استانا. 19 ناۋرىز. بۇگىن الماتىدا قازاقستاننىڭ ءبىر توپ بالعىن فۋتبولشىلارىن برازيليا اكادەمياسىندا وقۋعا شىعارىپ سالۋ ءراسىمى بولدى. بۇل تۋرالى Sports.kz حابارلادى.
ەرتەڭ, 20 ناۋرىز كۇنى ەلىمىزدىڭ 2000 جىلى تۋعان 26 بالعىن فۋتبولشىلارى برازيليانىڭ «كرۋزەيرو» كومانداسىنا اتتانادى. ولار وسى ەلدە 3 جىل فۋتبول ويىنىنىڭ قىر-سىرىن مەڭگەرىپ, مامان فۋتبولشى رەتىندە ەلگە ورالادى دەپ كۇتىلۋدە.
بالالار ۇزاق جولعا اتتانار الدىندا الماتىعا برازيليا اكادەمياسىنىڭ ۆيتسە-پرەزيدەنتى مەن وكىلى كەلدى. بالالاردىڭ جول جۇرۋلەرىنە ارنالعان سالتاناتتى شارانىڭ بارىسىندا مەيماندار برازيلياداعى فۋتبول اكادەمياسى تۋرالى ايتىپ بەردى.
«ءبىزدىڭ اكادەميادا ءۇش جىل وقىعاننان كەيىن ولاردىڭ كوڭىلدەرىندە وتە جاقسى اسەر قالادى. ولار ءۇش جىلدا ەرەسەك ادام, كاسىبي فۋتبولشى بولىپ ورالادى. سىزدەر ناعىز ەركەك بولىپ قايتاسىزدار. بالكىم, ارالارىڭىزدان ۇلى فۋتبولشى دا شىعاتىن شىعار», - دەدى «كرۋزەيرو» فۋتبول كلۋبى اكادەمياسىنىڭ ۆيتسە-پرەزيدەنتى رودريگەس سيلۆا.
فۋتبولشىلارعا قازاقستان فۋتبولىنىڭ وكىلدەرى دە تىلەك ءبىلدىردى. «سىزدەر – قازاقستان فۋتبولىنىڭ ءۇمىتى مەن بولاشاعىسىزدار. بۇگىن كەلەشەكتەگى كاسىبي فۋتبولعا العاش رەت قادام جاساعالى وتىرسىزدار. قازاقستان فۋتبول فەدەراتسياسىنىڭ اتىنان سىزدەردى وسى باستامالارىڭىزبەن قۇتتىقتاعىم كەلەدى. برازيليا اكادەمياسىندا وقۋ – ۇلكەن مۇمكىندىكتەردىڭ باستاۋى. مەن كەلەشەك سىزدەردىڭ ءبارىڭىزدى پرەمەر-ليگادان كورەمىز دەگەن ۇمىتتەمىن», - دەدى فەدەراتسيا ۆيتسە-پرەزيدەنتى سەيىلدا بايشاقوۆ.
دامير قوجامقۇل.