كەيىنگى ۋاقىتتا جامبىل وڭىرىندە بىرنەشە ينۆەستيتسيالىق جوبا ىسكە اسىرىلىپ جاتىر. ءبىرشاما ۋاقىت بۇرىن بايزاق اۋدانىنا قاراستى ۇلگىلى اۋىلىندا شىڭدالعان شىنى شىعاراتىن كاسىپورىن جۇمىسىن باستاسا, ەندى ديقان اۋىلىندا زاماناۋي كىرپىش زاۋىتى ىسكە قوسىلدى.
جاڭا ءوندىرىس وشاعىنىڭ اشىلۋ سالتاناتىنا قاتىسقان ءوڭىر باسشىسى ەربول قاراشوكەەۆتىڭ ايتۋىنشا, كۇيدىرىلگەن كىرپىش شىعاراتىن زاۋىتتىڭ الەۋەتى زور. كاسىپورىن باسشىلىعى ءبىرىنشى كەزەكتە وڭىرگە كەلەتىن يمپورت كولەمىن ازايتۋعا دەن قويىپ وتىر. ينۆەستيتسيالىق جوبانىڭ جۇزەگە اسۋىنا جەرگىلىكتى كاسىپكەر بەرىك ءجۇسىپوۆ باستاماشى بولعان ەكەن. ودان وزگە دە بىرنەشە ينۆەستور كاسىپورىن جۇمىسىن جەتىلدىرۋ ءۇشىن قارجى قۇيىپ, زاۋىت قۇرىلىسىن جەدەلدەتۋگە اتسالىسقان.
«زاۋىت تولىقتاي اۆتوماتتاندىرىلعان. مۇنداعى جاڭا تەحنولوگيالار ءوندىرىس تيىمدىلىگىن ارتتىرىپ, ءونىم ساپاسىن جوعارى دەڭگەيدە ساقتاۋعا مۇمكىندىك بەرەدى. كاسىپورىن جەرگىلىكتى نارىقتا يمپورت كولەمىن ايتارلىقتاي ازايتىپ, ءوڭىردىڭ الەۋمەتتىك-ەكونوميكالىق دامۋىنا زور اسەر ەتپەك. جوبانى ىسكە اسىرعان «ەسكەرمەس» كاسىپكەرلىگىنىڭ جەتەكشىسى بەرىك جۇسىپوۆكە زور العىس ايتامىن. مۇندا ءوندىرىلىپ كۇيدىرىلگەن كىرپىش ءوڭىر برەندىنە اينالادى دەگەن سەنىم زور. زاماناۋي زاۋىتتىڭ ىسكە قوسىلۋى ءوڭىر ءۇشىن زور قۋانىش ەكەنى داۋسىز. كاسىپورىن جۇمىسى ءساتتى بولسىن», دەدى وبلىس باسشىسى.
رەسمي دەرەككە جۇگىنسەك, جاڭا جوبانى ىسكە اسىرۋ ءۇشىن 2,5 ملرد تەڭگە ينۆەستيتسيا سالىنىپتى. جەرگىلىكتى كاسىپكەر بەرىك ءجۇسىپوۆ 1 ملرد تەڭگە قاراجاتتى ءوزى قۇيسا, قالعان 1,5 ملرد تەڭگەنى باسقا ينۆەستورلار سالعان. كاسىپورىن ەلىمىزدەگى تۇڭعىش اۆتوماتتاندىرىلعان كىرپىش زاۋىتى ەكەنىن ايتا كەتكەن ءجون.
كاسىپورىن وكىلدەرىنىڭ ايتۋىنشا, زاۋىتقا قاجەتتى قۇرىلعىلار كورشىلەس قىتاي حالىق رەسپۋبليكاسىنان ساتىپ الىنعان. ءوندىرىس وشاعى جىلىنا 36 ملن دانا كىرشىپ وندىرۋگە قاۋقارلى.
«جاڭادان اشىلعان زاۋىتتاعى جۇمىس ايتارلىقتاي قيىن ەمەس. ويتكەنى ءوندىرىس وشاعى ۋاقىت سۇرانىسىنا ساي جاڭا تەحنولوگيامەن قامتىلعان. بۇل ءوز كەزەگىندە كاسىپورىن قىزمەتكەرلەرىنىڭ جۇمىستى جۇيەلى تۇردە اتقارۋىنا مۇمكىندىك بەرەدى. ءبىزدىڭ ءونىم ەلىمىزدىڭ ءار قيىرىنداعى قۇرىلىس جۇمىستارىنا پايدالانىلادى دەپ سەنەمىز. ەڭ باستىسى, جۇمىسشىلاردىڭ ويداعىداي, الاڭسىز جۇمىس ىستەۋىنە بارلىق جاعداي قاراستىرىلعانى كوڭىل قۋانتادى. ەندى زاۋىت قىزمەتكەرلەرى تەك ساپالى ءونىم شىعارۋعا دەن قوياتىنى داۋسىز», دەيدى جاڭا كاسىپورىننىڭ كران جۇرگىزۋشىسى رامازان الشوراز.
مامانداردىڭ ايتۋىنشا, كۇيدىرىلگەن كىرپىش شىعاراتىن زاۋىت جۇمىسى ءبىر جۇيەگە نەگىزدەلگەن. الدىمەن توپىراق, سۋ جانە كومىر ارنايى قۇرىلعىدا ارالاستىرىلادى. شامالى ۋاقىتتان سوڭ قوسپالار تىعىزدالىپ, كىرپىشتىڭ پىشىنىنە كەلتىرىلەدى. بۇدان سوڭ ءونىم ارنايى پەشكە سالىنىپ, 400 گرادۋس ىستىقتا كەپتىرىلەدى. كەيىن 800 گرادۋس تەمپەراتۋرادا كۇيدىرىلەدى. دايىن بولعان كىرپىشتەردى ارنايى روبوتتار جيناپ سۇرىپتايدى. ازىرلەنگەن ءونىم ەلىمىزدىڭ بارلىق قيىرىن قامتىپ قانا قويماي, كورشىلەس ەلدەرگە ەكسپورتقا شىعارىلماق.
ءوڭىر باسشىسى ەربول قاراشوكەەۆتىڭ ايتۋىنشا, بيىل 115 ملن دوللار كولەمىندە تىكەلەي شەتەلدىك ينۆەستيتسيا تارتۋ جوسپارلانعان. ال بىلتىر جالپى قۇنى 214 ملرد تەڭگەنى قۇرايتىن 35 ينۆەستيتسيالىق جوبا ىسكە قوسىلىپ, 1 500-گە جۋىق جاڭا جۇمىس ورنى اشىلىپتى. 2025–2028 جىلدار ارالىعىندا جالپى سوماسى 2,5 ترلن تەڭگەنى قۇرايتىن 62 جوبانى ىسكە قوسۋ كوزدەلگەن. ناتيجەسىندە, 6 مىڭعا جۋىق جاڭا جۇمىس ورنى قۇرىلماق.
جامبىل وبلىسى,
بايزاق اۋدانى,
ديقان اۋىلى