قازاقستان مەن تۇركيا قانداي جوبالاردى بىرلەسە جۇزەگە اسىرادى؟

– مۇناي-گاز نارىعىنداعى جاعدايدى ەسكەرە وتىرىپ, وسى باعىتتاعى ىقپالداستىقتى جانداندىرۋعا ۋاعدالاستىق. Turkish Petroleum Corporation كومپانياسى قازاقستان نارىعىندا جۇمىس ىستەۋگە نيەت ءبىلدىرىپ وتىر. ءبىز مۇنى قۇپتايمىز. ەلىمىز ءىرى جوبالاردى بىرلەسە جۇزەگە اسىرۋعا مۇددەلى. سونىمەن قاتار ءبىز تاۋ-كەن سالاسىنداعى ىنتىماقتاستىققا ەرەكشە ءمان بەرىپ وتىرمىز. تۇرىك كومپانيالارىنىڭ كەن ورىندارىن يگەرۋ, مەتالدى قايتا وڭدەۋ جانە قۇيما ءوندىرىسى سالاسىنداعى تاجىريبەسى مول. وسىعان وراي, باۋىرلاس ەلدىڭ كاسىپكەرلەرىن ەلىمىزدەگى ءىرى جوبالارعا بەلسەنە اتسالىسۋعا شاقىردىم. تاعى ءبىر ماڭىزدى سالا – اۋىل شارۋاشىلىعى. بۇل باعىتتا بىرقاتار ينۆەستيتسيالىق جوبا ىسكە اسىرىلىپ جاتىر. سونىڭ ىشىندە Tiryaki Agro جانە Alarko Holding كومپانيالارىنىڭ جۇمىسىن اتاپ وتكىم كەلەدى. سونىمەن قاتار ءبىز تۇركيا پرەزيدەنتىمەن جاقىن ارادا اۋىل شارۋاشىلىعى ونىمدەرىنىڭ ساۋداسىن ۇلعايتۋعا ارنالعان جول كارتاسىن قابىلداۋعا كەلىستىك. بۇل قادام ءداندى-داقىل ەكسپورتىن ارتتىرۋعا ىقپال ەتەدى. تۇركيانىڭ زاماناۋي اگروتەحنولوگيانى كەڭىنەن قولدانىپ جاتقانى بەلگىلى. ءبىز وسى باعىتتاعى ىنتىماقتاستىقتى نىعايتۋعا قىزىعۋشىلىق تانىتىپ وتىرمىز, – دەدى قاسىم-جومارت توقاەۆ.

پرەزيدەنتتىڭ ايتۋىنشا, اقپاراتتىق تەحنولوگيالاردى دامىتۋ, ەكونوميكانىڭ ءتۇرلى سالاسىندا وزىق تسيفرلىق تاسىلدەردى قولدانۋ – زامان تالابى.

– جۋىردا مەن جاساندى ينتەللەكتىنى ورتا ءبىلىم بەرۋ جۇيەسىنە ەنگىزۋ تۋرالى جارلىققا قول قويدىم. مۇنى ەلىمىزدىڭ بولاشاعى ءۇشىن جاسالعان وتە ماڭىزدى قادام دەۋگە بولادى. ناقتىراق ايتقاندا, ءبىز ءبىلىم بەرۋ جۇيەسىن ءاربىر وقۋشىنىڭ قارىم-قابىلەتىنە ساي بەيىمدەۋ, ولاردىڭ دەربەس دەرەكتەرىن قورعاۋ, تسيفرلىق ينفراقۇرىلىمدى دامىتۋ جانە وزىق تەحنولوگيانى مەڭگەرگەن پەداگوگتەردى دايارلاۋ ماسەلەسىنە باسا ءمان بەرىپ وتىرمىز. قازاقستان جاساندى ينتەللەكت پەن تسيفرلاندىرۋ سالاسىن دامىتۋدى ستراتەگيالىق باسىمدىق رەتىندە قاراستىرادى. بۇل باعىتتا ەكى ەل كاسىپكەرلەرى بىرقاتار تابىستى جوبالاردى جۇزەگە اسىردى. اسىرەسە, قازاق-تۇرىك تسيفرلىق پلاتفورمالارىن اتاپ وتكەن ءجون. Kaspi.kz كومپانياسى تۇركيانىڭ Hepsiburاda كومپانياسىنىڭ جۇمىسىن جانداندىرادى. ال Freedom Holding تۇركيا نارىعىندا تسيفرلىق ەكوجۇيە مەن بروكەرلىك قىزمەتتى قالىپتاستىرادى. سونداي-اق «بورسا ىستانبۇل» تۇرىك بيرجاسى مەن استانا حالىقارالىق قارجى ورتالىعى مەموراندۋمعا قول قويدى. مۇنىڭ ءبارى ەكى ەلدىڭ تسيفرلىق ساۋدا سالاسىنداعى ىقپالداستىعىن ودان ءارى كۇشەيتەرى ءسوزسىز, – دەدى مەملەكەت باسشىسى.

ەسكە سالا كەتەيىك, رەجەپ تايپ ەردوعان قازاقستانعا مەملەكەتتىك ساپارمەن 13 مامىر كەشىندە كەلدى. ونى اۋەجايدا قاسىم-جومارت توقاەۆ ءوزى قارسى الدى. توقاەۆ تۇركيا پرەزيدەنتىن «قوجا احمەت ياساۋي» وردەنىمەن ماراپاتتادى