تۋاجات

نەمەرەسى كەلىپ كەتىپتى. امەريكانىڭ ايتۋلى ۋنيۆەرسيتەتىن بىتىرگەن, شەتەلدىڭ ءتورت ءتىلىن بىلەتىن زەرەك. اناسىنىڭ ايتۋىنا قاراعاندا, دۇنيەنىڭ ءبىلىمىن بويى­نا قوتارىپ العان بىلگىر. سول بالا شاڭىراق كوتەرمەك ەكەن. اۋەلى بار اۋلەتى قۋانعان. كەيىن رەنىش.

– بالانىڭ ۋاقتىلى شاڭىراق كوتەرگەنى دۇرىس ەمەس پە, – دەيمىز ءبىز, – ىلكىدەگى قازاق «ون ۇشتە وتاۋ يەسى» دەگەن, نەمەرەڭىز دە وتاۋ قۇراتىن جاسقا جەتتى ەمەس پە؟

– ارينە, – دەيدى باكىر اقساقال ءسال كۇمىلجىپ, – وتاۋ قۇرعانىنا قارسى ەمەسپىز عوي, تەك رەتى كەلمەي تۇرعانى.

بىردەن تاراتىپ ايتپاعانىمەن, جاتا-جاستانا ماسەلەنىڭ ءمانىسى بەلگىلى بولدى. سىرعا سالعانى ءتۇبىن قۋىپ كەلگەندە وسى اۋىلدىڭ ءتولى ەكەن ءارى بوتەن دە ەمەس, ءوز اعايىنى. ءتورت اتادان قوسىلادى. ول بالا دا شەتەلدەن وقۋ بىتىرگەن. سول جاقتا تۇرىپ تانىسسا كەرەك. ءتۇپ توركىنى ءبىر بولعانىمەن, كەيىنگى جاستار ءبىر-ءبىرىنىڭ ءتۇپتامىرىن بىلە بەرمەيدى عوي. تاعدىر سوقپاعى تانىستىرعان, تابىستىرعان.

وتكەن جولى كەلگەندە باكىر اقساقال بۇرىنعىنىڭ جول-جورال­عىسىن وقى­مىستى بالانىڭ زەردەسىنە قۇيسا كەرەك. اۋەلى اكە مەن بالا, ودان سوڭ نەمەرە مەن شوبەرە, كەيىن شوپشەك پەن نەمەنە, جەتىنشى ۇرپاق تۋاجات. بالادا اكە مەن انانىڭ قانىنداعى قاسيەت مولشەرمەن العاندا ەلۋ پايىزدى قۇراسا, نەمەرەدە 25, شوبەرەدە 12-ءىنىڭ توڭىرەگىندە. ال جەتىنشى ۇرپاق تۋاجاتقا جەتكەن كەزدە قانداعى قاسيەتتەن جۇقانا دا قالمايدى. تۋاجات دەيتىنى دە سوندىقتان. تۋدى ءبىتتى, جات ادام. تۇقىمىن تازا ۇستاعان اردا قازاقتان قالعان كيەلى وسيەت وسى.

– قازىر عىلىمنىڭ جەتىستىگى, ويلاپ تاپقان جاڭالىعى دەپ ءجۇر عوي, – دەيدى باكىر اقساقال, – ءبىزدىڭ اتالارىمىز ول تىلسىم دۇنيەنىڭ تۇڭعيىعىن باياعىدا-اق اجىراتىپ كەتتى ەمەس پە؟ جەتى ۇرپاققا دەيىن وتاسپايتىندىعى سوندىقتان. وسى كۇنى كەمتار بالا كوبەيدى. كەيدە ويلاپ قويامىن, جەتى اتاسىن بىلمەۋدىڭ كەسىرى ەمەس پە ەكەن دەپ. الگى نەمەرەگە باستان جاقتى ايىرعانداي ەتىپ ايتىپ بەردىم. تۇسىنسە جاقسى, تۇسىنبەسە ەل-جۇرتتان ۇياتتاعى.

تۋاجات. تالاي ەستىگەنمىن. بىراق بايىبىنا بارىپ, ءمان بەرمەپپىن. وزىمىزدەن تارايتىن ۇرپاقتىڭ دا ەسىنە سالىپ قويۋ كەرەك ەكەن. كۇن­دەردىڭ ءبىر كۇنىندە باكىر اقساقال ءتارىزدى بەرەكەسى كەتپەسىن.