ەلىمىزدىڭ قارجىلىق مونيتورينگ اگەنتتىگىنىڭ مالىمەتىنشە, قازاقستان مەن وزبەكستان اراسىنداعى شەكارالىق اۋماقتا جەر استىمەن زاڭسىز جانار-جاعارماي تاسىمالداۋعا ارنالعان ارناۋلى تۋننەل قازىلعان. ۇزىندىعى 450 مەتر بولاتىن جاسىرىن وتكەل ارقىلى قىلمىستىق توپ ءۇش اي بويى جانار-جاعارمايدى كونتراباندالىق جولمەن وتكىزىپ وتىرعان, دەپ جازادى Egemen.kz.
اگەنتتىكتىڭ ءباسپاسوز قىزمەتى تاراتقان حابارلامادا اتالعان زاڭسىز ارەكەت تۇركىستان وبلىسى بويىنشا قارجىلىق مونيتورينگ دەپارتامەنتى مەن ۇلتتىق قاۋىپسىزدىك كوميتەتى دەپارتامەنتىنىڭ ۇيلەستىرىلگەن ارنايى وپەراتسياسى بارىسىندا اشكەرەلەنگەنى ايتىلدى. شاراعا وزبەكستاننىڭ قۇقىق قورعاۋ ورگاندارى دا اتسالىسقان.
«قىلمىستىق توپ شەتەلدەن قارجىلاندىرۋ كوزدەرىن تارتىپ, تاسىمالداۋ لوگيستيكاسىن جولعا قويعان. وزبەكستان تاراپى دا ءدال وسى ۋاقىتتا ءوز اۋماعىندا ءتيىستى ءىس-شارالاردى جۇزەگە اسىردى. ناتيجەسىندە ترانسشەكارالىق قىلمىستىق سحەمانىڭ بارلىق قاتىسۋشىلارى انىقتالدى. ولاردىڭ قاتارىندا وزبەكستان ازاماتتارى دا بار. قازاقستاننىڭ بەس ازاماتى كۇدىكتى رەتىندە تانىلىپ وتىر», دەپ مالىمدەدى قارجىلىق مونيتورينگ اگەنتتىگى.
قازىرگى ۋاقىتتا تەرگەۋ امالدارى اياقتالىپ, ءىس سوتقا جولدانعان.