بىرىڭعاي ەسەپكە الۋ جۇيەسىن (بەج) ەنگىزۋ تاقىرىبىنا ارنالعان پودكاست بارىسىندا ويىن بيزنەسىن جانە لوتەرەيانى رەتتەۋ كوميتەتىنىڭ توراعاسى ادىلەت تۇرعانباەۆ بۇل جۇيەنىڭ كامەلەتكە تولماعانداردى ءباس تىگۋدەن قورعايتىنىن ايتتى, دەپ جازادى Egemen.kz.
بىرىڭعاي ەسەپكە الۋ جۇيەسىندە بالانىڭ ونلاين-كازينوعا تىركەلۋگە نەمەسە ءباس تىگۋگە تىرىسقانى تۋرالى اتا-انالارعا حابارلاما جىبەرۋ مۇمكىندىگى قاراستىرىلادى.
«بولاشاقتا جۇيە ىسكە قوسىلعاننان كەيىن ونى جەتىلدىرۋگە بولادى. نورماتيۆتىك-قۇقىقتىق جاعىنان تىيىم بولماسا, ءبىز دە وسى جونىندە ويلانامىز. بۇل جاقسى يدەيا. ەگەر كامەلەتكە تولماعاننىڭ اككاۋنتقا تىركەلۋگە تالپىنىسى تىركەلسە, بولاشاقتا مۇنداي فۋنكتسيانىڭ قوسىلۋى ابدەن مۇمكىن. اتا-انالاردىڭ مەسسەندجەرىنە « ۇلىڭىز تىركەلۋگە تىرىستى» دەگەن حابارلاما جىبەرىلۋى مۇمكىن. اتا-اناسى بالامەن سويلەسىپ تۇسىندىرەدى. بىراق قازىرگى تاڭدا ءبىزدىڭ باستى مىندەتىمىز – 21 جاسقا تولماعانداردى, قارىزى بار ادامداردى, وزىنە شەكتەۋ قويعانداردى جانە زاڭ بويىنشا ءباس تىگۋگە رۇقسات ەتىلمەيتىن باسقا ازاماتتاردى جۇيەگە كىرگىزبەۋ. كەيىننەن جۇيەنى جەتىلدىرەمىز», دەدى ادىلەت تۇرعانباەۆ.
پودكاستقا قاتىسقان قارجى مونيتورينگى اگەنتتىگىنىڭ وكىلى دە ءوز پىكىرىن ءبىلدىردى.
«بۇل وتە جاقسى يدەيا. بىرەۋ بالانىڭ اككاۋنتىن پايدالانىپ تىركەلمەك بولسا, اتا-انالارعا حابارلاما كەلىپ, ولار ونىمەن سويلەسەدى», دەدى قارجىلىق مونيتورينگ اگەنتتىگىنىڭ پرەۆەنتسيا باسقارماسى باسشىسىنىڭ ورىنباسارى داۋرەن م ۇلىكوۆ.
سونىمەن قاتار, ادىلەت تۇرعانباەۆ بولاشاقتا بۇل جۇيە دروپپەرلەر ماسەلەسىن دە شەشە الاتىنىن اتاپ ءوتتى. ولار دا باسقا ادامداردىڭ اككاۋنتتارىن پايدالانادى. ونىڭ پىكىرىنشە, اتا-انالارعا جەدەل حابارلاما جىبەرۋ ارقىلى بالالاردى بۇل تورعا تۇسپەۋدەن ساقتاپ, قىلمىستىق سحەمالارعا قاتىسۋىنىڭ الدىن الۋعا بولادى.