كىرەبەرىستەگى تەرەزەنىڭ استىندا توڭكەرىلىپ جاتىر ەكەن. كوزىمە وتتاي باسىلدى. باياعىدا جارىقتىق اجەم شاڭ جۇقتىرماي, تاپ-تازا شۇبەرەكپەن ءسۇرتىپ, كوزىنىڭ قاراشىعىنداي ساقتايتىن دۇنيە. بۇل كۇندە ەشكىمگە كەرەگى جوق سىڭايلى.
سالەم بەرىپ تابالدىرىقتان اتتاعانبىز. قۇشاق جايا قارسى الدى. نەمەرە اعامنىڭ شاڭىراعى. شايعا وتىردىق. بۇل كۇندە اۋىل باقۋاتتى. ەرىنبەي جۇمىس ىستەگەندەرىنىڭ ەڭسەسى بيىك. ءۇي ءىشى, جيھازى, ىدىس-اياعى تەگىس جاڭارعان. جيەگى التىن تۇستەس بوياۋمەن ارلەنگەن شاي كەسە. وزگە ىدىستارى دا جارقىراي جايناپ تۇر. ال, مەن اجەمنىڭ كوزىندەي بولىپ كورىنەتىن, بۇل كۇندە جيەكتەرى سىنىپ, ءوڭى قاشقان اعاش توستاعانمەن ىشكىم كەلگەنى. بالا كۇنىمىزدە اجەم ەسكى ەستەلىگىن جىر قىلىپ ايتاتىن. اق قاشىپ, قىزىل قۋعان الاساپىراندا پانالايتىن جەر ىزدەپ ءبىزدىڭ اۋلەت ىشكە كوشسە كەرەك. ءبىزدىڭ جاقتىڭ ادامدارى ءىش دەپ ءسىبىردىڭ قالىڭ ورمانىن, ومبى, قورعاننىڭ ماڭايىن ايتادى. نەگە ءىش دەپ اتايتىندىعىن ءالى كۇنگە دەيىن تۇسىنبەيمىن. الاساپىران ءسال تيىشتالعان سوڭ ەلگە قايتقان. تۇگەل, تايلى-تاياعىمەن. جاز ورتاسى اۋا اتاجۇرتقا جەتسە كەرەك. ءۇي سالىپ ۇلگەرمەگەن. سامان كىرپىشتەن قالقايتىپ جەرتولە سالىپتى. ەكى بولمەلى. ەكى بولمەلىسى انشەيىن ءسوز, انىعىندا ءبىر بولمە, ورتاسى پەشپەن بولىنگەن. بەرگى جاعىندا اس-سۋ, كيىم-كەشەگى. ۇلكەن بولمەدە ءتورت وتباسى جايعاسقان. ۇلكەندەرمەن قوسا شۇپىرلەگەن قىزىل قارىن جاس بالا. اجەم ايتاتىن, سول كەزدە ءبىر شىڭ ەتكەن دىبىس شىقپايتىن. ىنتىماق, بىرلىك. ءبۇتىن بيدايدى ءبولىپ, جارتى بيدايدى جارىپ جەگەن. وسى توستاعانمەن ولشەيتىن ەدىم دەيتىن ءبىزدىڭ كەيۋانا. سول ساتتە مەنىڭ كوزىمە اجەمنىڭ ۋىسىنا سىيىپ كەتەتىن كىشكەنتاي توستاعاننىڭ ىشىندە جارىم دۇنيەنىڭ بەرەكەسى شۇپىلدەپ تۇرعانداي كورىنەتىن. توستاعانعا قاراپ وتىرىپ ەسىمە جاماعايىن جادىگەردىڭ باسىنداعى ءحال تۇسكەن. ءوزى الىس تا ەمەس, كورشى تۇرادى. ەكى قاباتتى كوتتەدج ۇيدە. تۇنەۋكۇنى كەنجە بالاسى بولەك شىعايىن دەپ جاتقانىن ايتىپ, رەنجىپ وتىر ەدى. ءبىر ۇيدە ءتورت-اق جان. جادىگەر مەن جەڭگەم, بالاسى مەن كەلىنى. بولدى, ءبىتتى. كەلىننىڭ قاباعىنا قاراپ كىسى اياعى دا تيىلعان. بۇرىنعى بەرەكە بوككەن اۋىلدىڭ تىرلىگىن جاستار بىلە بەرمەيدى. ەكى قاباتتى ۇيگە سىيماي وتىرعان سەبەبى, بۇگىنگى جاستار بۇرىنعىنىڭ بەينەسىن كورمەگەن. اجەمنەن قالعان توستاعاندى اپارىپ بەرمەك بولدىم. اڭىز, اڭىز ەمەس, شىندىق ەستەلىگىمەن بىرگە. بالكىم, تۇسىنەر.