سوڭعى اپتالاردا ەۋروپا قۇرلىعى اپتاپ ىستىقتى باستان كەشىپ جاتىر. لوندونداعى يمپەريالىق كوللەدج زەرتتەۋشىلەرى تاراتقان مالىمەتكە سۇيەنسەك, كۇننىڭ كۇرت ىسۋىنان نەبارى ەكى اپتانىڭ ىشىندە 2300-گە جۋىق ادام قايتىس بولعان, دەپ جازادى Egemen.kz.
عالىمدار ءولىم-ءجىتىمنىڭ 12 ءىرى قالادا تىركەلگەنىن ايتادى. ولاردىڭ قاتارىندا ميلان, پاريج, بارسەلونا مەن لوندون سەكىلدى مەگاپوليستەر بار. قايتىس بولعانداردىڭ باسىم بولىگى – دەنساۋلىعى السىرەگەن, جاسى ۇلعايعان ازاماتتار. اسىرەسە 65 جاستان اسقان قاريالار اراسىندا قاتتى ىستىقتىڭ سالدارى اۋىر تيگەن.
ماۋسىم ايىنان بەرى ەۋروپانىڭ بىرقاتار وڭىرىندە اۋا تەمپەراتۋراسى 40 گرادۋستان تومەندەمەي تۇر. ماماندار بۇل قۇبىلىستى جاھاندىق كليماتتىڭ وزگەرۋىمەن, ورمانداردىڭ سيرەۋىمەن جانە ەكولوگيالىق تەپە-تەڭدىكتىڭ بۇزىلۋىمەن بايلانىستىرادى. اعاشتاردى بەيبەرەكەت كەسۋ, جاسىل جەلەكتىڭ ازايۋى مەن زياندى قالدىقتاردىڭ كوبەيۋى – ادامزات بالاسىنىڭ ءوز قولىمەن جاساپ وتىرعان قاتەرىنىڭ ءبىر پاراسى عانا.
ساراپشىلاردىڭ پىكىرىنشە, قالىپتاسقان جاعدايدى ەڭسەرۋ ءۇشىن ءىرى قالالاردا كوگالداندىرۋ جۇمىسىن جۇيەلى تۇردە جۇرگىزىپ, اۋاعا تارالاتىن زياندى قالدىقتاردى شەكتەۋ قاجەت.
بىرىككەن ۇلتتار ۇيىمى ۇسىنعان دەرەكتەر دە كوڭىل كونشىتپەيدى. حالىقارالىق ۇيىمنىڭ مالىمەتىنە قاراعاندا, ەۋروپادا اپتاپ ىستىقتىڭ سالدارىنان جىل سايىن 175 مىڭنان استام ادام قايتىس بولادى. بۇل ازىرگە – تابيعاتپەن ءتىل تابىسا الماعان ادامزاتتىڭ وزىنە ءوزى توندىرگەن قاۋىپتىڭ ناقتى كورىنىسى.