قازاقستاندىق «شاتىرداعى ەكەۋ» ءفيلمى رەسەيدىڭ ياروسلاۆل قالاسىندا وتكەن «ۆ كرۋگۋ سەمي» حالىقارالىق كينوفەستيۆالى اياسىندا قازىلار القاسىنىڭ ارنايى جۇلدەسىنە يە بولدى. كارتينا قر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن, دەپ حابارلايدى Egemen.kz.
فيلم ۇلتتىق بولمىسى, مازمۇن تەرەڭدىگى جانە الەۋمەتتىك تاقىرىپتى كوتەرۋى ارقىلى قازىلار القاسىنىڭ جوعارى باعاسىنا يە بولعان.
ايتا كەتەيىك, شىعارما رەجيسسەر گۇلشات سماعۇلوۆانىڭ رەجيسسەر رەتىندەگى دەبيۋتى سانالادى. سيۋجەت تاعدىرى اۋىر جاس جىگىت دامير مەن اۋتيزمگە شالدىققان ءجاسوسپىرىم كوستيانىڭ اراسىنداعى ەرەكشە دوستىقتى باياندايدى. كارتينا ينكليۋزيا ماسەلەسىن, ەرەكشە قاجەتتىلىكتەرى بار بالالاردىڭ قوعامعا بەيىمدەلۋى مەن ولاردى قابىلداۋ تاقىرىبىن قوزعايدى.
فەستيۆال اياسىندا ءفيلمدى ونىڭ تۇپنۇسقا مۋزىكاسىنىڭ اۆتورى, كومپوزيتور ۆيكتور سولوگۋب تانىستىرعان. ول ماراپاتتى بۇكىل شىعارماشىلىق توپتىڭ اتىنان قابىلداپ, كورەرمەنگە تولقىنىسىن جەتكىزدى. سونىمەن قاتار, بۇل تۋىندى ەرەكشە بالالاردىڭ ىشكى جان دۇنيەسىن تەرەڭىرەك تۇسىنۋگە جانە ولاردى قوعامعا جاقىنداتۋعا كومەكتەسەتىنىن اتاپ ءوتتى.
ايتا كەتەيىك, 2025 جىلعى «ۆ كرۋگۋ سەمي» كينوفەستيۆالى رەكوردتىق كورسەتكىشكە قول جەتكىزدى. بيىل ۇيىمداستىرۋشىلارعا 121 ەلدەن 2500-دەن استام فيلمگە ءوتىنىم كەلىپ تۇسكەن. ولاردىڭ اراسىندا قىتاي, تۇركيا, وڭتۇستىك كورەيا, يتاليا, ءۇندىستان, يران, مەكسيكا, سولتۇستىك ماكەدونيا ەلدەرىنىڭ تۋىندىلارى بار. العاش رەت بايقاۋعا ەفيوپيا مەن سەنەگالدان دا فيلمدەر ۇسىنىلعان. فەستيۆالدىڭ نەگىزگى باعدارلاماسىنا 36 ەلدەن كەلگەن تولىقمەتراجدى جانە قىسقامەتراجدى تۋىندىلار ەندى.
«شاتىرداعى ەكەۋ» ءفيلمى بۇعان دەيىن دە بىرنەشە حالىقارالىق ماراپاتتارعا يە بولعان. اتاپ ايتقاندا, حانتى-مانسيسك قالاسىندا وتكەن XXIII حالىقارالىق كينو-دەبيۋتتار فەستيۆالىندە «دۋشا روسسي. ميروۆوە كينو» نوميناتسياسىن جەڭىپ العان بولاتىن. سونداي-اق ءۇندىستاندا وتكەن «زولوتوي لەۆ» حالىقارالىق كينوفەستيۆالى اياسىندا «ۇزدىك حالىقارالىق تولىقمەتراجدى فيلم» جانە «دەبيۋتتىك فيلم ءۇشىن ۇزدىك رەجيسسۋرا» اتالىمدارىندا جەڭىسكە جەتكەن. سونىمەن قاتار, ماسكەۋدە ۇيىمداستىرىلعان Fashion Film Festival فەستيۆالىندە بىردەن توعىز جۇلدەگە يە بولدى.
ءفيلمنىڭ ءتۇسىرىلىم جۇمىستارى 2025 جىلدىڭ كوكتەمىندە الماتى قالاسى مەن تالعار اۋدانىندا وتكەن. كوركەم تۋىندى قازاق جانە ورىس تىلدەرىندە ءتۇسىرىلىپ, 2024 جىلى پروكاتقا شىققان.