قازاقستان رەسپۋبليكاسى پارلامەنتى سەناتىنىڭ دەپۋتاتتارى دارحان قىدىرالي مەن مارات قوجاەۆ «قىتاي – شىۇ» تاقىرىبىنداعى سەمينارعا قاتىستى. سەميناردىڭ باستى تاقىرىبى – «شىۇ اياسىندا ورتاق تاعدىر قوعامداستىعىن قالىپتاستىرۋ ماقساتىندا زاڭ شىعارۋشى ورگاندار اراسىنداعى ىنتىماقتاستىقتى نىعايتۋ» بولدى, دەپ جازادى Egemen.kz.
ءىس-شارا بارىسىندا قاتىسۋشىلار زاڭ شىعارۋ ورگاندارى اراسىنداعى تاجىريبە الماسۋدىڭ تۇراقتى الاڭىن قۇرۋ, مەملەكەتتىك باسقارۋ سالاسىنداعى ءوزارا ءىس-قيمىلدى ارتتىرۋ, ەكونوميكا جانە ساۋدا سالالارىنداعى ءوزارا ءتيىمدى ىنتىماقتاستىقتى كەڭەيتۋ, بۇۇ-نىڭ 2030 جىلعا دەيىنگى كۇن ءتارتىبىن ىسكە اسىرۋعا ىقپال ەتۋ, سونداي-اق «شانحاي رۋحىن» ىلگەرىلەتۋ جانە جاھاندىق باسقارۋ جۇيەسىندەگى ۇيىمنىڭ ۇلەسىن تالقىلادى.
سەميناردا سويلەگەن سوزىندە دارحان قىدىرالي قازىرگى الەمدەگى قارقىندى وزگەرىستەر جاعدايىندا مۇنداي سەميناردىڭ وزەكتىلىگى مەن ماڭىزىن ەرەكشە اتاپ ءوتتى.
«بۇل شارا – شانحاي ىنتىماقتاستىق ۇيىمىنا مۇشە ەلدەردىڭ زاڭ شىعارۋشى ورگاندارى اراسىنداعى ديالوگ ءۇشىن بىرەگەي الاڭ. مۇندا تاجىريبە الماسىپ, وزەكتى ماسەلەلەردى شەشۋدىڭ ورتاق تاسىلدەرىن ايقىنداۋعا مۇمكىندىك بار. زاڭ شىعارۋشى ورگاندار تۇراقتىلىقتى قامتاماسىز ەتۋ مەن ستراتەگيالىق شەشىمدەردى ىسكە اسىرۋدا ماڭىزدى ءرول اتقارادى. ءبىز, حالىق وكىلدەرى رەتىندە, سەنىمدىلىك احۋالىن قالىپتاستىرىپ, يدەيالار الماسۋعا ىقپال ەتە الامىز, شىۇ باستامالارىنا قوعام تاراپىنان قولداۋ بىلدىرۋگە جاعداي جاساپ, كوپجاقتى ىنتىماقتاستىقتىڭ ماڭىزىن تۇسىندىرە وتىرىپ, ونى تەرەڭدەتۋگە قولايلى ساياسي ورتا قالىپتاستىرا الامىز. زاڭ شىعارۋشى ورگاندار اراسىنداعى ديالوگتى دامىتۋ ەلدەرىمىز بەن حالىقتارىمىز اراسىنداعى ىنتىماقتاستىقتى نىعايتۋعا ەلەۋلى ۇلەس قوسادى», – دەدى ول.
ساپار اياسىندا قحر-دىڭ بۇكىلقىتايلىق حالىق وكىلدەرى جينالىسى تۇراقتى كوميتەتى توراعاسىنىڭ ورىنباسارى پەن تسينحۋا مىرزامەن كەزدەسۋ ءوتتى. كەزدەسۋدە تاراپتار ەكىجاقتى ىنتىماقتاستىقتى ودان ءارى دامىتۋ ماسەلەلەرىن تالقىلادى.
سونداي-اق قازاقستاندىق دەپۋتاتتار سينتسزيان-ۇيعىر اۆتونوميالىق اۋدانىنا بارىپ, وڭىرلىك حالىق وكىلدەرى جينالىسى تۇراقتى كوميتەتىنىڭ ديرەكتورى زۋمرات وبۋلمەن كەزدەستى.