زاڭگەر الماز وتاروۆتىڭ جاۋابى:
– بۇگىندە تسيفرلىق تولەمدەر – ءومىردىڭ اجىراماس بولىگى. اسىرەسە قازاق قوعامىندا توي-تومالاق, شىلدەحانا, بەسىك توي, سۇندەت توي, قۇدالىق, قوناققا بارۋ سياقتى ءداستۇرلى جيىندارعا بايلانىستى اقشا بەرۋ, اۋدارۋ ۇيرەنشىكتى ءىس. وسىنداي كەزدە «Kaspi Gold» نەمەسە باسقا بانك كارتاسى ارقىلى تۋىسقا, دوسقا اقشا جىبەرىپ جاتامىز.
الايدا 2025 جىلدان باستاپ مەملەكەت كولەڭكەلى ەكونوميكامەن كۇرەستى كۇشەيتىپ جاتقاندىقتان, تسيفرلىق ترانزاكتسيالار دا نازاردا بولادى. بۇل دەگەنىمىز, مەملەكەت ءاربىر اۋدارىمدى قاراپ, سالىق سالايىن دەپ وتىر دەگەن ءسوز ەمەس. بىراق بەلگىلى ءبىر شەكتەۋلەردەن اسقان وپەراتسيالار, مىسالى, ءبىر ايدا بىرنەشە ادامعا 300 مىڭ تەڭگەدەن كوپ اقشا جىبەرۋ نەمەسە ءۇش اي قاتارىنان جۇزدەن استام ءتۇرلى ادامنان تۇراقتى تۇردە قاراجات ءتۇسۋى – كۇمان تۋدىرۋى مۇمكىن.
مۇنداي جاعدايدا بانكتەر دەرەكتەردى اۆتوماتتى تۇردە قارجى مونيتورينگى اگەنتتىگىنە (قما) جىبەرەدى. اگەنتتىك ءوز كەزەگىندە ازاماتقا حابارلاسىپ, «اقشا نە ءۇشىن كەلدى, كىمنەن, قانداي ماقساتپەن كەتتى؟» دەگەن سۇراقتار قويۋى ىقتيمال. ياعني تەكسەرىس تەك قاراجات سوماسى مەن جيىلىگىنە بايلانىستى جۇرەدى.
كەڭەسىم, توي-تومالاققا بايلانىستى اقشا بولسا, ازامات ونى ناقتى تۇسىندىرە الۋى كەرەك. مىسالى, ء«ىنىمنىڭ ۇيلەنۋ تويىنا», نەمەسە «انامنىڭ مەرەيتويىنا تۋعان-تۋىستار اقشا جينادى» دەگەن سياقتى جازباشا تۇسىنىكتەمە بولۋى ارتىقتىق ەتپەيدى. مۇنداي تۇسىنىكتەمەنى قاراپايىم فورماتتا, قالاۋىڭىز بويىنشا نوتاريۋستا نەمەسە ەلەكتروندىق تۇردە دە جاساۋعا بولادى. ياعني ساقتىق ءۇشىن. بىراق ەسكەرتە كەتەيىك, مۇنىڭ تەك قۇقىقتىق ءمانى عانا جوعارى. قاجەت بولعان جاعدايدا اۋدارىمنىڭ ماقساتىن كورسەتەتىن دالەل رەتىندە عانا قاراستىرىلۋى مۇمكىن. تۇسىنىكتەمەسىز اۋدارىمدار كوپ جاعدايدا داۋلى جاعداي تۋىنداعاندا ادامنىڭ ءوز پوزيتسياسىن قورعاۋعا كەدەرگى كەلتىرەدى.
ەڭ باستىسى, ءسىزدىڭ تابىس كوزىڭىز بەن اقشا قوزعالىسىڭىز اراسىنداعى سايكەستىك ساقتالۋى كەرەك. ەگەر جۇيەلى تۇردە بىرەۋلەرگە تاۋار ساتىپ, قىزمەت كورسەتىپ, بىراق ونى تويعا قاتىستى كومەك دەپ بۇركەمەلەپ جۇرسەڭىز, ول زاڭسىز كاسىپكەرلىك رەتىندە باعالانۋى مۇمكىن.
سوندىقتان زاڭگەر رەتىندە ايتارىم, اقشاڭىز زاڭدى جولمەن كەلىپ, اشىق تۇردە ءجۇرىپ وتىرسا, ۋايىمداۋعا نەگىز جوق. ال ەگەر ءجيى ءارى ءىرى كولەمدە قاراجات اينالىمى بولسا, ونىڭ نە ءۇشىن ەكەنىن راستاپ, سالىق ەسەبىندە كورسەتۋ – ءسىزدىڭ مۇددەڭىز.
دايىنداعان –
ەلىگىماي توڭكەر,
«Egemen Qazaqstan»