينيسترى ولجاس بەكتەنوۆ تاۋ-كەن-مەتاللۋرگيا سالاسىن دامىتۋعا بايلانىستى ناقتى تاپسىرمالار بەردى. ول بۇل باعىتتاعى جۇمىستاردىڭ ەلىمىزدىڭ ەكونوميكالىق ورلەۋى ءۇشىن ماڭىزدى ەكەنىن اتاپ ءوتتى, دەپ حابارلايدى Egemen.kz.
ونەركاسىپ جانە قۇرىلىس مينيسترلىگىنە ءىرى تاۋ-كەن كاسىپورىندارىمەن بىرلەسە وتىرىپ, جوعارى قوسىلعان قۇنى بار ونىمدەر ءوندىرىسىن دامىتۋ بويىنشا كەشەندى شارالار جوسپارىن جاساۋ تاپسىرىلدى. بۇل رەتتە جۇيە قۇراۋشى كاسىپورىندار اينالاسىندا شاعىن جانە ورتا بيزنەستى دامىتۋعا باعىتتالعان قادامدار دا قامتىلۋى ءتيىس.
سونىمەن قاتار, «سامۇرىق-قازىنا» قورىمەن بىرلەسە وتىرىپ, سيرەك جانە اسا ماڭىزدى مەتالدار نەگىزىندە تەحنولوگيالىق تۇرعىدان جاڭاشىل ءونىم شىعاراتىن جوبالارعا باسىمدىق بەرۋ كەرەكتىگى ايتىلدى. بۇل باستاما سالانىڭ ءوسۋ الەۋەتىن ارتتىرۋعا جانە جاڭا تەحنولوگيالىق قۇزىرەتتەر قالىپتاستىرۋعا سەپ بولماق.
پرەمەر-مينيستر ءوندىرىس قالدىقتارى مەن مەتالداردى قايتا وڭدەۋ باعىتىندا دا شارالار ازىرلەۋدى تاپسىردى. بۇل تۇيىق تسيكلدى ەكونوميكا قۇرۋ جولىنداعى ماڭىزدى قادام.
عىلىم جانە جوعارى ءبىلىم مينيسترلىگىنە ونەركاسىپ مينيسترلىگىمەن بىرلەسە وتىرىپ, ءبىر اي ىشىندە تاۋ-كەن كەشەنى ءۇشىن كادر دايارلاۋ باعدارلاماسىن جاساپ شىعارۋ مىندەتتەلدى.