استانا. 19 ناۋرىز. قازاقستان پرەزيدەنتتىگىنە كانديدات نۇرسۇلتان نازارباەۆ ءوز كانديداتۋراسىن قولداۋ ءۇشىن قۇرىلعان رەسپۋبليكالىق قوعامدىق شتابتىڭ جۇمىسىمەن تانىستى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
شتابقا كەلگەن نۇرسۇلتان نازارباەۆ ۇگىت جانە سەنىمدى وكىلدەرمەن جۇمىس جونىندەگى ورتالىقتىڭ جانە احۋال ورتالىعىنىڭ قىزمەتىمەن تانىستى. وڭىرلىك قوعامدىق شتابتار باسشىلارىمەن جانە مۇشەلەرىمەن بەينە-ءماسليحات رەجيمىندە ۇيىمداستىرىلعان كەڭەستى اشقان مەملەكەت باسشىسى الدا اۋقىمدى جۇمىس كۇتىپ تۇرعانىن ايتتى. «سەنىمدى وكىلدەردىڭ, قوعامدىق شتاب مۇشەلەرىنىڭ 60 پايىزعا جۋىعى وتكەن سايلاۋعا قاتىسىپ, جاقسى تاجىريبە جيناقتاعان. سونىمەن قاتار مۇندا جاڭا سەنىمدى وكىلدەر دە بار. بۇل بىزدە ۇرپاق ساباقتاستىعى بار ەكەنىن كورسەتەدى. مەن سايلاۋالدى ناۋقانىنا ءبىرىنشى رەت قاتىسىپ وتىرعانداردىڭ بارىنە ءىلتيپاتىمدى بىلدىرەمىن. بۇگىندە رەسپۋبليكالىق جەلىلىك كەستە جاسالدى, وڭىرلىك شتابتاردىڭ ناقتى ءىس-قيمىل جوسپارلارى بار», – دەدى قازاقستاننىڭ ءىس باسىنداعى پرەزيدەنتى.
مەملەكەت باسشىسى بارلىق وبلىستىق قوعامدىق شتابتاردىڭ ۇگىت ناۋقانىنا دايىندىعى تۋرالى ەسەپتەرىن تىڭدادى. نۇرسۇلتان نازارباەۆ رەسپۋبليكانى ءارى قاراي دامىتۋ جولدارى «قازاقستان-2050» ستراتەگياسىندا ايقىندالعانىنا, وندا الەمدەگى ەڭ دامىعان 30 ەلدىڭ قاتارىنا كىرۋ ماقساتى قويىلعانىنا نازار اۋداردى. جاھاندىق ەكونوميكاداعى داعدارىس قۇبىلىستارىن ەڭسەرۋ ءۇشىن «نۇرلى جول» باعدارلاماسى قابىلدانىپ, جۇزەگە اسىرىلىپ جاتىر. وسىعان بايلانىستى قازاقستان پرەزيدەنتى ەل حالقىنىڭ ءومىر ءسۇرۋ دەڭگەيى مەن ساپاسىن ارتتىرۋ ءۇشىن باسىمدىعى بار مەملەكەتتىك باعدارلامالاردى جۇزەگە اسىرۋدىڭ ماڭىزدىلىعىن اتاپ ءوتتى.
سونىمەن قاتار, قازاقستان پرەزيدەنتى «نۇر وتان» پارتياسىنىڭ XVI سەزىندە بەلگىلەنگەن بەس ينستيتۋتتىق رەفورمانى ىسكە اسىرۋ ايرىقشا ماڭىزعا يە ەكەنىن اتاپ ءوتتى. بۇلار كاسىبي جانە اۆتونومدى مەملەكەتتىك اپپاراتتى قالىپتاستىرۋعا, زاڭ ۇستەمدىگىن, ارتاراپتاندىرۋعا نەگىزدەلگەن يندۋستريالىق جانە ەكونوميكالىق ءوسىمدى قامتاماسىز ەتۋگە, بولاشاعى ءبىرتۇتاس ۇلتتى, سونداي-اق ترانسپارەنتتى جانە ەسەپ بەرۋشى مەملەكەتتى ورنىقتىرۋعا باعىتتالعان.
مەملەكەت باسشىسى اتالعان شارالاردىڭ ءبارىن قوعامدا تۇتاستىق, بىرلىك جانە ءوزارا سەنىم بولعان جاعدايدا عانا جۇزەگە اسىرۋ مۇمكىن ەكەنىن اتاپ كورسەتتى. قوعامدىق شتاب باسشىسى مۇحتار قۇل-مۇحاممەد كەڭەس بارىسىندا مەملەكەت باسشىسىنا ەلەكتورالدىق ناۋقان مىندەتتەرىن جۇزەگە اسىرۋ ءۇشىن ەلدى رەسپۋبليكالىق, وبلىستىق, قالالىق جانە اۋداندىق دەڭگەيدە تۇگەل قامتيتىن شتابتار جۇيەسى قۇرىلعانىن باياندادى. ورتالىق شتاب قۇرامىنا 161 ادام كىرەدى. ولاردىڭ قاتارىندا حالىقتىڭ ءتۇرلى توپتارىنا وكىلدىك ەتەتىن ەلگە سىيلى ءارى بەدەلدى ادامدار قامتىلعان. نۇرسۇلتان نازارباەۆتىڭ سەنىمدى وكىلدەرى تىزىمىندە بارلىعى 29 مىڭ ادام بار. سونىمەن قاتار 50 مىڭنان استام ەرىكتىلەر قولداۋ كورسەتۋگە تىلەك ءبىلدىردى.
اقوعامدىق شتابتار ەلەكتورالدىق كەزەڭ قارساڭىندا كانديداتتى قولداۋ ءۇشىن قول جيناۋ جۇمىسىن تابىستى اياقتادى. ەلدىڭ بارلىق وڭىرىنەن 560 مىڭنان استام قول جينالدى. ۇگىت جۇمىستارى بارلىق وبلىس ورتالىقتارىندا, 87 قالادا, 176 اۋداندا, 6841 اۋىل جانە كەنتتە جۇرگىزىلەدى. رەسپۋبليكالىق قوعامدىق شتاب وكىلدەرى حالىقپەن كەزدەسۋ ءۇشىن ەلدىڭ بارلىق ءوڭىرىن ارالاپ شىعادى. بۇل رەتتە, ەڭبەك ۇجىمدارىمەن جۇمىس جۇرگىزۋگە ايرىقشا دەن قويىلاتىن بولادى», - دەلىنگەن حابارلامادا.
ەسكە سالايىق, بۇعان دەيىن مۇحتار قۇل-مۇحاممەدتىڭ پرەزيدەنتتىككە ۇمىتكەر نۇرسۇلتان نازارباەۆتىڭ سايلاۋالدى شتابىنا باسشى بولعانى حابارلانعان ەدى. ول 2015 جىلعى 4 ناۋرىزدا قازاقستان پرەزيدەنتى كەڭەسشىسى قىزمەتىنەن بوساتىلعان بولاتىن. نازارباەۆتىڭ سايلاۋالدى شتابىنىڭ قۇرامىنا جەتەكشى ساياسي پارتيالار مەن قوعامدىق ۇيىمداردىڭ جەتەكشىلەرى, قازاقستاننىڭ عىلىم, مادەنيەت پەن ونەر سالالارىنىڭ كورنەكتى وكىلدەرى ەندى.
ايتا كەتەيىك, قازاقستان پرەزيدەنتىنىڭ كەزەكتەن تىس سايلاۋى 2015 جىلدىڭ 26 ءساۋىرى كۇنى وتەدى.
ساكەن مايلىباي.