جازعى دەمالىس ۋاقىتى. بۇل مەزگىلدە كوپتەگەن وتباسى بالالارىمەن بىرگە شەتەلگە ساياحاتتايتىنى بەلگىلى. وسى ورايدا, «ازاماتتارعا ارنالعان ۇكىمەت» مەملەكەتتىك كورپوراتسياسى شىمكەنت قالالىق فيليالىنىڭ ماماندارى شەتەلگە شىققاندا قانداي قۇجاتتار كەرەك ەكەنىن جانە بالاعا شەتەلدىك تولقۇجاتتى راسىمدەۋدىڭ ماڭىزدىلىعى جونىندە تاعى ءبىر مارتە اتا –انالاردىڭ ەسىنە سالدى, دەپ حابارلايدى Egemen.kz.
فيليال وكىلدەرىنىڭ ايتۋىنشا, بالانىڭ تولقۇجاتىن تۋعان ساتىنەن باستاپ راسىمدەۋگە بولادى. قازاقستان رەسپۋبليكاسىنىڭ زاڭناماسىنا سايكەس, شەتەلگە شىعاتىن ءاربىر ازاماتتىڭ جاسىنا قاراماستان جەكە تولقۇجاتىنىڭ بولۋى شارت.
تولقۇجات الۋ ءۇشىن اتا-انا ءبىرىنشى كەزەكتە شىمكەنت قالاسىنداعى كەز كەلگەن حالىققا قىزمەت كورسەتۋ ورتالىعىنا بارىپ جۇگىنەدى. وسى تۇستا, وزىمەن بىرگە بالانىڭ تۋ تۋرالى كۋالىگى, اتا-انانىڭ بىرەۋىنىڭ جەكە كۋالىگى, 4 اەك (15 728 تەڭگە) كولەمىندەگى مەملەكەتتىك باج سالىعىنىڭ تولەنگەنى تۋرالى تۇبىرتەك بولۋى كەرەك. سونداي-اق, قۇجاتتى راسىمدەۋ بارىسىندا اتا-انانىڭ بىرەۋىنىڭ بولۋى مىندەتتى. ال قىزمەت كورسەتۋ مەرزىمى - 15 جۇمىس كۇنىن قۇرايدى.
«بالالار تەز ءوسىپ, سىرت كەلبەتتەرى جىلدام وزگەرەتىندىكتەن, شەكارا قىزمەتكەرلەرى كەيدە ولاردى فوتوسۋرەتتەن تاني الماي جاتادى. مۇنداي جاعدايدا, تولقۇجاتتىڭ جارامدىلىق مەرزىمى ءالى اياقتالماسا دا, ونى اۋىستىرۋ قاجەت بولادى. 12 جاسقا دەيىنگى بالالارعا تولقۇجات 5 جىل مەرزىمگە, ال 12-دەن 16 جاسقا دەيىن – 10 جىل مەرزىمگە بەرىلەدى. 12 -16 جاس ارالىعىنداعى بالالارعا بەرىلەتىن تولقۇجات مەرزىمى 10 جىلعا جارايدى. سونىمەن قاتار, «التىن القا», «كۇمىس القا» يەگەرلەرى, مۇگەدەكتىگى بار ازاماتتار, جەتىم جانە اتا-اناسىنىڭ قامقورلىعىنسىز قالعان بالالار تولقۇجاتتى تەگىن الا الادى» دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى شىمكەنت قالالىق فيليالىنىڭ ديرەكتورى اينۇر توباەۆا.
ونىڭ ايتۋىنشا, مەگاپوليس تۇرعىندارىنا شەتەلدىك تولقۇجاتتى جەدەل تۇردە راسىمدەۋ قىزمەتى قاراستىرىلعان. قوسىمشا اقىسى تولەنسە ءوتىنىش بەرۋشىنىڭ قالاۋىنا قاراي قۇجات 1 نەمەسە 3 جۇمىس كۇنى ىشىندە دايىن بولادى.
شىمكەنت